మెంతులు.. ఆరోగ్యానికి అద్భుతం కానీ గర్భిణులకు ప్రమాద సంకేతం!

మెంతులు తెలుగు ఇంటి వంటల్లో దాదాపు తప్పనిసరి పదార్థం. జీర్ణక్రియ మెరుగుపరచడం, రక్తంలో చక్కెర స్థాయిని నియంత్రించడం, జుట్టు ఆరోగ్యం, చర్మ సౌందర్యం – ఇలా అనేక ఆయుర్వేద గుణాలకు ప్రసిద్ధి చెందిన ఈ చిన్న గింజలు రోజువారీ ఆహారంలో భాగమే. కానీ ఇటీవలి అధ్యయనాలు, నిపుణుల హెచ్చరికలు ఈ మెంతుల వాడకం గురించి కొత్త కోణాన్ని చూపుతున్నాయి.
గర్భిణీ స్త్రీలు మెంతులను అధికంగా తీసుకుంటే గర్భస్థ శిశువుపై ప్రతికూల ప్రభావం పడే అవకాశం ఉందని వైద్య నిపుణులు హెచ్చరిస్తున్నారు. ముఖ్యంగా మొదటి త్రైమాసంలో మెంతుల్లోని కొన్ని సమ్మేళనాలు గర్భాశయ సంకోచాలను ప్రేరేపించి అకాల గర్భస్రావం (miscarriage) రిస్క్‌ను పెంచుతాయని అనేక అధ్యయనాలు సూచిస్తున్నాయి. అంతేకాదు, అతి తక్కువ సందర్భాలలో అరుదైన జన్యు వ్యాధి అయిన మాపుల్ సిరప్ యూరిన్ డిసీజ్ (MSUD) బిడ్డకు వచ్చే ప్రమాదం కూడా లేదని అనిపించదు.
ఇక రొమ్ము క్యాన్సర్ ఉన్న లేదా రిస్క్‌లో ఉన్న మహిళల విషయంలో మెంతులు మరింత జాగ్రత్త అవసరం చేస్తాయి. మెంతుల్లో ఫైటోఈస్ట్రోజెన్స్ అనే సమ్మేళనాలు ఉంటాయి, ఇవి శరీరంలో ఈస్ట్రోజెన్ హార్మోన్‌ను అనుకరిస్తాయి. ఈస్ట్రోజెన్ రిసెప్టర్ పాజిటివ్ (ER-positive) రొమ్ము క్యాన్సర్ ఉన్నవారిలో ఈ గింజలు కణితుల పెరుగుదలను వేగవంతం చేసే అవకాశం ఉందని ఆంకాలజిస్టులు హెచ్చరిస్తున్నారు.
కాబట్టి మెంతులను “సూపర్ ఫుడ్”గా భావించి అనుమానం లేకుండా ఎక్కువ మోతాదులో తీసుకోవడం సురక్షితం కాదు. ముఖ్యంగా గర్భిణీలు, స్తన క్యాన్సర్ చరిత్ర ఉన్నవారు, హార్మోన్ సంబంధిత సమస్యలు ఉన్నవారు తప్పనిసరిగా వైద్యుడి సలహా తీసుకుని, మోతాదును నిర్ణయించుకోవాలి. ఆరోగ్యం కోసం అని తీసుకున్న మందు తిరిగి హాని చేయకూడదు కదా!