పెండింగ్ చలాన్లు క్లియర్ చేసుకోవడానికి ఇదే సూపర్ ఛాన్స్

వాహనాలపై పెండింగ్ ట్రాఫిక్ చలాన్లు ఉన్నవారికి మంచి అవకాశం. డిసెంబర్ 13న 4వ జాతీయ లోక్ అదాలత్ జరగనుంది. ఈ సందర్భంగా పెండింగ్ చలాన్లు, పెనాల్టీలను సెటిల్ చేసుకోవడానికి అవకాశం కల్పిస్తున్నారు. అంతేకాకుండా ఫైన్ లేదా పెనాల్టీల్లో 50 నుంచి 100 శాతం డిస్కౌంట్లు అందిస్తున్నారు. ఈ జాతీయ లోక్ అదాలత్‌లో.. సీటు బెల్టు ధరించకపోవడం, సిగ్నిల్ జంపింగ్ వంటి వాటిని సత్వరమే సెటిల్ చేసుకోవచ్చు. అయితే డ్రంక్ అండ్ డ్రైవింగ్, హిట్ అండ్ రన్, డేంజరస్ డ్రైవింగ్ వంటి.. ఇతరులకు హాని కలిగించిన కేసులను ఇక్కడ సెటిల్ చేసుకోవడానికి వీలు ఉండదు.

చలాన్లను సెటిల్ చేసుకోవాలనుకునేవారు.. తమ వాహనాలపై ఎంత పెండింగ్ చలాన్లు ఉన్నాయో తెలుసుకోవాలి. పరివాహన్ లేదా రాష్ట్ర వెబ్‌సైట్లలో ఆ సమాచారం ఉంటుంది. ఆ వివరాలు డౌన్‌లోడ్ చేసుకుని.. అవసరమైతే టోకెన్ కూడా తీసుకోవాల్సి ఉంటుంది.

ఈ ట్రాఫిక్ ఉల్లంఘనలకు పాల్పడితే..

సీట్ బెల్ట్ లేదా హెల్మెట్ లేకుండా డ్రైవింగ్

ట్రాఫిక్ సిగ్నల్స్ జంపింగ్

అతివేగం

తప్పుడు పార్కింగ్

చెల్లుబాటు అయ్యే PUC సర్టిఫికేట్ లేకుండా డ్రైవింగ్

లైసెన్స్ లేకుండా డ్రైవింగ్

నంబర్ ప్లేట్ లేకపోవడం లేదా వాహన ఫిట్‌నెస్ సర్టిఫికేట్ లేకపోవడం

పొరపాటుగా జారీ చేయబడిన చలాన్లు

ఏ రాష్ట్రాల్లో ఈ చలాన్లు కట్టుకోవచ్చు..

డిసెంబర్ 13 జరిగే ఈ జాతీయ లోక్ అదాలత్‌లో.. పైన పేర్కొన్న కొన్ని ట్రాఫిక్ ఉల్లంఘనలను పరిష్కరించుకోవచ్చు. ఢిల్లీ, హర్యానా, పంజాబ్, మహారాష్ట్ర, ఉత్తరప్రదేశ్, గుజరాత్, తమిళనాడు, తెలంగాణ, కర్ణాటక, రాజస్థాన్, పశ్చిమ బెంగాల్ రాష్ట్రాల్లో ప్రజలు దీన్ని వినియోగించుకోవచ్చు.

లోక్ అదాలత్‌లో ఎలా చెల్లించాలి?

లోక్ అదాలత్ రోజున.. చలాన్లు చెల్లించాలనుకునే వ్యక్తులు వారి ఆర్‌సీ, డ్రైవింగ్ లైసెన్స్, ఐడీ ప్రూఫ్, చలాన్ పత్రాలతో లోక్ అదాలత్ నిర్వహించే కోర్టును వెళ్లాలి. న్యాయమూర్తులు, ట్రాఫిక్ అధికారులు డిసౌంట్, చలాన్లు ఎంత చెల్లించాలో నిర్ణయిస్తారు. కొన్ని కేసుల్లో మొత్తం చాలాన్ల నుంచి పూర్తిగా మినహాయింపు ఇవ్వొచ్చు. ఒక వేళ టోకెన్ అవసరం అయితే.. NALSA వెబ్‌సైట్‌లో రిజిస్ట్రేషన్ చేసుకోవాల్సి ఉంటుంది. అందులో ఓ ఫామ్ ఫిల్ చేసి.. అవసరమైన డాక్యుమెంట్లు పొందుపర్చాలి. అనంతరం ఫోన్‌కి గానీ, మెయిల్‌కి గానీ ఒక టోకెన్ నంబర్ వస్తుంది. ఆ టోకెన్‌పై సమయం ఉంటుంది. ఆ సమయానికి పెండింగ్ చలాన్లను డౌన్‌లోడ్ చేసుకుని ప్రత్యక్షంగా లోక్ అదాలత్‌లో హాజరు కావాల్సి ఉంటుంది. న్యాయమూర్తులు, ట్రాఫిక్ అధికారులు నిర్ణయించిన మొత్తాన్ని క్యాష్ లేదా యూపీఐ ద్వారా చెల్లించిన తర్వాత.. సెటిల్‌మెంట్ ఆర్డర్ ఇస్తారు. అంటే మళ్లీ కేసు రీఓపెన్ చేయడానికి వీలులేకుండా ఆదేశాలు ఇస్తారన్నమాట.