తొలిసారి హెచ్-1బీ వీసాలపై యూటర్న్,,,,,డొనాల్డ్ ట్రంప్ పాజిటివ్ కామెంట్

అగ్రరాజ్యం అమెరికా అధ్యక్షుడు డొనాల్డ్ ట్రంప్ ఎప్పుడు ఏ టెంపర్ నిర్ణయంతో ఎవరిని ఇబ్బందిపెడతారో అని అందరూ టెన్షన్ పడుతుంటారు. రెండోసారి అధికారంలోకి వచ్చిన నాటి నుంచి తొందరపాటు నిర్ణయాలతో ప్రపంచ దేశాలను ఇబ్బందులకు గురిచేస్తోన్న ట్రంప్.. హెచ్-1బీ వీసాలపై కూడా తన మార్క్‌ చూపించారు. ఏకంగా హెచ్-1 బీ వీసా దరఖాస్తు ఫీజును లక్ష డాలర్లకు (రూ.88 లక్షలు)కి పెంచి, అమెరికాలో స్థిరపడాలనుకునే ఉద్యోగుల ఆశలపై ఆయన నీళ్లు చల్లారు. అంతేకాదు, వీసాల విషయంలో కఠిన నిబంధనలను కూడా తెరపైకి తెచ్చారు.

 అయితే, ఇప్పుడు హఠాత్తుగా డొనాల్డ్ ట్రంప్ యూటర్న్ తీసుకున్నారు! తాజాగా ఫాక్స్ న్యూస్‌కి ఇచ్చిన ఇంటర్వ్యూలో మాత్రం వలస కార్మికులపై ట్రంప్‌ పాజిటివ్‌గా మాట్లాడారు. ఆయన ఏం చెప్పారంటే... అమెరికా పారిశ్రామిక సెక్టార్‌తో పాటు, రక్షణ రంగంలో పురోగతి సాధించాలంటే, నైపుణ్యం ఉన్న కార్మికులను విదేశాల నుంచి అమెరికాకు రప్పించాలని అయితే, అది పరిమిత స్థాయిలో ఉండాలని మాత్రం స్పష్టంగా చెప్పారు. ఈ రంగాల్లో అమెరికన్లకు నైపుణ్యం లేదని అందుకే ఇతర దేశాల ఉద్యోగులను రప్పించాల్సిందేనని పేర్కొన్నారు.

తమ దేశంలో ఎంతో ప్రతిభావంతులైన యువకులున్నారని, తమ ప్రభుత్వ పాలసీలతో అమెరికన్లకు వేతనాలు పెరిగే ఛాన్స్ ఉందని ట్రంప్ తన చర్యలను సమర్థించుకున్నారు. దేశ యువత నైపుణ్యం నేర్చుకుంటే, క్షిపణులు తయారు చేయిస్తానని, అప్పుడు దేశంలో నిరుద్యోగం లేకుండా చేయవచ్చని అధ్యక్షుడు ట్రంప్ బహిరంగంగా చెప్పారు. జార్జియాలోని రక్షణ విభాగానికి చెందిన ఓ పరిశ్రమ నుంచి పెద్ద సంఖ్యలో విదేశీ ఉద్యోగులను తొలగించడం వల్ల కొన్ని కీలక ఉత్పత్తుల తయారీలో ఇబ్బందులను ఎదుర్కొంటున్నట్లు ట్రంప్‌ ఈ సందర్భంగా ఉదహరించారు. దీంతో హెచ్-1బీ వీసాలకోసం ఎదురుచూస్తున్నవారికి కొంత ఊరట లభించింది.

అసలు విషయం ఏంటంటే.. డొనాల్డ్ ట్రంప్ తీసుకున్న కఠిన నిర్ణయాల వల్ల అమెరికాలోని పారిశ్రామిక రంగం ఇప్పుడు తీవ్ర ఇబ్బందుల్లో ఉంది. 'అక్రమ వలసలు' అనే పేరుతో నైపుణ్యం గల కార్మికులను తరిమేయడం ద్వారా తయారీ రంగంలో కార్మికుల కొరత ఏర్పడిందని కొన్ని నివేదికలు చెబుతున్నాయి. అందుకే, పరిస్థితి మరింత దిగజారకముందే ట్రంప్‌ ఇలా మాట్లాడినట్లు సమాచారం!