బీహార్ తొలి విడత ఎన్నికల్లో రికార్డు స్థాయిలో పోలింగ్

బీహార్ అసెంబ్లీ ఎన్నికల తొలి విడత పోలింగ్ రాష్ట్ర చరిత్రలోనే ఓ సరికొత్త రికార్డు సృష్టించింది. శుక్రవారం జరిగిన ఈ పోలింగ్‌లో 64.66 శాతం ఓటింగ్ నమోదైంది. ఇది బీహార్ అసెంబ్లీ ఎన్నికల చరిత్రలో అత్యధికం కావడం రాజకీయ వర్గాల్లో తీవ్ర చర్చకు దారితీసింది. భారీ సంఖ్యలో ఓటర్లు తరలిరావడంపై చీఫ్ ఎలక్షన్ కమిషనర్ జ్ఞానేశ్ కుమార్ హర్షం వ్యక్తం చేశారు. ఓటర్లకు, ఎన్నికల సిబ్బందికి ఆయన ధన్యవాదాలు తెలిపారు.ఇంతకుముందు 2000 సంవత్సరంలో జరిగిన అసెంబ్లీ ఎన్నికల్లో 62.57 శాతం పోలింగే అత్యధికంగా ఉండేది. ఇప్పుడు ఆ రికార్డు బద్దలైంది. ఈ భారీ ఓటింగ్ శాతం అధికార కూటమికి వ్యతిరేక పవనాలకు సంకేతమని ప్రతిపక్షాలు భావిస్తున్నాయి. సాధారణంగా పోలింగ్ శాతం పెరిగితే దానిని ప్రభుత్వ వ్యతిరేకతకు సంకేతంగా విశ్లేషిస్తుంటారు. ప్రతి ఇంటికి ఒక ప్రభుత్వ ఉద్యోగం ఇస్తామన్న ప్రతిపక్షాల హామీ ఓటర్లను ఆకర్షించి ఉండవచ్చని అంచనాలు వెలువడుతున్నాయి.అయితే, ఈసారి పోలింగ్ శాతం పెరగడం వెనుక మరో కీలకమైన అంశం కూడా ఉంది. ఎన్నికలకు ముందు ఓటర్ల జాబితా సవరణలో భాగంగా సుమారు 47 లక్షల పేర్లను తొలగించారు. దీంతో మొత్తం ఓటర్ల సంఖ్య 7.89 కోట్ల నుంచి 7.42 కోట్లకు తగ్గింది. ఓటర్ల సంఖ్య తగ్గడం వల్ల కూడా గణితపరంగా పోలింగ్ శాతం పెరిగినట్లు కనిపించే అవకాశం ఉంది. ఈ సవరణను పేద, అణగారిన వర్గాల ఓటర్లను లక్ష్యంగా చేసుకుని చేశారని ప్రతిపక్షాలు ఆరోపించిన విషయం తెలిసిందే.అధిక పోలింగ్ ఎప్పుడూ ప్రభుత్వ మార్పునకు దారితీయదనేందుకు కూడా గతంలో ఉదాహరణలు ఉన్నాయి. ఛత్తీస్‌గఢ్, మధ్యప్రదేశ్ వంటి రాష్ట్రాల్లో పోలింగ్ శాతం పెరిగినప్పటికీ, అధికారంలో ఉన్న బీజేపీయే తిరిగి గెలిచింది. కాబట్టి బీహార్‌లో ప్రస్తుత ట్రెండ్‌ను కచ్చితంగా అంచనా వేయడం కష్టమని నిపుణులు అభిప్రాయపడుతున్నారు.తొలి విడతలో మొత్తం 243 స్థానాలకు గాను 121 స్థానాల్లో పోలింగ్ జరిగింది. ఆర్జేడీ నేత, ముఖ్యమంత్రి అభ్యర్థి తేజస్వి యాదవ్ , ఉప ముఖ్యమంత్రి, బీజేపీ రాష్ట్ర అధ్యక్షుడు సామ్రాట్ చౌదరి ప్రముఖ గాయని మైథిలి ఠాకూర్ వంటి ప్రముఖుల భవితవ్యం ఈవీఎంలలో నిక్షిప్తమైంది. రెండో విడత పోలింగ్ ఈ నెల‌ 11న జరగనుండగా, 14న ఫలితాలు వెలువడనున్నాయి. ఈ రికార్డు స్థాయి పోలింగ్ ఎవరికి అనుకూలంగా మారుతుందో తెలియాలంటే ఫలితాల వరకు వేచి చూడాల్సిందే.