తిరుమల అన్న ప్రసాదం వీడియోపై అంబటి రాంబాబు రియాక్షన్

తిరుమల అన్నప్రసాదంపై వైసీపీ నేత, మాజీ మంత్రి అంబటి రాంబాబు చేసిన వ్యాఖ్యలుసోషల్ మీడియాలో పెద్దఎత్తున చర్చనీయాంశమైన సంగతి తెలిసిందే. తిరుమలలో అన్నప్రసాదం బాగుందని ప్రశంసిస్తూ ఆయన చేసిన వీడియో చర్చకు దారితీసింది. వైసీపీ నేత, అందులోనూ కూటమి ప్రభుత్వంపై విరుచుకుపడే అంబటి రాంబాబు వంటి లీడర్ అన్నప్రసాదం నాణ్యతను మెచ్చుకుంటూ వీడియో షేర్ చేయడంపై పెద్దఎత్తున చర్చ జరిగింది. అయితే ఈ విషయం మీద అంబటి రాంబాబు స్పందించారు.మెడికల్ కాలేజీల ప్రైవేటీకరణను నిరసిస్తూ సోమవారం రోజున గుంటూరు జిల్లా కోర్టు వద్ద వైసీపీ లీగల్ సెల్ ఆధ్వర్యంలో కోటి సంతకాల కార్యక్రమం జరిగింది. ఈ కార్యక్రమంలో మాజీ మంత్రి అంబటి రాంబాబు పాల్గొన్నారు.

ఈ సందర్భంగా తిరుమల అన్నప్రసాదం గురించి తాను చేసిన వ్యాఖ్యలపై అంబటి రాంబాబు స్పందించారు.1985 నుంచి తిరుమలలో ఉచిత భోజనం పెడుతున్నారని అంబటి రాంబాబు అన్నారు. తిరుమలలో ఉచిత భోజనం కోసంశ్రీవారి భక్తులు వేల కోట్ల వరకూ విరాళాలు ఇచ్చారన్నారు. దాదాపు 40 ఏళ్ల నుంచితిరుమల కొండపై శ్రీవారి భక్తులకు ఉచితంగా అన్న ప్రసాదం అందిస్తున్నారన్న అంబటి రాంబాబు.. తాను ఇప్పుడు వెళ్లి భోంచేశాను కావున.. భోజనం బాగుందని చెప్పానని క్లారిటీ ఇచ్చారు. కానీ టీటీడీ ఛైర్మన్ బీఆర్‌ నాయుడు గొప్పగా పనిచేశారంటూ ప్రచారం చేసుకుంటున్నారని విమర్శించారు. దేవుడితో రాజకీయాలు చేయటం కూటమి నేతలకు బాగా అలవాటేనంటూ అంబటి రాంబాబు విమర్శించారు. తిరుమల లడ్డూ ప్రసాదంతో చంద్రబాబు రాజకీయం చేశారని.. ఇప్పుడు అన్నప్రసాదంపై తాను చేసిన వ్యాఖ్యలను రాజకీయం చేసే ప్రయత్నాలు జరుగుతున్నాయని అంబటి అన్నారు.

మరోవైపుఈ వ్యవహారంపై ఎక్స్ వేదికగానూ అంబటి రాంబాబు స్పందించారు. తిరుమల వెంగమాంబ ఉచిత భోజనం గురించి తాను చెప్పిన మంచి మాటలతో శునకానందం పొందుతున్న వారికి అభినందనలు అంటూ అంబటి రాంబాబు ట్వీట్ చేశారు. తిరుమలలోని వెంగమాంబ అన్నప్రసాద కేంద్రంలో ఉచిత భోజనం రుచికరంగా ఉందని.. అలాగే అన్నప్రసాద వితరణ కేంద్రం కూడా పరిశుభ్రంగా ఉందంటూ అంబటి రాంబాబు ప్రశంసలు కురిపించిన సంగతి తెలిసిందే.

తిరుమల శ్రీవారి దర్శనం అనంతరం వెంగమాంబ అన్నప్రసాద కేంద్రానికి వెళ్లిన అంబటి రాంబాబు.. అన్నప్రసాదం స్వీకరించారు. అనంతరం ఆ విషయాన్ని వివరిస్తూ వీడియో పంచుకున్నారు. ఈ వీడియో సోషల్ మీడియాలో చర్చనీయాంశం కాగా.. అంబటి స్పందించారు.