WPL 2026 వేలంలో శ్రీ చరణిపై జాక్పాట్ బిడ్స్!
sports | Suryaa Desk | Published : Thu, Nov 27, 2025, 08:29 PM
వుమెన్స్ ప్రీమియర్ లీగ్ (డబ్ల్యూపీఎల్) 2026 మెగా వేలంలో టీమిండియా స్టార్ స్పిన్నర్, తెలుగు ప్రతిభ శ్రీ చరణి భారీ జాక్పాట్ దక్కించుకుంది. న్యూఢిల్లీ వేదికగా గురువారం నిర్వహించిన ఈ మెగా వేలంలో కడపకు చెందిన ఈ యువ బౌలర్ను ఢిల్లీ క్యాపిటల్స్ రూ.1.60 కోట్ల రికార్డ్ ధరకు దక్కించుకుంది.రూ.30 లక్షల బేస్ ప్రైస్తో వేలంలోకి వచ్చిన శ్రీ చరణి కోసం యూపీ వారియర్స్, ఢిల్లీ క్యాపిటల్స్ మధ్య గట్టి పోటీ నెలకొంది. చివరికి ఢిల్లీ మేనేజ్మెంట్ భారీ బిడ్తో ఆమెను తమ జట్టులోకి చేర్చుకుంది.గత సీజన్లో కూడా శ్రీ చరణి ఢిల్లీ కోసమే ప్రాతినిధ్యం వహించింది. ఆ సమయంలో ఆమెను రూ.50 లక్షలకు కొనుగోలు చేసిన ఢిల్లీ, ఈసారి ఆమె విలువను మూడు రెట్లు పెంచి తీసుకుంది. డబ్ల్యూపీఎల్ 2025లో రెండు మ్యాచ్లే ఆడినా, శ్రీ చరణి 4 వికెట్లు తీసి చురుకైన బౌలింగ్తో ఆకట్టుకుంది. ఇదే ప్రదర్శన ఆమెకు టీమిండియాలో స్థానం దక్కించడమే కాకుండా, మహిళల వన్డే ప్రపంచకప్కు ఎంపికవ్వడంలో కీలక పాత్ర పోషించింది.ప్రపంచకప్ టోర్నీలో 21 ఏళ్ల ఈ ఆంధ్రా లెఫ్టార్మ్ స్పిన్నర్ సెన్సేషన్గా నిలిచింది. 9 మ్యాచ్ల్లో 4.96 ఎకానమీ రేటుతో 14 వికెట్లు పడగొట్టి గొప్ప ఫామ్ కనబరిచింది. ఒక్క మ్యాచ్ మినహా ప్రతి మ్యాచ్లో వికెట్ సాధించి, ముఖ్యంగా సెమీస్, ఫైనల్లో కీలక బ్రేక్త్రూలు ఇస్తూ టీమిండియా విజయం వైపు నడిపింది. ఈ టోర్నీలో భారత తరఫున అత్యధిక వికెట్లు తీసిన రెండో బౌలర్గా నిలవడం ఆమె మార్కెట్ విలువను గణనీయంగా పెంచింది.డబ్ల్యూపీఎల్ చరిత్రలో ఇదే తొలి మెగా వేలం కావడం విశేషం. మల్లికా సాగర్ వేలంపాట నిర్వాహకురాలిగా వ్యవహరిస్తోంది. ఆస్ట్రేలియా స్టార్ అలీసా హీలీ పేరుతో వేలం ప్రారంభమైనప్పటికీ, ఏ జట్టు బిడ్ చేయకపోవడంతో ఆమె తొలి రౌండ్లోనే అన్సోల్డ్ అయింది. ఆమెను మరో రౌండ్లో మళ్లీ వేలానికి తీసుకొచ్చే అవకాశం ఉంది.ఇతర అంతర్జాతీయ ప్లేయర్లపై కూడా జట్లు ఆసక్తి చూపాయి. న్యూజిలాండ్ స్టార్ సోఫీ డివైన్ను గుజరాత్ జెయింట్స్ రూ.2 కోట్లకు కొనుగోలు చేయగా, కివీస్ ఆల్రౌండర్ అమెలియా కేర్ను ముంబై ఇండియన్స్ రూ.3 కోట్ల భారీ ధరకు దక్కించుకుంది. భారత పేసర్ రేణుకా సింగ్ను గుజరాత్ జెయింట్స్ రూ.60 లక్షలకు తీసుకోగా, ఇంగ్లండ్ బౌలర్ సోఫీ ఎక్లిస్టోన్ను యూపీ వారియర్స్ ఆర్టీఎమ్ కార్డ్తో రూ.85 లక్షలకు రిటైన్ చేసుకుంది. సౌతాఫ్రికా కెప్టెన్ లారా వొల్వార్ట్ను ఢిల్లీ క్యాపిటల్స్ రూ.1.10 కోట్లకు కొనుగోలు చేసింది.
|
|