అమెరికా షట్‌డౌన్ ఎఫెక్ట్.. ట్రంప్ సర్కార్ సంపద రూ.62 వేల కోట్లకుపైగా ఆవిరి

అమెరికా రాజకీయ నాయకుల మొండి వైఖరి ఇప్పుడు ఆ దేశ ఆర్థిక వ్యవస్థను తీవ్రంగా దెబ్బతీస్తోంది. కీలకమైన బిల్లుల విషయంలో అధికార, విపక్ష సభ్యుల మధ్య ఏకాభిప్రాయం కుదరకపోవడంతో.. అమెరికా ప్రభుత్వం షట్‌డౌన్‌లోకి వెళ్లి ఇప్పటికే 31 రోజులు పూర్తి చేసుకుంది. ఈ సుదీర్ఘ షట్‌డౌన్ కారణంగా అగ్రరాజ్యానికి భారీ నష్టాన్ని మిగులుస్తోంది. తాజాగా కాంగ్రెషనల్ బడ్జెట్ ఆఫీస్ (సీబీఓ) విడుదల చేసిన అంచనాల ప్రకారం.. 31 రోజులుగా కొనసాగుతున్న ఈ షట్‌డౌన్ కారణంగా అమెరికా ఆర్థిక వ్యవస్థ నుంచి 7 బిలియన్ డాలర్లు అంటే మన భారత కరెన్సీలో ఏకంగా సుమారు రూ.62,149 కోట్ల సంపద శాశ్వతంగా ఆవిరైంది.

ఈ షట్‌డౌన్ గనుక ఇలాగే కొనసాగితే.. 6 వారాలకు 11 బిలియన్ డాలర్లు.. 8 వారాలకు 14 బిలియన్ డాలర్ల మేర ఆర్థిక నష్టం ఏర్పడుతుందని సీబీఓ హెచ్చరికలు జారీ చేసింది. ఈ షట్‌డౌన్ ఎఫెక్ట్ అమెరికన్ ఆర్థిక వ్యవస్థపై దీర్ఘకాలికంగా తీవ్ర ప్రభావం చూపుతుందని ప్రముఖ ఆర్థికవేత్తలు ఆందోళన వ్యక్తం చేస్తున్నారు. ఈ షట్‌డౌన్ ఎఫెక్ట్ మెల్లగా మొదలై.. ఆర్థిక వ్యవస్థపై తీవ్ర ప్రభావం చూపనుందని కేపీఎంజీ చీఫ్ ఎకానమిస్ట్ డయాన్ స్వాంక్ ఆందోళన వ్యక్తం చేశారు. ఆర్థిక వ్యవస్థ ఇప్పటికే బలహీనంగా ఉందని.. ఈ షట్‌డౌన్ ఊహించిన దానికంటే పెద్ద సమస్యగా పరిణమించొచ్చని మూడీస్ అనలిటిక్స్‌కు చెందిన మార్క్ జాండీ హెచ్చరించారు.

మరోవైపు.. విశ్లేషకుల అంచనా ప్రకారం.. ప్రతివారం అమెరికా ఆర్థిక వృద్ధిలో 0.1 నుంచి 0.2 పాయింట్లు తగ్గుముఖం పట్టే అవకాశం ఉందని తెలుస్తోంది. ఇది ప్రజల విశ్వాసాన్ని దెబ్బతీసి.. మార్కెట్లకు అంతరాయం కలిగిస్తుంది. ఆర్థిక, విధానపరమైన అనిశ్చితి కారణంగా పలు సంస్థలు కొత్త పెట్టుబడులు పెట్టడానికి ఆచితూచి వ్యవహరిస్తున్నాయి. అంతేకాకుండా ఆర్టిఫిషియల్ ఇంటెలిజెన్స్ (ఏఐ), ఆటోమేషన్‌ను ప్రవేశపెట్టడం వల్ల జాబ్ మార్కెట్‌లో ఇప్పటికే బలహీనత కనిపిస్తోందని ఆర్థిక నిపుణులు వెల్లడించారు. ఈ ప్రభుత్వ మూసివేత.. ఆ ఉద్యోగాల కోతలను మరింత పెంచే అవకాశం ఉందని అంచనా వేస్తున్నారు. అమెరికా చట్టసభ సభ్యుల్లో రాజీ సూచనలు కనిపించకపోవడంతో.. 2018-19లో డొనాల్డ్ ట్రంప్ హయాంలో 35 రోజులు కొనసాగిన సుదీర్ఘ షట్‌డౌన్ రికార్డును ప్రస్తుత పరిస్థితి దాటుతుందా అనే ఆందోళనలు అమెరికన్లలో వ్యక్తం అవుతున్నాయి.