ఎమ్మెల్యే కొలికపూడి ఆరోపణలపై స్పందించిన ఎంపీ కేశినేని చిన్ని

విజయవాడ ఎంపీ కేశినేని చిన్ని, తిరువూరు ఎమ్మెల్యే కొలికపూడి శ్రీనివాసరావు మధ్య మాటల యుద్ధం మరింత ముదిరింది. టికెట్ కోసం తనను రూ.5 కోట్లు డిమాండ్ చేశారంటూ కొలికపూడి చేసిన ఆరోపణలపై ఎంపీ చిన్ని తీవ్రంగా స్పందించారు. "మొన్నటి వరకు నన్ను దేవుడు అన్నారు. ఇప్పుడు దెయ్యంలా ఎందుకు కనిపిస్తున్నానో కొలికపూడి సమాధానం చెప్పాలి" అంటూ ఆయన సూటిగా ప్రశ్నించారు.గత ఎన్నికల్లో తిరువూరు ఎమ్మెల్యే టికెట్ కేటాయింపునకు కేశినేని చిన్ని రూ.5 కోట్లు అడిగారని కొలికపూడి సంచలన ఆరోపణలు చేసిన విషయం తెలిసిందే. ఈ ఆరోపణలకు బలం చేకూరుస్తూ, తాను చిన్ని అనుచరులకు డబ్బు ఇచ్చినట్లుగా పేర్కొంటూ దానికి సంబంధించిన బ్యాంకు స్టేట్‌మెంట్‌ను తాజాగా తన వాట్సాప్ స్టేటస్‌గా పెట్టారు. ఈ నేపథ్యంలోనే తిరువూరులో ఎంపీ కేశినేని చిన్ని పర్యటనకు ఎమ్మెల్యే కొలికపూడి దూరంగా ఉన్నారు.ఈ పరిణామాలపై స్పందించిన కేశినేని చిన్ని, ఈ వివాదం పార్టీ అధిష్ఠానం దృష్టికి వెళ్లిందని, వారే తగిన నిర్ణయం తీసుకుంటారని తెలిపారు. తాను వైసీపీ నేతలతో అంటకాగే వ్యక్తిని కాదని ఆయన తేల్చిచెప్పారు. సీఎం చంద్రబాబు, డిప్యూటీ సీఎం పవన్ కల్యాణ్, మంత్రి నారా లోకేశ్‌లను విమర్శించే వారిని తాను శత్రువులుగానే పరిగణిస్తానని చిన్ని స్పష్టం చేశారు. తిరువూరు నియోజకవర్గంలో తాను నాలుగేళ్లుగా అనేక సేవా కార్యక్రమాలు చేస్తున్నానని ఆయన వెల్లడించారు.మొత్తం మీద, సొంత పార్టీ ఎంపీ, ఎమ్మెల్యే మధ్య బహిరంగంగా సాగుతున్న ఈ వివాదం టీడీపీ అధిష్ఠానానికి చేరడంతో, దీనిపై వారు ఎలా స్పందిస్తారనేది ఆసక్తికరంగా మాiరింది.