దిత్వా తుఫాను ఎఫెక్ట్.. ఈ జిల్లాల్లో భారీ వర్షాలు

ఆంధ్రప్రదేశ్ ప్రజలకు ముఖ్య గమనిక. ఏపీకి దిత్వా తుఫాను ముప్పు పొంచి ఉంది. ఈ తుఫాను ప్రభావంతో ఏపీలోని కొన్ని జిల్లాల్లో శనివారం భారీ వర్షాలు కురుస్తాయని ఏపీ విపత్తుల నిర్వహణ సంస్థ హెచ్చరించింది. చిత్తూరు, తిరుపతి జిల్లాల్లో అక్కడక్కడా భారీ వర్షాలు కురిసేందుకు అవకాశం ఉందని ఏపీ విపత్తుల నిర్వహణ సంస్థ ఎండీ ప్రఖర్ జైన్ వెల్లడించారు. అలాగే ప్రకాశం, శ్రీపొట్టి శ్రీరాములు నెల్లూరు, వైఎస్సార్ కడప, అన్నమయ్య జిల్లాల్లో కొన్నిచోట్ల మోస్తరు నుంచి భారీ వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ తెలిపింది. అలాగే బాపట్ల, పల్నాడు, కర్నూలు, నంద్యాల జిల్లా, అనంతపురం, శ్రీసత్యసాయి జిల్లాల్లో కొన్నిచోట్స తేలికపాటి నుంచి మోస్తరు వర్షాలు కురిసే అవకాశం ఉందని అంచనా వేసింది. ఈ నేపథ్యంలో ప్రజలు అప్రమత్తంగా ఉండాలని సూచించింది. అలాగే రైతులు తగిన జాగ్రత్తలు తీసుకోవాలని ఏపీ విపత్తుల నిర్వహణ సంస్థ ఎండీ ప్రఖర్ జైన్ సూచించారు.

మరోవైపు దిత్వా తుఫాను నైరుతి బంగాళాఖాతం, దానికి ఆనుకుని ఉన్న శ్రీలంక తీరంలో నెమ్మదిగా కదులుతోంది. ఈ తుఫాను ఆదివారం తెల్లవారుజామునకు తీవ్రవాయుగుండంగా మారే అవకాశం ఉందని ఏపీ విపత్తుల నిర్వహణ సంస్థ అంచనా వేసింది. తీవ్రవాయుగుండంగా మారిన తర్వాత.. తమిళనాడు, పుదుచ్చేరి, దక్షిణకోస్తాంధ్ర తీరాలకు చేరుకునే అవకాశం ఉందని వెల్లడించింది. ఈ నేపథ్యంలో మత్య్సకారులు చేపలవేట కోసం మంగళవారం వరకు సముద్రంలోకి వెళ్లరాదని హెచ్చరించింది.

  మరోవైపు దిత్వా తుఫాను నేపథ్యంలో భారత వాతావరణ శాఖ ఆంధ్రప్రదేశ్ రాష్ట్రంతో పాటుగా తమిళనాడు, పశ్చిమబెంగాల్, ఒడిశా, కేరళ రాష్ట్రాలు సహా అండమాన్, నికోబార్‌, పుదుచ్చేరి, లక్షద్వీప్‌లను సైతం అప్రమత్తం చేసింది. దిత్వా తుఫాను ప్రభావంతో ఏపీలో మంగళవారం వరకు విస్తారంగా వర్షాలు కురుస్తాయని వెల్లడించింది. కొన్ని ప్రాంతాల్లో 20 సెం.మీ. కంటే అధిక వర్షపాతం నమోదయ్యే అవకాశం ఉందంటూ ఆదివారం కొన్ని జిల్లాలకు రెడ్ అలర్ట్ కూడా జారీ చేశారు.

అలాగే తుపాను ప్రభావంతో తీరం వెంబడి బలమైన ఈదురు గాలులు వీస్తాయన్న వాతావరణ శాఖ.. శని, ఆదివారాల్లో గాలుల తీవ్రత ఎక్కువగా ఉంటుందని అంచనా వేసింది. ఈ నేపథ్యంలో విశాఖ, మచిలీపట్నం పోర్టుల్లో అధికారులు రెండో నంబర్ ప్రమాద హెచ్చరిక జారీ చేశారు. మరోవైపు తుఫాను యెమెన్ దేశం ఈ దిత్వా పేరును సూచించింది. యెమెన్ లోని ఓ ప్రసిద్ధ సరస్సు పేరును తుఫానుకు నామకరణం చేశారు.