ఉద్యోగినులకు పీరియడ్స్‌.. ప్యాడ్‌లతో ఫోటోలు దిగాలని అధికారులు ఆదేశం

పీరియడ్స్ నిరూపించుకోడానికి ప్యాడ్స్‌తో ఫోటోలు దిగాలని మహిళా సిబ్బందిపై ఒత్తిడి చేశారన్న ఆరోపణలు తీవ్ర దుమారం రేపుతున్నాయి. ఈ ఘటన హర్యానాలోని ప్రముఖ విద్యా సంస్థ మహర్షి దయానంద్ యూనివర్సిటీలో చోటుచేసుకుంది. రోహతక్‌లోని దయానంద్ వర్సిటీలో కొంత మంది మహిళా పారిశుద్ధ్య కార్మికులను సూపర్‌వైజర్లు బలవంతంగా తమ దుస్తులు విప్పి, పీరియడ్స్‌లో ఉన్నట్టు నిరూపించుకోడానికి శానిటరీ ప్యాడ్లలతో ఉన్న ఫోటోలు దిగాలని ఒత్తిడి చేశారని ఆరోపిస్తూ ఆందోళనకు దిగారు. అక్టోబరు 26న ఓ పారిశుద్ధ్య కార్మికురాలు విధులకు ఆలస్యంగా హాజరైన తర్వాత ఈ ఘటన చోటుచేసుకుంది.

యూనివర్సిటీ రిజిస్ట్రార్ కృష్ణన్ కాంత్ మాట్లాడుతూ.. ‘ఈ ఘటనపై అంతర్గత విచారణ చేపట్టామని, దోషిగా తేలినవారిని వదిలిపెట్టబోం’ అని చెప్పారు. బాధిత మహిళలు తెలిపిన వివరాల ప్రకారం..‘ విధులకు ఆలస్యంగా వచ్చినందుకు సూపర్‌వైజర్లు వినోద్, జితేంద్రలు ఆగ్రహం వ్యక్తం చేయడంతో సమస్య మొదలైంది..ఆ మహిళా సిబ్బంది పీరియడ్స్‌లో ఉన్నామని, ఆరోగ్యం బాగోలేదని చెప్పారు. దీనికి ఆ ఇద్దరు సూపర్‌వైజర్లు అబద్ధం చెబుతున్నారని మండిపడ్డారు... ఆ తర్వాత, వారు ఆ మహిళలను పీరియడ్స్‌లో ఉన్నారని నిరూపించుకోడానికి దుస్తులు విప్పాల బలవంతపెట్టారని ఆరోపణలు ఉన్నాయి.. వినోద్, జితేంద్ర మరో మహిళను పిలిచి, వారిని టాయిలెట్‌కు తీసుకెళ్లి, శానిటరీ ప్యాడ్లతో ఫోటోలు తీయమని ఆదేశించారు’ అని బాధితులు తెలిపారు.

‘‘పీరియడ్స్‌లో ఉన్నారా? లేదా? అనేది నిర్దారించడానికి మీ ప్రయివేట్ భాగాలను ఫోటోలు తీయమన్నారని వాళ్లు మాకు చెప్పారు’’ అని బాధిత మహిళ వాపోయింది. ‘‘మా ఇద్దరం ఆ ఆదేశాలను పాటించేందుకు నిరాకరించగానే, ఉద్యోగం నుంచి తొలగిస్తామని బెదిరించారు’’ అని బాధితులు తెలిపారు. ఈ షాకింగ్ వార్త బయటకు రావడంతో మిగతా మహిళా సిబ్బంది, విద్యార్థులు, విద్యార్థి సంఘాలు కలిసి యూనివర్సిటీలో ఆందోళనకు దిగాయి. ఈ ఘటనకు సంబంధించిన ఫోటోలు, వీడియోలను రాష్ట్ర మహిళా కమిషన్ చైర్‌పర్సన్‌కి కూడా పంపించారు.

ఇద్దరు సూపర్‌వైజర్లపై భారత న్యాయ సంహితలోని లైంగిక వేధింపులు, మహిళల గౌరవానికి భంగం కలిగించేలా వ్యవహరించడం, నేరపూరిత చర్యల వంటి సెక్షన్ల కింద ఎఫ్ఐఆర్ నమోదుచేసినట్టు స్థానిక స్టేషన్ హౌస్ ఆఫీసర్ రోషన్ లాల్ తెలిపారు.

‘పనిప్రదేశంలో మహిళల భద్రత లోపం కలిగించే ఏ సంఘటననైనా ఎట్టి పరిస్థితుల్లోనూ సహించం.. భద్రత, గౌరవం, సాంస్కృతికంగా ఆహ్లాదకరమైన వాతావరణాన్ని ఎల్లప్పుడూ అందించాలనే తమ నిబద్ధతను’ వర్సిటీ పునరుద్ఘాటించింది... ‘మహిళల భద్రత, గౌరవానికి అత్యంత ప్రాముఖ్యత.. అనుచిత ప్రవర్తన లేదా దుర్వినియోగానికి పాల్పడిన వారిపై అత్యంత కఠిన చర్యలు తీసుకుంటాం’ అని ప్రకటనలో పేర్కొంది.