ఢిల్లీ పేలుడు ఘటన,,,,సూట్‌కేస్ గురించి బయటపెట్టిన ముజామిల్ షేక్

నవంబరు 10న దేశ రాజధాని ఢిల్లీలోని ఎర్రకోట వద్ద పేలుడుకు పాల్పడిన ఆత్మాహుతి బాంబర్ డాక్టర్ ఉమర్ ఉన్ నబీకి సంబంధించి మరో విస్తుపోయే నిజం వెలుగులోకి వచ్చింది. ఉగ్రవాదం, పేలుళ్లకు ఉపయోగించే పరికరాలను తయారు చేసుకునేందుకు ఒక రహస్య ‘మొబైల్ వర్క్‌స్టేషన్’ అతడితో ఉండేదని ఫరీదాబాద్‌లో పట్టుబడిన ‘వైట్ కాలర్’ టెర్రర్ మాడ్యూల్ నిందితులు విచారణలో వెల్లడించారు. డాక్టర్ ఉమర్ ఫరీదాబాద్‌లోని అల్-ఫలాహ్ యూనివర్సిటీలోని తన గదిలోనే ఐఈడీ తయారీలో ఉపయోగించిన రసాయన మిశ్రమాన్ని చిన్నపరీక్షగా తయారు చేసి పరీక్షించాడని ముజామ్మిల్ షకీల్ విచారణలో బయటపెట్టాడని దర్యాప్తు అధికారులు పేర్కొన్నాయి.

ఉమర్ ఓ సూట్‌కేస్‌ను ‘మొబైల్ వర్క్‌స్టేషన్’‌గా మార్చుకుని, ఎక్కడకు వెళ్లినా దానిని తన వెంట తీసుకెళ్లేవాడని ఎన్ఐఏ వర్గాలు చెప్పాయి. అందులోనే బాంబు తయారీకి అవసరమైన రసాయనాలు, పరికరాలను స్టోర్ చేసినట్టు తెలిపాయి. అల్ ఫలాహ్ యూనివర్సిటీలోని తన గదిలో పేలుడు పదార్థాలు, రసాయనిక ప్రతిచర్యలను పరీక్షించినట్టు అరెస్టైన ఉగ్రవాద నిందితులు బయటపెట్టారు. అతడి సూట్‌కేసులో పోలీసులకు లభించిన బాంబు తయారీ సామాగ్రితో ఇది మరింత నిర్దారణ అయ్యింది. ఢిల్లీ పేలుడుకు సగం తయారుచేసిన ఐఈడీనే ఉమర్ వినియోగించినట్టు దర్యాప్తు అధికారులు తెలిపారు.

హర్యానాలోని అల్ ఫలాహ్ యూనివర్సిటీలో టెర్రర్ మాడ్యూల్ బయటపడి 2900 కిలోల అమ్మోనియం నైట్రేట్‌ను పోలీసులు, ఏటీఎస్ టీమ్‌లు స్వాధీనం చేసుకున్నారు. ఈ పరిణామాలతో తానూ కూడా దొరికిపోతాననే భయంతో డాక్టర్ ఉమర్ నబీ.. ఐ20 కారును నడుపుకుంటూ ఢిల్లీకి వచ్చి.. ఎర్రకోట సమీపంలో నవంబరు 10న ఆత్మాహుతి దాడికి పాల్పడ్డాడు. అయితే, హర్యానాలో దాచిపెట్టిన పదార్థాలను జమ్మూ కశ్మీర్‌కు తరలించి, అక్కడ ఏదో పెద్దదే ప్లాన్ చేశాడు. కానీ, అది సాధ్యపడకపోవడంతో ఐఈడీ తయారీకి ఉపయోగించే అమ్మోనియం నైట్రేట్‌ను నూహ్ నుంచి సేకరించాడని దర్యాప్తులో అధికారులు గుర్తించారు. ఢిల్లీ టెర్రర్ మాడ్యూల్ వెనుక పాకిస్థాన్ ఉగ్రవాద సంస్థ జైషే మొహమ్మద్ హస్తం ఉన్నట్టు స్ఫష్టంగా గుర్తించారు. దాంతో నేరుగా సంబంధాలున్న కశ్మీర్‌కు చెందిన మౌల్వీ ద్వారా ఈ టెర్రర్ మాడ్యూల్‌ను తయారుచేసింది.