పిల్లల ముందు మహిళతో అశ్లీల నృత్యాలు.. హోంగార్డు సస్పెండ్

ఆయన ఓ బాధ్యాయుతమైన ఉద్యోగంలో ఉన్నారు. ప్రజలకు ఏమైనా సమస్యలు వస్తే అండగా నిలిచే పోలీస్ శాఖలో పనిచేస్తున్నారు. తన ప్రవర్తనతో, తన హుందాతనంతో నలుగురికీ ఆదర్శంగా నిలవాల్సిన ఆయన.. శ్రుతి తప్పారు. రేపటి పౌరులు బాలలే అనే సంగతి మరిచి.. హుందాతనం కోల్పోయి ప్రవర్తించారు. చివరకు పోలీస్ ఉన్నతాధికారుల నుంచి సస్పెండ్ నోటీసులు అందుకున్నారు. కృష్ణా జిల్లా కంకిపాడులో ఓ హోంగార్డు అశ్లీల నృత్యాలు సోషల్ మీడియాలో వైరల్ అవుతున్నాయి. కంకిపాడు రూరల్ సీఐ వద్ద జీప్ డ్రైవర్‌గా పనిచేస్తున్న హోంగార్డు అజయ్ కుమార్ తన ప్రవర్తనతో నెట్టింట వైరల్ అయ్యారు. హోంగార్డు అజయ్ కుమార్ ఓ మహిళతో కలిసి.. చిన్నారుల ఎదుట చేసిన అశ్లీల నృత్యం వీడియో నెట్టింట చక్కర్లు కొడుతోంది.

బాధ్యత గల శాఖలో ఉద్యోగం చేస్తూ.. బాధ్యత మరిచి ఇలా ప్రవర్తిస్తారా అంటూ నెటిజనం మండిపడుతున్నారు. ఎదురుగా చిన్నపిల్లలు ఉన్నారనే ఇంగితం మరిచి పోయి అసభ్యకరమైన నృత్యాలు చేయటంపై మండిపడుతున్నారు. మరోవైపు హోంగార్డు అశ్లీల నృత్యాల వీడియో వైరల్ కావటంతో.. విషయం పోలీస్ ఉన్నతాధికారుల వరకూ చేరింది. అజయ్ కుమార్ అశ్లీల నృత్యాలపై కృష్ణా జిల్లా ఎస్పీ విద్యాసాగర్ నాయుడు తీవ్ర ఆగ్రహం వ్యక్తం చేశారు. హోంగార్డు అజయ్‌ కుమార్‌ పిల్లల ముందు చేసిన అసభ్యకర నృత్యాలు సోషల్ మీడియాలో వైరల్ అయిన నేపథ్యంలో.. అజయ్ కుమార్‌ను విధుల నుంచి తప్పించారు. పోలీస్ శాఖ, పోలీసుల ప్రతిష్ఠను దెబ్బతీసేలా అజయ్ కుమార్ వ్యవహరించడం మీద ఎస్పీ విద్యాసాగర్ నాయుడు ఆగ్రహం వ్యక్తం చేసినట్లు సమాచారం.

హోంగార్డు అజయ్ కుమార్ అశ్లీల నృత్యాలపై సమగ్ర విచారణ జరిపాలని ఎస్పీ ఆదేశించారు. పూర్తిస్థాయిలో విచారణ జరిపిన అనంతరం.. నివేదిక సమర్పించాలని స్థానిక పోలీసులను కృష్ణా జిల్లా ఎస్పీ విద్యాసాగర్ నాయుడు ఆదేశించారు. పోలీస్ శాఖ ప్రతిష్టను మరింత పెంచేలా, ప్రజలలో పోలీసులపై నమ్మకం మరింత పెరిగేలా పోలీస్ సిబ్బంది నడుచుకోవాలని సిబ్బందికి ఎస్పీ సూచించారు.

పోలీస్ శాఖను అప్రతిష్ఠకు గురి చేసేలా ప్రవర్తించినవారిపై శాఖాపరమైన చర్యలు తీసుకుంటామని ఎస్పీ వార్నింగ్ ఇచ్చారు. మరోవైపు హోంగార్డు అజయ్ కుమార్ వ్యవహారంపై స్థానికుల నుంచి కూడా ఆగ్రహం వ్యక్తమవుతోంది. చదువుకునే పిల్లల ముందు ఇలాంటి పనులు చేసి ఎలాంటి సందేశం ఇస్తున్నారని మండిపడుతున్నారు.