మాజీ మంత్రి జోగి రమేష్ అరెస్టు.. కల్తీ మద్యం కేసులో సంచలనం!

ఆంధ్రప్రదేశ్‌లో సంచలనం సృష్టించిన కల్తీ మద్యం కేసులో మాజీ మంత్రి, వైఎస్‌ఆర్‌సిపి నాయకుడు జోగి రమేష్‌ను పోలీసులు ఈ రోజు అరెస్టు చేశారు. ఇబ్రహీంపట్నంలోని ఆయన నివాసం నుంచి అదుపులోకి తీసుకున్న అధికారులు, తదనంతరం ఆయన్ను వెంటనే విజయవాడకు తరలించారు. ఈ అరెస్టు తర్వాత రాష్ట్ర రాజకీయాలు ఒక్కసారిగా వేడెక్కాయి. మాజీ మంత్రిని ఎక్సైజ్ కార్యాలయానికి తీసుకెళ్లి, అక్కడ ప్రాథమిక విచారణ నిర్వహించనున్నట్లు సమాచారం.
విజయవాడకు తరలించిన జోగి రమేశ్‌కు మొదట వైద్య పరీక్షలు నిర్వహించనున్నారు. ఆ తర్వాత త్వరలోనే స్థానిక మేజిస్ట్రేట్ ముందు ఆయనను ప్రవేశపెట్టే అవకాశం ఉంది. మేజిస్ట్రేట్ ఆదేశాల మేరకు ఆయనను కస్టడీలోకి తీసుకుని, కల్తీ మద్యం తయారీ, పంపిణీకి సంబంధించిన కీలక అంశాలపై పోలీసులు విసృతంగా విచారించనున్నారు. ఈ కేసులో ఇప్పటికే అరెస్టయిన ప్రధాన నిందితుడు ఇచ్చిన వాంగ్మూలం ఆధారంగానే రమేష్‌ను అరెస్టు చేసినట్లు తెలుస్తోంది.
జోగి రమేశ్ అరెస్టు రాష్ట్రంలో తీవ్ర రాజకీయ దుమారాన్ని రేపింది. తమ నేత అరెస్టును ఖండిస్తూ వైఎస్సార్సీపీ కార్యకర్తలు పలు ప్రాంతాల్లో పెద్ద ఎత్తున నిరసనలు, ఆందోళనలు చేపట్టారు. పోలీసులు అధికార పార్టీకి అనుకూలంగా వ్యవహరిస్తున్నారని, ఇది కేవలం రాజకీయ కక్ష సాధింపు చర్య అని వారు తీవ్ర స్థాయిలో ఆరోపిస్తున్నారు. మాజీ మంత్రిని అక్రమంగా ఇరికించారని, ఈ అరెస్టును తక్షణమే ఉపసంహరించుకోవాలని వైఎస్‌ఆర్‌సిపి నేతలు డిమాండ్‌ చేస్తున్నారు.
కల్తీ మద్యం కేసు దర్యాప్తులో జోగి రమేశ్‌ అరెస్టు ఒక కీలక మలుపుగా పరిగణించవచ్చు. ఇప్పటికే అనేక మందిని అరెస్టు చేసిన సిట్ (ప్రత్యేక దర్యాప్తు బృందం)కు మాజీ మంత్రిపై మరిన్ని బలమైన ఆధారాలు లభించినట్లు తెలుస్తోంది. ఈ కేసులో రమేశ్ విచారణతో మరికొన్ని కీలక విషయాలు వెలుగులోకి వచ్చే అవకాశం ఉంది. మరోవైపు, ఈ కేసులో సీబీఐ దర్యాప్తు కోరుతూ రమేశ్ ఇప్పటికే హైకోర్టును ఆశ్రయించిన నేపథ్యంలో, తదుపరి న్యాయపరమైన పరిణామాలు ఎలా ఉంటాయో చూడాలి.