తగ్గిన మందుల రేట్లు.. మెడికల్ షాపుల్లో రూల్స్ ఫాలో కాకపోతే.. ఈ నంబర్లకు ఫోన్ చేయండి..

మధ్య తరగతి ప్రజలకు ఊరట కలిగించేలా కేంద్ర ప్రభుత్వం ఇటీవల జీఎస్టీ రేట్లు తగ్గించిన సంగతి తెలిసిందే. దీంతో పలు వస్తువుల ధరలలో మార్పులు వచ్చాయి. ఎక్కువ శాతం నిత్యావసర వస్తువులపై రేట్లు తగ్గించారు. అలాగే హెల్త్ ఇన్సూరెన్స్ ప్రీమియం తీసివేశారు. ఇక జీఎస్టీ శ్లాబుల మార్పుతో ఔషధాల ధరలలోనూ మార్పులు వచ్చాయి. బీపీ, షుగర్ వంటి సమస్యలు ఉన్నవారికి ఊరట కలిగించేలా ఆయా మందుల రేట్లు కూడా తగ్గాయి. అలాగే క్యాన్సర్‌ మందులు, ఇన్సులిన్‌ వంటి రేట్లలోనూ మార్పులు చోటుచేసుకున్నాయి. అయితే సూపర్‌ జీఎస్టీ అమల్లోకి వచ్చి సుమారుగా నెలరోజులు దాటిపోయింది. అయినప్పటికీ కొన్నిచోట్ల మెడికల్ షాపులు పాత ధరలకే మందుల విక్రయాలు జరుగుతున్నట్లు వార్తలు వస్తున్నాయి. ఇలాంటి మెడికల్ షాపుల నిర్వాహకులు.. బిల్లులు కూడా ఇవ్వడం లేదని.. దీనికి పలు కారణాలు చెప్తున్నట్లు వార్తలు వస్తున్నాయి.

ఈ నేపథ్యంలో ఔషధ నియంత్రణ సంస్థ అధికారులు పలు సూచనలు చేస్తున్నారు. మెడికల్ షాపుల వద్ద మందులు కొన్నప్పుడు.. బిల్లు తీసుకోవాలని, జీఎస్టీ తగ్గింపు ప్రయోజనం పొందాలని సూచిస్తున్నారు. అలాగే జీఎస్టీ రేట్ల తగ్గింపుపై ప్రతి మెడికల్‌ షాప్‌ వద్ద కచ్చితంగా సమాచార బోర్డులు ఏర్పాటు చేయాలని చెప్తున్నారు. టెక్నికల్ కారణాలు చెప్పకుండా సాప్ట్‌వేర్‌లో మార్పులు చేసి.. ఔషధాలు కొనుగోలు చేసినవారికి కచ్చితంగా బిల్లు ఇవ్వాలని చెప్తున్నారు.

మరోవైపు మెడికల్ షాపులలో నిబంధనలకు విరుద్ధంగా ఔషధాలు అమ్ముతున్నట్లు తేలితే.. వెంటనే తమ దృష్టికి చేరవేయాలని విజయనగరం జిల్లాలోని ఔషధ నియంత్రణ అధికారులు తెలిపారు. ఇందుకోసం 94901 53339, 73829 34399, 73829 34327 నంబర్లను అందుబాటులో ఉంచారు.

మరోవైపు జీఎస్టీ రేట్ల తగ్గింపుతో.. యాంటీబయాటిక్స్, యాంటీ డయాబెటిక్, పెయిన్ కిల్లర్స్ వంటి మందుల రేట్లు తగ్గాయి. గతంలో వీటిపై 12 శాతం జీఎస్టీ ఉండగా.. తాజాగా దీనిని 5 శాతానికి తగ్గించారు. అలాగే క్యాన్సర్ వంటి దీర్ఘకాలిక రోగాల మందులపై జీఎస్టీని 12 శాతం నుంచి సున్నా శాతానికి తెచ్చారు. అలాగే డయాగ్నోస్టిక్స్‌కు సంబంధించిన కొన్ని వైద్య పరికరాల ధరలను కూడా 5 శాతం జీఎస్టీలోకి తీసుకువచ్చారు. ఐవీ సెట్లు, సెలూన్‌ స్టాండ్లు, మాస్క్స్ వంటి వాటి ధరలు కూడా తగ్గాయి. తగ్గింపు ధరలకు ఔషధాలను విక్రయించకుంటే పైన పేర్కొన్న నంబర్లను సంప్రదించాలని సూచించారు.