ప్రతీ నలుగురిలో ముగ్గురి వీసాలు తిరస్కరణ,,,,భారతీయ విద్యార్థులకు కెనడా బిగ్ షాక్

ఉన్నత విద్యను అభ్యసించడానికి కెనడా వెళ్లి అంతర్జాతీయ గుర్తింపు పొందాలనే లక్ష్యంతో ఉన్న వేలాది మంది భారతీయ విద్యార్థులకు కెనడా ప్రభుత్వం భారీ షాక్ ఇచ్చింది. కెనడా ఇమ్మిగ్రేషన్ డిపార్ట్‌మెంట్ (IRCC) వెల్లడించిన గణాంకాల ప్రకారం.. భారతీయ విద్యార్థుల వీసా దరఖాస్తులు భారీగా తిరస్కరణకు గురయ్యాయి. దరఖాస్తు చేసుకున్న ప్రతి నలుగురిలో ముగ్గురు విద్యార్థుల స్టడీ పర్మిట్లను కెనడా అధికారులు నిరాకరించారు. ముఖ్యంగా 2025 ఆగస్టు నెలలో సమర్పించిన భారతీయ విద్యార్థుల దరఖాస్తుల్లో ఏకంగా 74 శాతం తిరస్కరణకు గురయ్యాయి. అంతకుముందు 2023 ఆగస్టులో ఈ తిరస్కరణ రేటు 32 శాతంగా ఉండేది. కేవలం రెండేళ్ల వ్యవధిలోనే తిరస్కరణ రేటు రెట్టింపునకు పైగా పెరగడం ఆందోళన కలిగిస్తోంది.

మిగతా దేశాల కంటే భారత్‌కే అధిక నిరాకరణ..

భారతీయ విద్యార్థులకు ఎదురైన ఈ భారీ తిరస్కరణ రేటు మిగతా అంతర్జాతీయ విద్యార్థుల సగటుతో పోలిస్తే చాలా ఎక్కువ కావడం గమనార్హం. అదే సమయంలో చైనా విద్యార్థుల వీసా తిరస్కరణ రేటు కేవలం 24 శాతం మాత్రమే కాగా.. అన్ని దేశాల అంతర్జాతీయ విద్యార్థుల సగటు తిరస్కరణ రేటు 40 శాతం వద్ద ఉంది. భారత్‌కు ఇంతటి కఠినమైన విధానాన్ని అనుసరించడం వెనుక కెనడా ప్రభుత్వ వ్యూహంపై నిపుణులు దృష్టి సారిస్తున్నారు.

నిజానికి అంతర్జాతీయ విద్యార్థులను ఆకర్షించడంలో అమెరికా తర్వాత కెనడా అగ్రస్థానంలో ఉంది. గతేడాది కెనడా దాదాపు 10 లక్షల మంది అంతర్జాతీయ విద్యార్థులకు అవకాశం కల్పించింది. వీరిలో దాదాపు 41 శాతం మంది భారత్ నుంచే ఉండగా.. చైనా, వియత్నాం దేశాలు తర్వాతి స్థానాల్లో ఉన్నాయి. భారత్ అతిపెద్ద అంతర్జాతీయ విద్యార్థి వనరుగా ఉన్నప్పటికీ.. ఈ స్థాయిలో తిరస్కరణలు ఎదురవడం విస్మయం కలిగిస్తోంది.

కారణం ఏంటంటే?

ఇంత భారీ స్థాయిలో వీసాలు నిరాకరించడానికి కారణాలను ఇమ్మిగ్రేషన్ నిపుణులు విశ్లేషిస్తున్నారు. కెనడా ప్రభుత్వం తమ అంతర్జాతీయ విద్యార్థి వీసా కార్యక్రమాన్ని కఠినతరం చేయడం, ముఖ్యంగా కెనడాలో తీవ్రమైన నివాస కొరత, మౌలిక సదుపాయాలు కొరత ఉంది. ఇవే ఇంత భారీ స్థాయిలో వీసాలు నిరాకరించడానికి కారణం అవుతున్నట్లు భావిస్తున్నారు. కొత్తగా వచ్చే విద్యార్థులు పెరిగిన స్థానిక ఖర్చులను భరించగలరా అనే అంశంపై కూడా అధికారుల్లో ఆందోళనలు వ్యక్తం అవుతున్నాయి. ఈ స్థానిక పరిస్థితుల కారణంగానే కెనడా ప్రభుత్వం తాత్కాలిక వలసదారుల సంఖ్యను తగ్గించేందుకు ప్రయత్నిస్తోందని అంచనా వేస్తున్నారు. మరోవైపు కెనడాలో అవకాశాలు తగ్గుతుండటంతో భారతీయ విద్యార్థులు ప్రత్యామ్నాయంగా జర్మనీ వైపు మొగ్గు చూపుతున్నట్లు నివేదికలు సూచిస్తున్నాయి. ఈ పరిణామాలు రాబోయే రోజుల్లో అంతర్జాతీయ విద్యార్థుల ఎంపికల్లో మార్పులు తీసుకొచ్చే అవకాశం ఉంది.