పీరియడ్స్లో దద్దుర్లు, దురద వేధిస్తున్నాయా? ఈ చిన్న చిట్కాలు పాటిస్తే చాలు!
Health beauty | Suryaa Desk | Published : Wed, Oct 29, 2025, 02:08 PM
వాస్తవానికి చాలా మంది అమ్మాయిలు పీరియడ్స్లో ఇబ్బందులు పడుతుంటారు. ఆ సమయంలో దద్దుర్లు, దురద వంటి సమస్యలను ఎదుర్కొంటుంటారు. ప్యాడ్స్ వాడటం వల్ల ఈ సమస్యలు మరింత ఎక్కువ అవుతుంటాయి. ఈ సమస్యలను నివారించడానికి కొన్ని సులభమైన చిట్కాలు పాటిస్తే సరిపోతుంది. ఆరోగ్యకరమైన పీరియడ్స్ కోసం నిపుణులు అందిస్తున్న సూచనలు ఏంటో ఇప్పుడు తెలుసుకుందాం.
పీరియడ్స్ సమయంలో దద్దుర్లు, చికాకును నివారించడానికి సరైన ప్యాడ్ ఎంచుకోవడం చాలా ముఖ్యం. సెంటెడ్ లేదా ప్లాస్టిక్ పూత కలిగిన శానిటరీ ప్యాడ్స్ వాడకపోవడం ఉత్తమం. వీటి వల్ల గాలి సరిగా ఆడక చర్మ సమస్యలు పెరుగుతాయి. వీటికి బదులుగా, కాటన్ ప్యాడ్స్ను ఉపయోగించడం మంచిదని నిపుణులు సూచిస్తున్నారు. కాటన్ ప్యాడ్స్ గాలి ప్రసరణకు సహాయపడి, చర్మానికి చికాకు కలగకుండా చూస్తాయి.
పీరియడ్స్ సమయంలో పరిశుభ్రత చాలా అవసరం. కాలుష్యం లేకుండా ఉండటానికి ప్యాడ్స్ను తరచుగా మార్చడం చాలా ముఖ్యం. ప్రతి 4 నుండి 6 గంటలకు లేదా అంతకంటే ముందుగానే ప్యాడ్స్ను మార్చాలని నిపుణులు సలహా ఇస్తున్నారు. అదనంగా, జననాంగాల పరిశుభ్రత విషయంలో కూడా జాగ్రత్త వహించాలి.
యోని ప్రాంతాన్ని శుభ్రం చేయడానికి సువాసన లేని (Unscented), తేలికపాటి సబ్బు (Mild Soap) లేదా గోరువెచ్చని నీటిని ఉపయోగించాలి. కఠినమైన సబ్బులు లేదా రసాయనాలు యోని సహజ pH స్థాయిని దెబ్బతీస్తాయి. ఈ చిన్న చిన్న జాగ్రత్తలు పాటించడం వల్ల పీరియడ్స్ సమయంలో చర్మ సమస్యలు రాకుండా నివారించి, సౌకర్యంగా ఉండేందుకు సహాయపడతాయి.
|
|