ఈ సమస్యలున్న వారు చియా సీడ్స్ అసలు తినకూడదు

ఇప్పుడిప్పుడే అందరూ ఆరోగ్యంపై అవగాహన పెంచుకుంటున్నారు. ఆహారపు అలవాట్లలో మార్పులు చేసుకుంటున్నారు. అనారోగ్యాలు పెరిగే కొద్ది అప్రమత్తత కూడా పెరుగుతోంది. ముఖ్యంగా డైట్ విషయంలో జాగ్రత్తలు తీసుకుంటున్నారు. అందులో భాగంగానే చాలా మంది సీడ్స్ తినేందుకు ఆసక్తి చూపిస్తున్నారు. అందులోనూ ముఖ్యంగా చియా సీడ్స్ ఎక్కువగా తీసుకుంటున్నారు.

వీటిలో ఎన్నో పోషకాలున్నాయి. సరైన విధంగా తీసుకుంటే ఈ న్యూట్రియెంట్స్ అన్నీ శరీరానికి అందుతాయి. ఇవి ఆరోగ్యకరమైనవే. కానీ కొన్ని రకాల సమస్యలున్న వారు మాత్రం అసలు చియా సీడ్స్ తినకూడదు అని చెబుతున్నారు గ్యాస్ట్రోఎంటరాలజిస్ట్ డాక్టర్ శుభం వత్స్య. చియా సీడ్స్ లో బోలెడన్ని పోషకాలున్న మాట వాస్తవమే అయినా కొందరు మాత్రం ఎట్టి పరిస్థితుల్లోనూ వీటిని తినకూడదు అని అంటున్నారు. మరి ఎవరెవరు చియా సీడ్స్ కి దూరంగా ఉండాలో తెలుసుకుందాం.

చియా సీడ్స్

సీడ్స్ లో సూపర్ ఫుడ్ అనగానే అందరూ చెప్పేది చియా సీడ్స్ గురించే. అంతగా ఇందులో పోషకాలుంటాయి. ముఖ్యంగా ఇందులో ఫైబర్ అధిక మొత్తంలో ఉంటుంది. అదే సమయంలో ఒమెగా 3 ఫ్యాటీ యాసిడ్స్,యాంటీ ఆక్సిడెంట్స్ పుష్కలంగా ఉంటాయి. ఇవన్నీ ఎంతో ఆరోగ్యాన్ని అందిస్తాయి. ఎక్కువ సమయం పాటు శరీరానికి శక్తిని అందించడంలో చియా సీడ్స్ ఎంతో తోడ్పడతాయి. ఓ చెంచా చియా సీడ్స్ తీసుకుంటే దాదాపు వాటి ఎఫెక్ట్ 24 గంటల వరకూ ఉంటుంది.

పెద్దగా రుచికరంగా లేకపోయినప్పటికీ త్వరగా జీర్ణం అవుతాయి. వీటిని నీళ్లలో నానబెట్టి తీసుకోవచ్చు. లేదంటే యోగర్ట్ లో కలుపుకుని తీసుకోవచ్చు. వీటిలో ప్రొటీన్ కూడా బాగానే ఉంటుంది. రెగ్యులర్ గా తీసుకుంటే గుండె ఆరోగ్యం మెరుగు పడడంతో పాటు రక్తం గడ్డకట్టడం లాంటి సమస్యలు రాకుండా ఉంటాయి. ఇందులో ఉండే ఫైబర్ జీర్ణ శక్తికి ఎంతో మేలు చేస్తుంది. అదే సమయంలో మలబద్ధకాన్ని దూరం చేస్తుంది. షుగర్ లెవెల్స్ ని కూడా కంట్రోల్ చేస్తుంది. మరి ఇన్ని ప్రయోజనాలున్న చియా సీడ్స్ ని ఎవరెవరు తినకూడదో తెలుసుకుందాం.

లోబీపీ ఉన్న వారు

సాధారణంగా చియా సీడ్స్ రెగ్యులర్ గా తీసుకుంటే బ్లడ్ ప్రెజర్ పెరగకుండా ఉంటుంది. అంటే కంట్రోల్ లో ఉంటుంది. బీపీ సమస్య ఉన్న వారు రోజూ చియా సీడ్స్ తినడం మంచిది. అయితే లోబీపీ ఉన్న వారు మాత్రం పొరపాటున కూడా చియా సీడ్స్ తీసుకోకూడదు అని గ్యాస్ట్రోఎంటరాలజిస్ట్ డాక్టర్ శుభం సూచిస్తున్నారు. అందుకు కొన్ని కారణాలున్నాయి. చియా సీడ్స్ లో ఒమెగా 3 ఫ్యాటీ యాసిడ్స్ ఉంటాయి. ఇవి బీపీని తగ్గిస్తాయి. అయితే ఇప్పటికే లోబీపీతో ఇబ్బంది పడుతున్న వారు చియా సీడ్స్ తీసుకుంటే బ్లడ్ ప్రెజర్ ఇంకాస్త తగ్గిపోయే ముప్పు ఉంటుంది. ఈ కారణంగా కళ్లు తిరిగి పడిపోవడం, విపరీతంగా నీరసంగా అనిపించడం లాంటి లక్షణాలు కనబడతాయి. కొన్ని సందర్భాలలో బ్లడ్ ప్రెజర్ మరీ పడిపోయే ప్రమాదం ఉంటుంది. ఇది ప్రాణాలకే ప్రమాదం. అందుకే లోబీపీ ఉన్న వారు వైద్యుల సలహా లేకుండా చియా సీడ్స్ తీసుకోవడం మంచిది కాదు అని చెబుతున్నారు డాక్టర్ శుభం.

