"ఇంటర్ పాస్ స్టూడెంట్స్‌కు సంతోష వార్త – రైల్వేలో ఉద్యోగావకాశాలు"

నిరుద్యోగులకు శుభవార్త! ఇంటర్మీడియట్ అర్హతతోనే కేంద్ర ప్రభుత్వ ఉద్యోగం సాధించాలని కలగంటున్నవారికి రైల్వే రిక్రూట్‌మెంట్ బోర్డు (RRB) బంపర్ అవకాశం కల్పించింది. రైల్వే శాఖలోని నాన్ టెక్నికల్ పాపులర్ కేటగిరీ (NTPC) విభాగంలో మొత్తం 3,058 పోస్టుల భర్తీ కోసం దరఖాస్తులను ఆహ్వానిస్తోంది. ఈ పరీక్షలో ఉత్తీర్ణత సాధిస్తే రైల్వేలో స్థిరమైన ఉద్యోగాన్ని సులభంగా పొందవచ్చు.రైల్వే రిక్రూట్‌మెంట్ బోర్డు NTPC విభాగంలో డిగ్రీ మరియు ఇంటర్మీడియట్ అర్హతలతో వివిధ పోస్టుల కోసం నోటిఫికేషన్ విడుదల చేసింది. ప్రస్తుతం డిగ్రీ అర్హత కలిగిన అభ్యర్థుల కోసం 5,810 పోస్టులకు దరఖాస్తులు స్వీకరించబడుతున్నాయి. ఇక ఇంటర్ అర్హత కలిగిన అభ్యర్థులకు కూడా మరో కొత్త అవకాశం లభించింది. అర్హత ఉన్న వారు ఈ రెండు వర్గాల పోస్టులకు కూడా దరఖాస్తు చేసుకోవచ్చు. అయితే పరీక్షలు విడివిడిగా జరుగుతాయి కాబట్టి, డిగ్రీ అర్హత కలిగిన వారు రెండింటికీ అప్లై చేయవచ్చు.అభ్యర్థులు పరీక్ష రాయేటప్పుడు తెలుగు మాధ్యమాన్ని కూడా ఎంచుకోవచ్చు. అయితే RRB పరిధిలోని ఖాళీలలో ఒక్క పోస్టుకు మాత్రమే దరఖాస్తు చేసుకోవాలి. ఇంటర్ స్థాయి NTPC విభాగంలో అందుబాటులో ఉన్న పోస్టులు ఈ విధంగా ఉన్నాయి కమర్షియల్ కం టికెట్ క్లర్క్‌ 2,424 పోస్టులు, అకౌంట్స్ క్లర్క్ కం టైపిస్ట్‌ 394 పోస్టులు, జూనియర్ క్లర్క్ కం టైపిస్ట్‌ 163 పోస్టులు, అలాగే ట్రైన్స్ క్లర్క్‌ 77 పోస్టులు.జీతభత్యాల పరంగా కూడా ఈ పోస్టులు ఆకర్షణీయంగా ఉన్నాయి. కమర్షియల్ కం టికెట్ క్లర్క్ పోస్టులు లెవల్-3 పే స్కేల్ కిందకి వస్తాయి, వీరికి మొదటి నెల నుంచే సుమారు ₹40,000 వరకు జీతం లభిస్తుంది. మిగిలిన పోస్టులు లెవల్-2 పే స్కేల్ కిందకి వస్తాయి, వీరికి ప్రారంభ జీతం సుమారు ₹36,000 వరకు ఉంటుంది. ఎంపిక ప్రక్రియలో రెండు దశల కంప్యూటర్ బేస్డ్ టెస్ట్ (CBT) నిర్వహిస్తారు. టైపిస్ట్ పోస్టుల కోసం అదనంగా టైపింగ్ స్కిల్ టెస్ట్ కూడా ఉంటుంది.అర్హతల విషయానికి వస్తే, అభ్యర్థులు 18 నుండి 30 సంవత్సరాల మధ్య వయస్సు కలిగి ఉండాలి. రిజర్వేషన్ కేటగిరీలకు వయస్సులో సడలింపులు ఉన్నాయి  SC/ST అభ్యర్థులకు 5 సంవత్సరాలు, OBCలకు 3 సంవత్సరాలు, దివ్యాంగులకు 10 నుండి 15 సంవత్సరాల వరకు సడలింపు ఉంటుంది. ఇంటర్మీడియట్ లేదా దానికి సమానమైన అర్హతలో కనీసం 50% మార్కులు సాధించినవారే ఈ పోస్టులకు దరఖాస్తు చేసుకోవచ్చు. అయితే SC, ST, దివ్యాంగ అభ్యర్థులు పాస్ అయితే చాలు. డిగ్రీ లేదా పీజీ అర్హత కలిగిన వారు ఇంటర్‌లో 50% మార్కులు లేకపోయినా కూడా అప్లై చేయవచ్చు.దరఖాస్తు చేసుకునే చివరి తేదీ నవంబర్ 27. అర్హులైన అభ్యర్థులు మరిన్ని వివరాల కోసం మరియు ఆన్‌లైన్ దరఖాస్తు కోసం RRB అధికారిక వెబ్‌సైట్ను సందర్శించాలి. ఈ అవకాశాన్ని ఉపయోగించుకుంటే, ప్రభుత్వ రంగంలో మంచి వేతనం మరియు స్థిరమైన కెరీర్‌ను పొందే అవకాశం లభిస్తుంది.