ఆడిలైడ్‌లోనూ భారత్‌పై ఆసీస్‌దే పైచేయి.. మరో మ్యాచ్ ఉండగానే సిరీస్ కైవసం

భారత్‌తో జరుగుతున్న మూడు వన్డేల సిరీస్‌ను ఆస్ట్రేలియా మరో మ్యాచ్ మిగిలి ఉండగానే కైవసం చేసుకుంది. గురువారం ఆడిలైడ్ వేదికగా జరిగిన రెండో వన్డేలో ఆస్ట్రేలియా 2 వికెట్ల తేడాతో విజయం సాధించింది. దీంతో మరో మ్యాచ్ మిగిలి ఉండగానే సిరీస్‌ను 2-0తో కైవసం చేసుకుంది. ఈ మ్యాచ్‌లో తొలుత బ్యాటింగ్ చేసిన భారత్.. 264/9 పరుగులు చేసింది. అనంతరం ఆస్ట్రేలియా 46.2 ఓవర్లలోనే లక్ష్యాన్ని ఛేదించింది. ఆస్ట్రేలియా తరఫున మాథ్యూ షార్ట్ (74) టాప్ స్కోరర్‌గా నిలిచాడు.

ఆడిలైడ్ వేదికగా జరిగిన ఈ మ్యాచ్‌లో టాస్ గెలిచిన ఆస్ట్రేలియా కెప్టెన్ మిచెల్ మార్ష్.. బౌలింగ్‌ ఎంచుకున్నాడు. తమ బౌలర్లపై విశ్వాసంతో ఈ నిర్ణయం తీసుకున్నాడు. కెప్టెన్ నమ్మకాన్ని నిలబెడుతూ బౌలర్లు సత్తాచాటారు. ఏడు నెలల విరామం తర్వాత రీఎంట్రీలో తన తొలి వన్డేలోనే డకౌట్ అయిన కోహ్లీ.. రెండో వన్డేలోనూ అదే రిపీట్ చేశాడు. శుభ్‌మన్ గిల్ (9) ఔట్ అయ్యాక క్రీజులోకి వచ్చిన అతడు.. నాలుగు బంతులు ఎదుర్కొని పరుగులేమీ చేయకుండానే ఔట్ అయ్యాడు.

ఆ తర్వాత రోహిత్ శర్మ (73), శ్రేయస్ అయ్యర్ (61) రాణించడంతో ఓ దశలో భారత్.. 135/2తో నిలిచింది. కానీ స్వల్ప వ్యవధిలో వికెట్లు కోల్పోయి కష్టాల్లో పడింది. చివరకు 264/9 రన్స్ చేసింది. ఆస్ట్రేలియా బౌలర్లలో స్పిన్నర్ ఆడమ్ జంపా అత్యధికంగా నాలుగు వికెట్లు తీశాడు. బార్ట్‌లెట్ 3, స్టార్క్ 2 వికెట్లు తీశారు.

అనంతరం ఛేజింగ్ ప్రారంభించిన ఆస్ట్రేలియా ఓ వైపు వికెట్లు పడుతున్నా.. స్కోరు బోర్డును మాత్రం పరుగులు పెట్టించింది. దీంతో కావాల్సిన రన్‌రేట్ ఎప్పుడూ అదుపులోనే ఉంది. ముఖ్యంగా మాథ్యూ షార్ట్ (74), కూపర్ కర్నోలీ (61 నాటౌట్‌) రాణించారు. మిచెల్ ఓవెన్ 23 బంతుల్లో 36 రన్స్ చేశాడు. దీంతో ఆసీస్..46.2 ఓవర్లలో 8 వికెట్లు కోల్పోయి లక్ష్యాన్ని ఛేదించింది. ఈ విజయంతో ఆస్ట్రేలియా మూడు వన్డేల సిరీస్‌లో 2-0తో తిరుగులేని ఆధిక్యంలోకి వెళ్లింది. మరో మ్యాచ్ ఉండగానే సిరీస్‌ను చేజిక్కించుకుంది. నామమాత్రపు మూడో వన్డే అక్టోబర్ 25న సిడ్నీలో జరగనుంది.