పాకిస్థాన్‌లో సంచలనం.. మిస్టరీ కాల్‌తో ఇస్లామాబాద్ ఎస్పీ ఆత్మహత్య

పాకిస్థాన్‌లోని ఇస్లామాబాద్ పోలీస్ శాఖలో విషాదకర ఘటన చోటుచేసుకుంది. ఇండస్ట్రియల్ ఏరియాకు సూపరింటెండెంట్ ఆఫ్ పోలీస్‌గా పని చేస్తున్న అదీల్ అక్బర్.. తన కార్యాలయంలోనే ఆత్మహత్య చేసుకున్నారు. అయితే ఒక ఫోన్ కాల్ అందుకున్న కొద్దిసేపటికే ఆయన తనను తాను కాల్చుకుని బలవన్మరణానికి పాల్పడినట్లు సమాచారం. ఈక్రమంలోనే పోలీసులు కేసు నమోదు చేసుకుని దర్యాప్తు చేస్తున్నారు. అసలు ఆయనకు చివరగా ఫోన్ చేసింది ఎవరు, ఆయనతో ఏం మాట్లాడారు అనే దానిపై సర్వత్రా ఉత్కంఠ నెలకొంది.

పోలీస్ వర్గాల సమాచారం ప్రకారం.. ఇస్లామాబాద్‌లోని ఐ-9 ప్రాంతంలో ఉన్న ఎస్పీ కార్యాలయంలో అదీల్ అక్బర్ ఎస్పీగా పని చేస్తున్నారు. అయితే ఎప్పటిలాగే ఆయన గురువారం రోజు కూడా కార్యాలయంకు వెళ్లి విధులు నిర్వహిస్తున్నారు. ఈక్రమంలోనే ఆయనకు ఓ ఫోన్ కాల్ వచ్చింది. అది మాట్లాడిన కాసేపటికే.. ఆయన ఆవేశంతో ఊగిపోతూ తన గన్‌మెన్ వద్ద నుంచి తుపాకీని లాక్కున్నారు. ఆపై వెంటనే ఛాతీలోకి కాల్చుకున్నారు. హఠాత్తుగా జరిగిన ఈ ఘటనతో షాకైన గన్‌మెన్ వెంటనే తేరుకుని.. తీవ్రంగా గాయపడిన ఎస్పీ అదీల్ అక్బర్‌ను వెంటనే పీఐఎంఎస్ ఆసుపత్రికి తరలించారు. అయితే చికిత్స పొందుతూ ఆయన తుది శ్వాస విడిచారు.

  ఈ విషయం తెలియగానే ఉన్నతాధికారులు హుటాహుటిన సంఘటనా స్థలానికి చేరుకున్నారు. ఇస్లామాబాద్ పోలీస్ ఇన్‌స్పెక్టర్ జనరల్  అలీ నాసిర్ రిజ్వి ఆసుపత్రికి చేరుకుని.. పోస్ట్‌మార్టం నివేదిక వివరాలను అడిగి తెలుసుకున్నారు. ఎస్పీ అదీల్ అక్బర్ తుపాకీ తీసుకున్న గన్‌మెన్‌ను, ఆ సమయంలో కార్యాలయంలో ఉన్న ఇతర సిబ్బందిని పోలీసులు అదుపులోకి తీసుకున్నారు.అలాగే సంఘటనా స్థలం నుంచి పోలీసులు ఆ తుపాకీ, రక్తపు మరకలు అంటిన యూనిఫాం, ఇతర కీలక సాక్ష్యాలను స్వాధీనం చేసుకున్నారు. వేలిముద్రలను ధృవీకరించేందుకు ఆ ఆయుధాన్ని నాద్రా విభాగానికి పంపారు.

అదీల్ అక్బర్ సియాల్‌కోట్ జిల్లాలోని కమోంకి ప్రాంతానికి చెందినవారు. ఈయన గతంలో బలూచిస్థాన్‌లో కూడా సేవలు అందించారు. అయితే ఇస్లామాబాద్ పోలీస్ లైన్స్‌లో అంత్యక్రియల ప్రార్థనలు పూర్తి చేసిన తర్వాత ఆయన పార్థివ దేహాన్ని అధికారిక లాంఛనాలతో స్వస్థలానికి తరలించనున్నారు. ఈ విషాదకర సంఘటనకు దారితీసిన పరిస్థితులను తెలుసుకునేందుకు పోలీసులు ఒక ప్రత్యేక దర్యాప్తు బృందాన్ని నియమించారు. ఎస్పీకి వచ్చిన చివరి ఫోన్ కాల్ ఎక్కడి నుంచి వచ్చిందో, అందులో జరిగిన సంభాషణ ఏమిటనే అంశంపై పరిశోధకులు దృష్టి సారించారు. సంఘటన వెనుక కారణాలను తెలుసుకోవడానికి కాల్ రికార్డింగ్‌లు, మొబైల్ డేటాను విశ్లేషిస్తున్నట్లు విశ్వసనీయ వర్గాలు పేర్కొన్నాయి.