బ్లడ్ థిన్నర్స్ వాడే వారు

రక్తం మరీ చిక్కబడితే సరఫరా కష్టంగా మారుతుంది. సరైన విధంగా అవయవాలకు రక్తం సరఫరా అవ్వదు. ఇది చాలా ప్రమాదకరం. ఈ సమస్య ఉన్న వారికి వైద్యులు బ్లడ్ థిన్నర్స్ వాడాలని సూచిస్తారు. అంటే ఈ మందులు వాడడం వల్ల రక్తం పల్చబడుతుంది. అయితే చియా సీడ్స్ లో ఒమెగా 3 యాసిడ్స్ ఎక్కువ మొత్తంలో ఉంటాయి. ఇవి రక్తాన్ని పల్చగా మార్చడంలో తోడ్పడతాయి. అయితే ఇప్పటికే బ్లడ్ థిన్నర్స్ వాడుతున్న వారు చియా సీడ్స్ తీసుకోవడం వల్ల రక్తం మరీ పల్చబడే ముప్పు ఉంటుంది. ఈ మెడికేషన్ తో పాటు చియా సీడ్స్ కూడా తినడం వల్ల రియాక్షన్స్ వస్తాయి. ఇప్పటికే గాయాలై తీవ్ర ఇబ్బందులు పడుతున్న వాళ్లు వాడితే ఇంకాస్త ఇబ్బందులు ఎదురయ్యే అవకాశం ఉంటుంది. అందుకే బ్లడ్ థిన్నర్స్ వాడే వారు చియా సీడ్స్ ని వీలైనంత వరకూ దూరం పెట్టడమే మంచిదని డాక్టర్ సూచిస్తున్నారు.

జీర్ణ సమస్యలున్న వారు

మామూలుగా అయితే మలబద్ధకాన్ని తగ్గించడంలో చియా సీడ్స్ ఎంతో ఉపయోగపడతాయి. పొట్టలో ఉబ్బరంగా అనిపించడం, తరచూ గ్యాస్ రావడం లాంటి సమస్యలనూ పోగొడతాయి. వీటిలో ఫైబర్ అధికంగా ఉంటుంది. అంటే పొట్టలో ఉన్న వాటర్ కంటెంట్ ని ఇవి గ్రహిస్తాయి. అయితే ఇక్కడ ముఖ్యమైన విషయం ఏంటంటే..పెద్ద పేగు పూత లేదా ఇతరత్రా జీర్ణ సమస్యలున్న వారు చియా సీడ్స్ అతిగా తీసుకోవడం వల్ల జీర్ణ సమస్యలు తీవ్రమవుతాయని చెబుతున్నారు గ్యాస్ట్రోఎంటరాలజిస్ట్ డాక్టర్ శుభం. ఇప్పటికే ఈ ఇబ్బందులు పడుతున్న వారిలో గ్యాస్ తో పాటు పొట్ట ఉబ్బరంగా అనిపించడం పెరుగుతుంది. అంతే కాదు. మలబద్ధకం, డయేరియా లాంటి సమస్యలు వచ్చే ప్రమాదమూ ఉంటుంది. పొత్తి కడుపులో విపరీతంగా నొప్పి వస్తుంది.

కిడ్నీ సమస్యలున్న వారు

చియా సీడ్స్ అందరికీ ఆరోగ్యాన్ని అందిస్తుంది అన్న గ్యారెంటీ ఏమీ లేదు. ఎందుకంటే కిడ్నీ సమస్యలున్న వారు వీటిని తినడం వల్ల తీవ్ర సమస్యలు వస్తాయని చెబుతున్నారు డాక్టర్ శుభం. సాధారణంగా చియా సీడ్స్ లో ఫాస్ఫరస్, పొటాషియం అధికంగా ఉంటాయి. వీటి వల్ల ఎముకలు దృఢంగా ఉండడంతో పాటు గుండె పని తీరు కూడా మెరుగుపడుతుంది. ఇప్పటికే చాలా రోజులుగా కిడ్నీ సమస్యలతో ఇబ్బందులు పడుతున్న వారు చియా సీడ్స్ తీసుకోవడం వల్ల కిడ్నీల పని తీరుపై ప్రభావం పడుతుంది. మరీ ఎక్కువగా చియా సీడ్స్ తినడం వల్ల ఎలక్ట్రోలైట్ ఇంబ్యాలెన్స్ అవుతాయి. కిడ్నీలపై ఒత్తిడి పెరగడంతో పాటు పొటాషియం లెవెల్స్ పెరగడం వల్ల హైపర్ కలేమియా వ్యాధి వచ్చే ప్రమాదం ఉంటుంది.