ప్రత్యేక పరిస్థితుల్లో తేజస్ విమానం కూలిపోయింది

దుబాయ్ ఎయిర్‌షోలో భారతీయ తేజస్ ఫైటర్ జెట్ కూలిపోయిన సంగతి తెలిసిందే. ఈ ప్రమాదంలో పైలట్ వింగ్ కమాండర్ నమాంశ్‌ స్యాల్ మృతి చెందారు. ఇది 24 ఏళ్ల తేజస్ చరిత్రలో రెండో ప్రమాదం కావడం గమనార్హం. ఈ దుర్ఘటన నేపథ్యంలో తేజస్ యుద్ధ విమానాన్ని తయారు చేసిన హిందుస్తాన్ ఏరోనాటిక్స్ లిమిటెడ్ (హెచ్‌ఏఎల్) కంపెనీ షేర్లు సోమవారం ఉదయం ఎనిమిది శాతానికి పైగా పడిపోయాయి. బీఎస్‌ఈలో షేరు ఓ దశలో దాదాపు 8 శాతం తగ్గి రూ. 4,205 వద్ద ట్రేడ్ అయింది. అయితే ఈ పరిణామంపై హెచ్ఏఎల్ స్పందించింది.

 తేజస్ యుద్ధ విమానం కూలిపోవడం.. ప్రత్యేక పరిస్థితుల వల్ల జరిగిన దుర్ఘటనగా హెచ్‌ఏఎల్‌ అభివర్ణించింది. ఈ ప్రమాదం తమ సంస్థ వ్యాపార కార్యకలాపాలను, ఆర్థిక పనితీరు లేదా భవిష్యత్తు డెలివరీలపై ఎలాంటి ప్రభావం చూపదని క్లారిటీ ఇచ్చింది. అంతేకాకుండా ఈ ప్రమాదంపై విచారణ జరుపుతున్న ఏజెన్సీలకు.. తమ వైపు నుంచి పూర్తి సహకారం అందిస్తామని హెచ్‌ఏఎల్‌ ప్రకటించింది. ఈ విషయంలో వాటాదారులకు ఎప్పటికప్పుడు సమాచారం అందిస్తామని యుద్ధ విమానాల తయారీ సంస్థ పేర్కొంది.

కాగా, దుబాయ్ ఎయిర్ షోలో కూలిపోయిన తేజస్ యుద్ధ విమానం.. తమిళనాడులోని సూలూరు స్క్వాడ్రన్‌కు చెందినది. ఏరియల్ డిస్‌ప్లేలో పాల్గొన్న ఒక భారతీయ యుద్ధ విమానం.. దాదాపు ఎనిమిది నిమిషాలు అదిరిపోయే విన్యాసాలు చేసింది. ఈ క్రమంలో ప్రమాదానికి గురై కూలిపోయింది. గాల్లో గింగిరాలు తిరిగి నేలను ఢీకొట్టిన వెంటనే క్రాష్ అయింది. దీంతో ఆ ప్రాంతం అంతా దట్టమైన, నల్లటి పొగ కమ్ముకుంది. కాగా, ఈ ప్రమాదానికి గల కారణాలను తెలుసుకోవడానికి ఇండియన్ ఎయిర్‌ఫోర్స్ విచారణకు ఆదేశించిన విషయం తెలిసిందే.

పూర్తిగా స్వదేశీ టెక్నాలజీతో రూపొందించిన ఈ లైట్ కంబాట్ ఫైటర్ జెట్‌లో.. అత్యాధునిక ఏవియానిక్స్, రాడార్ వ్యవస్థలు ఉన్నాయి. యుద్ధాల్లో అఫెన్సివ్, కంబాట్ ఆపరేషన్లలో కీలక మారుతుంది. నేవీ, వాయుసేనకు ఉపయోగపడేలా పలు వేరియంట్లను హెచ్‌ఏఎల్‌ తయారు చేసింది. ఈ విమానాలు ఇలా కూలిపోవడం అత్యంత అరుదైన విషయం. ఈ ప్రమాదం జరగడానికి.. కారణం G-LOC (గురుత్వాకర్షణ వల్ల స్పృహ కోల్పోవడం) అయి ఉండవచ్చని ఊహాగానాలు వినిపిస్తున్నాయి. యుద్ధ విమానాల విన్యాసాల సమయంలో పైలట్లు.. అధిక G- ఫోర్స్‌కు గురైనప్పుడు ఈ పరిస్థితి తలెత్తుతుందని చెబుతున్నారు. దీనిపై వాయుసేన దర్యాప్తు జరుపుతోంది.