కుప్వారాలో 'ఆపరేషన్ పింపుల్'.. ఇద్దరు ఉగ్రవాదులు హతం

జమ్మూ కాశ్మీర్‌లోని కుప్వారా జిల్లాలో భద్రతా బలగాలు శుక్రవారం జరిపిన మెరుపు దాడిలో ఇద్దరు ఉగ్రవాదులను హతమార్చాయి. నియంత్రణ రేఖ వెంబడి ఉగ్రవాదుల చొరబాటు యత్నాన్ని భద్రతా దళాలు విజయవంతంగా భగ్నం చేశాయి. శనివారం ఉదయం వరకు కూడా ఈ ప్రాంతంలో గాలింపు ఆపరేషన్ కొనసాగుతున్నట్లు అధికారులు తెలిపారు.

పక్కా సమాచారంతో ఆపరేషన్ పింపుల్..

చొరబాటు ప్రయత్నం గురించి పక్కాగా అందిన నిఘా సమాచారం ఆధారంగా.. భద్రతా ఏజెన్సీలు కుప్వారాలోని కేరన్ సెక్టార్‌లో సంయుక్త ఆపరేషన్‌ను ప్రారంభించాయి. అప్రమత్తంగా ఉన్న బలగాలు అనుమానాస్పద కదలికలను గుర్తించి, చొరబాటుదారులను అడ్డుకునే ప్రయత్నం చేశాయి. వెంటనే ఉగ్రవాదులు నిరాటంకంగా కాల్పులు జరపడంతో.. భద్రతా దళాలు కూడా దీటుగా ప్రతిఘటించాయి. భారత ఆర్మీకి చెందిన చినార్ కార్ప్స్ ఈ ఆపరేషన్ వివరాలను ఎక్స్ వేదికగా వెల్లడించింది. "చొరబాటు ప్రయత్నంపై అందిన నిర్దిష్ట ఇంటెలిజెన్స్ ఇన్‌పుట్ ఆధారంగా కేరన్ సెక్టార్‌లో సంయుక్త ఆపరేషన్ ప్రారంభించాం. అప్రమత్తంగా ఉన్న సైన్యం ఉగ్రవాదులను చుట్టుముట్టేసింది. ఈ ఆపరేషన్‌లో ఇద్దరు ఉగ్రవాదులను హతమార్చాం" అని చినార్ కార్ప్స్ పోస్ట్ చేసింది.

నియంత్రణ రేఖ వెంబడి భద్రతా దళాలు నిరంతరం నిఘా ఉంచుతున్నాయి. సరిహద్దుకు ఆవల నుంచి ఉగ్రవాదులు భారత భూభాగంలోకి చొరబడేందుకు తరచూ ప్రయత్నిస్తుంటారు. ఎప్పటిలాగే ఈరోజు కూడా ఉగ్రవాదులు సరిహద్దు దాటేందుకు ప్రయత్నించగా.. ఆర్మీ దాన్ని గుర్తించి, ఇద్దరిని హతమార్చింది. గతంలో అక్టోబర్ 14న కూడా కుప్వారాలోనే నియంత్రణ రేఖ వెంబడి చొరబాటు యత్నాన్ని ఆర్మీ భగ్నం చేసి ఇద్దరు ఉగ్రవాదులను హతమార్చింది.

జమ్మూ కాశ్మీర్‌కు 740 కిలోమీటర్ల పొడవైన నియంత్రణ రేఖ ఉంది. ఇందులో 240 కిలో మీటర్ల అంతర్జాతీయ సరిహద్దు కూడా విస్తరించి ఉండగా.. ఈ LoC బారాముల్లా, కుప్వారా, బందీపురా జిల్లాల్లో విస్తరించి ఉంది. ఇక అంతర్జాతీయ సరిహద్దు జమ్మూ, సాంబ, కఠువా జిల్లాల్లో ఉంది. సరిహద్దుల్లో శాంతిభద్రతలను కాపాడేందుకు, ఉగ్రవాద కార్యకలాపాలను అరికట్టేందుకు భద్రతా బలగాలు నిరంతర పోరాటం సాగిస్తున్నాయి.