ట్రంప్ చెప్పినట్లుగా ఏమీ జరగట్లేదంటూ..!అణు పరీక్షల నిర్వహణపై పాకిస్థాన్ క్లారిటీ

అగ్రరాజ్యం అమెరికా అధ్యక్షుడు డొనాల్డ్ ట్రంప్ ఇటీవల అణ్వాయుధ పరీక్షలపై చేసిన సంచలన వ్యాఖ్యలు ప్రపంచ వ్యాప్తంగా రాజకీయ దుమారాన్ని రేకెత్తించాయి. రష్యా, చైనా, ఉత్తర కొరియా, పాకిస్థాన్ వంటి దేశాలు చురుగ్గా అణు పరీక్షలు నిర్వహిస్తున్నాయని ట్రంప్ ఆరోపించారు. దీనిపై వెంటనే స్పందించిన పాకిస్థాన్, చైనా దేశాలు ట్రంప్ వ్యాఖ్యలను తోసిపుచ్చాయి.

మొదటి దేశంగా ఉండం..: పాకిస్థాన్

ట్రంప్ వ్యాఖ్యల నేపథ్యంలో పాకిస్థాన్‌కు చెందిన ఓ ఉన్నతాధికారి అంతర్జాతీయ మీడియాకు వివరణ ఇచ్చారు. అణు పరీక్షలను పునరుద్ధరించే విషయంలో పాకిస్థాన్ ఎప్పుడూ ఇతర దేశాల కంటే ముందుగా ఉండబోదని ఆయన స్పష్టం చేశారు. అణు పరీక్షలను నిర్వహించిన మొదటి దేశం పాకిస్థాన్ కాదని తేల్చి చెప్పారు. అదేవిధంగా అణు పరీక్షలను తిరిగి ప్రారంభించే మొదటి దేశంగానూ తాము ఉండబోమని అన్నారు. అంతేకాకుండా అణు పరీక్షలను ఆపే విషయంలో తాము అంతర్జాతీయ నిబద్ధతకు కట్టుబడి ఉన్నామని పాకిస్థాన్ ఈ సందర్భంగా స్పష్టం చేసింది.

ట్రంప్ వ్యాఖ్యలపై చైనా విదేశాంగ మంత్రిత్వ శాఖ ప్రతినిధి మావో నింగ్ కూడా స్పందించారు. చైనా ఒక బాధ్యతాయుతమైన అణ్వాయుధ దేశం అని ఆమె పేర్కొన్నారు. చైనా ఎల్లప్పుడూ ఆత్మరక్షణ అణు వ్యూహాన్ని సమర్థిస్తుందని చెప్పారు. అణు పరీక్షలు నిలిపివేయాలనే విషయంలోనూ తాము అదే నిబద్ధతకు కట్టుబడి ఉంటామని మావో నింగ్ స్పష్టం చేశారు. ట్రంప్ వ్యాఖ్యలు కేవలం రాజకీయ ప్రకటనలు మాత్రమేనని.. అణు నిరాయుధీకరణకు తాము కట్టుబడి ఉన్నామని చైనా మరోసారి పునరుద్ధాటించింది.

మరోవైపు మాత్రం ట్రంప్.. రష్యా, చైనా సహా ఇతర దేశాలు అణు పరీక్షలు చేస్తున్నాయని ఆరోపించారు. ఆ దేశాల మాదిరిగా రహస్యంగా కాకుండా తాము బహిరంగంగానే పరీక్షలు చేపడతామన్నారు. ప్రపంచంలో చాలా దేశాలు చురుగ్గా అణ్వాయుధాలను పరీక్షిస్తున్నా.. వాటి గురించి ఆ దేశాలు మాట్లాడట్లేదని చెప్పారు. కానీ తామలా మిగిలిపోవాలని అకోవట్లేదని ట్రంప్ పేర్కొన్నారు. గతంలో అధికారంలో ఉన్నప్పుడు అణు పరీక్షలు చేయకూడదని నిర్ణయించుకున్నప్పటికీ.. ప్రస్తుతం పరిస్థితులు మారాయని, రష్యా, చైనా వేగంగా తమ అణుసామర్థ్యాలను పెంచుకుంటున్న నేపథ్యంలో మళ్లీ అణ్వాయుధ పరీక్షలు ప్రారంభించాల్సిందిగా అమెరికా డిపార్ట్‌మెంట్ ఆఫ్‌ వార్‌కు ఆదేశాలు జారీ చేసినట్లు ట్రంప్ వెల్లడించారు. ఈ ప్రకటన అణు నిరాయుధీకరణ ఒప్పందాల భవిష్యత్తుపై తీవ్ర ఆందోళనలను పెంచింది.