స్టార్క్ స్టన్నింగ్ క్యాచ్‌కి ఫ్యూజులు అవుట్,,,లేటు వయస్సులో రేర్ ఫీట్

యాషెస్ సిరీస్‌లో మిచెల్ స్టార్క్ నిప్పులు చెరుగుతున్నాడు. జోష్ హేజిల్‌వుడ్, ప్యాట్ కమిన్స్ లేకపోయినా జట్టు బౌలింగ్ బాధ్యతలు తన భుజాలపై వేసుకోవడమే కాకుండా.. అద్భుతమైన బంతులతో ఇంగ్లిష్ బ్యాటర్లకు చుక్కలు చూయించాడు. మొదటి ఇన్నింగ్స్‌లో ఏకంగా ఏడు వికెట్లు పడగొట్టిన స్టార్క్, రెండో ఇన్నింగ్స్ ఆరంభంలోనే మరో వికెట్ తీసుకున్నాడు. జాక్ క్రాలీ క్యాచ్‌ని బౌలింగ్ చేసి అందుకున్న తీరుకు క్రికెట్ లోకం నివ్వెరపోయింది.

 పెర్త్ టెస్టు రెండో రోజు ఆట మొదలైన కొద్దిసేపటికే ఆస్ట్రేలియా తన చివరి వికెట్ కోల్పోయింది. దాంతో ఇంగ్లండ్ రెండో ఇన్నింగ్స్‌కి వచ్చింది. మొదటి ఇన్నింగ్స్‌లో జాక్ క్రాలీని తొలి ఓవర్ ఐదో బంతికే పెవిలియన్‌కు పంపిన స్టార్క్, రెండో ఇన్నింగ్స్‌లో కూడా సరిగ్గా ఐదో బంతికే అవుట్ చేశాడు. మొదటి ఇన్నింగ్స్‌లో క్రాలీ స్లిప్‌లో దొరకగా, రెండో ఇన్నింగ్స్‌లో కాట్ అండ్ బౌల్డ్‌గా దొరికిపోయాడు.

మెరుపు వేగంతో బౌలింగ్ చేసిన స్టార్క్ క్రాలీ స్ట్రయిట్ ఆడిన బంతిని డైవ్ చేసి మరీ అందుకున్నాడు. ఎదురుగా వస్తున్న క్యాచ్ స్టార్క్‌కి దూరంగా వెళుతున్నా అటువైపు దూకి మరీ అందుకోవడంతో అందరూ ఒక్కసారిగా స్టన్నయ్యారు. 35 ఏళ్ల వయస్సులో కూడా స్టార్క్ ఇలాంటి బౌలింగ్ చేయడమే కాకుండా, అంతకుమించి ఆశ్చర్యపరిచేలా డైవ్ క్యాచ్ అందుకోవడంతో క్రికెట్ ప్రపంచం ప్రశంసలు అందించింది.

ఇక మ్యాచ్ విషయానికి వస్తే తొలుత బ్యాటింగ్ చేసిన ఇంగ్లండ్ జట్టు 172 పరుగులకు ఆలౌట్ కాగా, ఆసీస్ తొలి ఇన్నింగ్స్‌లో 132 పరుగులకు పది వికెట్లు కోల్పోయింది. రెండో ఇన్నింగ్స్ లంచ్ బ్రేక్ వరకూ నిలకడగా ఆడిన ఇంగ్లండ్ ప్లేయర్లు ఆ తర్వాత వరుసగా వికెట్లు కోల్పోయారు. తొలి ఇన్నింగ్స్‌లో ఏడు వికెట్లు పడగొట్టిన స్టార్క్, రెండో ఇన్నింగ్స్‌లో 30 ఓవర్లు ముగిసే సమయానికి మూడు వికెట్లు తీసుకున్నాడు. దాంతో ఈ టెస్టులో స్టార్క్ పది వికెట్లు తీసుకున్నట్టయింది. తొలి ఇన్నింగ్స్‌లో వికెట్లు తీయలేకపోయిన బోలాండ్ రెండో ఇన్నింగ్స్‌లో మూడు వికెట్లు పడగొట్టాడు.