2027 ప్రపంచకప్‌లో రోహిత్, కోహ్లీల భాగస్వామ్యంపై చర్చ

భారత క్రికెట్ దిగ్గజాలు రోహిత్ శర్మ, విరాట్ కోహ్లీల భవిష్యత్తుపై ఆసక్తికర చర్చ నడుస్తోంది. ఇప్పటికే టెస్టులు, టీ20 ఫార్మాట్ల నుంచి తప్పుకున్న ఈ ఇద్దరు సీనియర్లు 2027 వన్డే ప్రపంచకప్ నాటికి జట్టులో కొనసాగుతారా అనే ప్రశ్నకు ఇప్పుడే సమాధానం చెప్పలేమని, కాలమే దాన్ని నిర్ణయిస్తుందని మాజీ కోచ్ రవిశాస్త్రి, ఆస్ట్రేలియా మాజీ కెప్టెన్ రికీ పాంటింగ్ అభిప్రాయపడ్డారు.సుదీర్ఘ విరామం తర్వాత అంతర్జాతీయ క్రికెట్‌లోకి పునరాగమనం చేసిన రోహిత్, కోహ్లీ ఆస్ట్రేలియాతో పెర్త్‌లో జరిగిన మ్యాచ్‌లో పెద్దగా రాణించలేదు. దీనిపై ఐసీసీ రివ్యూలో మాట్లాడిన రవిశాస్త్రి, "ఎక్కువ కాలం ఆటకు దూరంగా ఉంటే తిరిగి గాడిలో పడటానికి సమయం పడుతుంది. అందులోనూ ఆస్ట్రేలియా వంటి కఠినమైన పిచ్‌లపై, నాణ్యమైన బౌలర్లను ఎదుర్కోవడం అంత సులభం కాదు. వారిద్దరి విషయంలో అప్పుడే ఓ అంచనాకు రాలేం" అని అన్నాడు.ఆట పట్ల వారికి ఇంకా ఎంత ఆకలి, అభిరుచి మిగిలి ఉన్నాయి అనేదే కీలకమని శాస్త్రి పేర్కొన్నాడు. "వారిలో ఆటను ఆస్వాదించే గుణం బలంగా ఉంటే చాలు. వారిద్దరికీ అపారమైన అనుభవం, క్లాస్ ఉన్నాయి. కాబట్టి కాస్త సమయం ఇస్తే కచ్చితంగా పుంజుకుంటారు. తొందరపడి వారిని విమర్శించాల్సిన అవసరం లేదు" అని పేర్కొన్నాడు.రవిశాస్త్రి అభిప్రాయంతో రికీ పాంటింగ్ కూడా ఏకీభవించాడు. ఆటలో అన్నీ సాధించేశాను అనే భావనతో కాకుండా, స్వల్పకాలిక లక్ష్యాలను నిర్దేశించుకోవడం చాలా ముఖ్యమని ఆయన సూచించాడు. "2027 ప్రపంచకప్ కోసం వేచిచూడటం కాకుండా, ప్రస్తుత ఆస్ట్రేలియా సిరీస్‌లో రాణించడంపై విరాట్ కోహ్లీ దృష్టి పెట్టాలి. అతను ఎప్పుడూ అత్యంత ప్రేరణతో ఆడే ఆటగాడు" అని పాంటింగ్ అన్నాడు.వారిద్దరూ తమ అత్యుత్తమ ఫామ్‌లో ఉంటే భారత అత్యుత్తమ జట్టులో కచ్చితంగా ఉంటారని పాంటింగ్ స్పష్టం చేశాడు. "రాబోయే ప్రపంచకప్ నాటికి వారు తిరిగి తమ బెస్ట్ ఫామ్ అందుకుంటారా లేదా అనేది త్వరలోనే తేలిపోతుంది. అడిలైడ్ వంటి బ్యాటింగ్‌కు అనుకూలించే పిచ్‌లపై వారు ఎలా ఆడతారనేది ఆసక్తికరం. ఛాంపియన్ ఆటగాళ్లను ఎప్పుడూ తక్కువ అంచనా వేయలేం. వారు కచ్చితంగా పుంజుకుని జట్టుకు విజయాలు అందిస్తారని నేను నమ్ముతున్నాను. అలా జరిగితే 2027 ప్రపంచకప్‌లోనూ వారు కచ్చితంగా ఉంటారు" అని పాంటింగ్ ధీమా వ్యక్తం చేశాడు.