భారత్‌లో ఆ కార్లన్నీ వెనక్కి.. కంపెనీ ప్రకటన

సొంత కారు అనేది భారతీయుల్లో పెరుగుతున్న అభిరుచి. చాలా మంది తమకంటూ సొంత ఇల్లు, అందులో కారు ఉండాలని భావిస్తుంటారు. ధనవంతులు అయితే రెండు మూడు ఆపైన కార్లు కొంటారు. అయితే కారు కొనుగోలు చేయడంతోనే సరిపోదు దాని నిర్వహణ సైతం చాలా ముఖ్యం. లేదంటే ఏదైనా సమస్య ఏర్పడినప్పుడు చాలా ఇబ్బందులు పడాల్సి వస్తుంది. అందుకే కారు తయారు చేసిన కంపెనీ ఇచ్చే అప్డేట్స్‌ ఎప్పుడూ అనుసరిస్తూ ఉండాలి. కొన్నిసార్లు కంపెనీలు ఏదైనా సమస్య ఏర్పడినట్లు గుర్తిస్తే రీకాల్ చేస్తాయి. నిర్దేషిత సమయంలో తయారు చేసిన కార్లను వెనక్కి పిలిపించి సమస్యను పరిష్కరించే ప్రయత్నం చేస్తాయి. అలా ఇప్పుడు ఓ కంపెనీ భారత్‌లో రీకాల్ చేసింది. మరి ఆ వివరాలు తెలుసుకుందాం.

ప్రముఖ కార్ల తయారీ కంపెనీల్లో ఒకటైన పోర్స్చే భారత దేశంలోని పనామెరా కార్లను రీకాల్ చేసింది. పనామెరా కారు ఉపయోగిస్తున్న వినియోగదారులందరూ ఈ విషయాన్ని తెలుసుకోవాలి. అయితే రీకాల్ ద్వారా సమస్య పరిష్కారానికి ఎలాంటి డబ్బులు చెల్లించాల్సిన అవసరం లేదని కంపెనీ తెలిపింది. మొత్తంగా 158 యూనిట్లను వెనక్కి పిలిపిస్తున్నట్లు పేర్కొంది. SIAM వెబ్‌సైట్‌లోని వివరాల ప్రకారం పనామెరా మోడల్ కార్లలోని ఎయిర్ బ్యాగ్ సిస్టమ్‌లో లోపం ఉన్నట్లు గుర్తించింది. ఎయిర్ బ్యాగ్ వ్యవస్థలోని సమస్యను పరిష్కరించేందుకు పోర్స్చే కంపెనీ ఆయా కార్లను రీకాల్ చేసినట్లు తెలుస్తోంది.

పోర్స్చే పనామెరా కార్లు ఉపయోగిస్తున్న వారు బ్రాండ్ అధికారిక రీకాల్ పోర్టల్ లోకి వెళ్లి తమ వాహన గుర్తింపు సంఖ్య (VIN) ఇన్‌పుట్ చేసి వారి కారు రీకాల్ లిస్టులో ఉందో లేదో తెలుసుకోవచ్చని కంపెనీ పేర్కొంది. 2023, జూలై 19 నుంచి 2025 సెప్టెంబర్ 2వ తేదీ మధ్య తయారైన కార్లను రీకాల్ చేసినట్లు వెల్లడించింది. ఈ తేదీల మధ్య తయారు చేసిన కార్లు కొనుగోలు చేసిన యజమానులు వెంటనే వివరాలు తనిఖీ చేసి కంపెనీకి రిపోర్ట్ చేయాల్సి ఉంటుంది. ఎయిర్ బ్యాగ్‌ వ్యవస్థలో ఏర్పడిన సమస్య వల్ల వాహన వినియోగదారులపై తీవ్ర ప్రభావం పడనుంది. ప్రమాదం జరిగినప్పుడు అవి తెరుచుకోకపోతే ప్రాణాలు కోల్పోవచ్చని తెలిపింది. దీనిని దృష్టిలో ఉంచుకుని కంపెనీ రీకాల్ జారీ చేసినట్లు తెలుస్తోంది.

రీకాల్ చేసిన కార్లలో ఎయిర్ బ్యాంక్ సిస్టమ్ సమస్యను కంపెనీ ఉచితంగానే రిపేర్ చేయనుంది. కాబట్టి దీని కోసం కస్టమర్లు లేదా వినియోగదారులు ఎలాంటి డబ్బులు చెల్లించాల్సిన అవసరం లేదని కంపెనీ పేర్కొంది. పోర్స్చే కంపెనీ గతంలో ఆస్ట్రేలియాలోనూ పనామెరా కార్లను రీకాల్ చేసింది. ఇలాంటి ఎయిర్ బ్యాగ్ సిస్టమ్ సమస్యను గుర్తించిన క్రమంలోనే పలు యూనిట్లను వెనక్కి పిలిపించింది.