అదానీ కంపెనీకి భారీగా తగ్గిన లాభం.. ఏకంగా 28 శాతం డౌన్

దేశంలోని దిగ్గజ పారిశ్రామిక వేత్త, అదానీ గ్రూప్‌కు చెందిన గౌతమ్ అదానీకి ఇటీవల పెద్దగా ఏదీ కలిసి రావట్లేదని చెప్పొచ్చు. అమెరికా షార్ట్ సెల్లర్ హిండెన్‌బర్గ్ రీసెర్చ్.. సంచలన రిపోర్ట్ విడుదల చేసిన తర్వాత చాన్నాళ్లకు అదానీ గ్రూప్ స్టాక్స్ కోలుకున్నట్లే కనిపించినా.. ఇప్పటికీ గరిష్ట స్థాయిల నుంచి తక్కువలోనే ఉన్నాయి. ఆయా కంపెనీలు ఫలితాల్లోనూ పెద్దగా రాణించట్లేదు. ఈ క్రమంలోనే అదానీ కూడా దూకుడు కాస్త తగ్గించారు. అంతకుముందు పలు రంగాల్లో పెద్ద మొత్తంలో పెట్టుబడులు పెట్టగా.. ఇన్వెస్టర్లు అదానీ గ్రూప్ స్టాక్స్‌పైనా దృష్టి సారించిన నేపథ్యంలో స్టాక్స్ పుంజుకొని ఇన్వెస్టర్లకు కాసుల వర్షం పండించాయి.

ఈ క్రమంలోనే తాజాగా అదానీ గ్రూప్ ఇంధన సంస్థ.. అదానీ ఎనర్జీ సొల్యూషన్స్ 2025-26 ఆర్థిక సంవత్సరం రెండో త్రైమాసికం ఫలితాల్ని వెల్లడించింది. ఏకీకృత ప్రాతిపదికన నికర లాభం రూ. 557.10 కోట్లుగా నమోదైంది. అంతకుముందు ఆర్థిక సంవత్సరం ఇదే సమయంతో పోలిస్తే ఇక్కడ లాభం 28 శాతం తగ్గుముఖం పట్టింది. గత ఆర్థిక సంవత్సరం ఇదే సమయంలో లాభం రూ. 773 కోట్లుగా ఉంది. అయితే ఈ సారి లాభం తగ్గేందుకు ప్రధాన కారణం.. ఏడాది కిందటి వాయిదా వేసిన పన్ను వన్ టైమ్ అడ్జస్ట్‌మెంట్ కింద రూ. 314 కోట్లు చెల్లించడమేనని సంస్థ పేర్కొంది.

>> ఇక కంపెనీ కార్యకలాపాల ఆదాయం ఇదే సమయంలో 6.4 శాతం పెరిగి రూ. 6767 కోట్లుగా నమోదైంది. అంతకుముందు ఇదే సమయంలో ఇది రూ. 6,360 కోట్లుగా ఉండేది. ఇక కంపెనీ మొత్తం వ్యయాలు రూ. 5,687 కోట్లుగా ఉంది. ఇక ఈ ఆర్థిక సంవత్సరం తొలి అర్ధభాగంలో కంపెనీ ఆదాయం 16.4 శాతం పెరిగి రూ. 13,793 కోట్లుగా నమోదైంది.

ఫలితాల్లో నిరాశపర్చిన నేపథ్యంలో ఈ స్టాక్ ధర ఇవాళ (సోమవారం) సెషన్‌లో ఫ్లాట్‌గా ముగిసింది. కిందటి రోజు రూ. 944.25 వద్ద ముగియగా ఇవాళ ఒక దశలో ఇంట్రాడేలో రూ. 951.80 వద్ద గరిష్టాన్ని తాకినప్పటికీ.. చివరికి స్వల్ప లాభంతో రూ. 945.05 వద్ద స్థిరపడింది. ఈ స్టాక్ 52 వారాల గరిష్ట ధర రూ. 1090.95 కాగా.. కనిష్ట ధర రూ. 588 గా ఉంది. కంపెనీ మార్కెట్ విలువ చూస్తే రూ. 1.14 లక్షల కోట్లుగా ఉంది. నెల వ్యవధిలో ఈ స్టాక్ దాదాపు 8 శాతం పుంజుకుంది. ఈ ఏడాదిలో ఇప్పటివరకు 17 శాతం ఎగబాకింది. ఏడాది వ్యవధిలో మాత్రం పెద్దగా రాణించలేదు.