పెళ్లైన మూడు రోజులకే విడాకులు తీసుకున్న భార్య

పెళ్లైన ఆరు నెలలు, ఏడాది, కొన్ని సంవత్సరాల తర్వాత.. భార్యాభర్తలు విడాకులు తీసుకోవడం గురించి మనం విన్నాం. ముఖ్యంగా వారిద్దరి మధ్య పొసగక, సమస్యలు రావడం వల్ల వారు ఇలాంటి కఠిన నిర్ణయాలు తీసుకుంటూ ఉంటారు. కానీ మనం ఇప్పుడు చూడబోయే ఓ జంట మాత్రం పెళ్లైన 72 గంటలకు విడాకులు తీసుకోవాలనుకుంది. ముఖ్యంగా భర్త చెప్పిన ఒక్క మాటతో.. నవ వధువు తమ వివాహ బంధాన్ని తెంచుకోవాలనుకుంది. మరి ఆమె అంతటి నిర్ణయం తీసుకునేంతలా చేసిన, భర్త చెప్పిన మాట ఏంటి? ఆ కథేంటో మనం ఇప్పుడు తెలుసుకుందాం పదండి.

అసలేం జరిగిందంటే?

ఉత్తర ప్రదేశ్‌లోని గోరఖ్‌పూర్‌కు చెందిన ఓ అమ్మాయి, అబ్బాయికి నవంబర్ 28వ తేదీన వివాహం జరిగింది. అయితే డిసెంబర్ 1వ తేదీనే వధువు తండ్రి.. వరుడి ఇంటికి వెళ్లి విడాకులు ఇవ్వమని కోరాడు. తన కుమార్తె విడాకులు తీసుకోవాలనుకుంటున్నట్లు చెప్పగా.. వరుడి కుటుంబ సభ్యులు షాక్ అయ్యారు. అసలు ఏం జరిగిందంటూ ఆరా తీశారు. అప్పుడే నవ వధువు వచ్చి.. 25 ఏళ్ల వరుడు పెళ్లిరోజు రాత్రే తాను వైవాహిక బంధానికి పనికి రానని చెప్పినట్లుగా తెలిపింది. అందుకే తాను విడాకులు తీసుకోవాలనుకుంటున్నట్లు వివరించింది. శారీరకంగా అసమర్థుడైన వ్యక్తితో తాను జీవితాన్ని గడపలేనని స్పష్టం చేసింది.

అయితే రైతు కుటుంబానికి చెందిన వరుడు.. గోరఖ్‌పూర్ పారిశ్రామిక వాడలోని ఒక కంపెనీలో ఇంజినీర్‌గా పని చేస్తుండగా.. వీరి వివాహాన్ని బెలియాపార్‌కు చెందిన బంధువులు కుదిర్చారు. ఈ వరుడికి ఇది రెండో పెళ్లి. కానీ ఈ విషయం తెలియని కుటుంబం ఇతడితో పెళ్లి చేసింది. మొదటి భార్య కూడా అతడు వైవాహిక బంధానికి పనికిరాడనే విడిచిపెట్టి వెళ్లిపోయినట్లు అమ్మాయి తల్లిదండ్రులు, బంధువులు ఆరోపించారు. వరుడి కుటుంబం కావాలనే అతడి శారీరక పరిస్థితిని దాచిపెట్టినట్లు ఆరోపించారు.

ఇలా ఈ వివాదం ముదరడంతో.. రెండు కుటుంబాల అంగీకారంతో వరుడికి ప్రైవేట్ ఆసుపత్రిలో వైద్య పరీక్షలు నిర్వహించారు. ఈ పరీక్షల్లో వరుడు వైవాహిక బంధానికి మెడికల్‌గా అన్‌ఫిట్‌గా ఉన్నట్లు రిపోర్టులో నిర్ధారణ కావడంతో.. వధువు తండ్రి ఆమెను తన ఇంటికి తీసుకెళ్లారు. ఆపై వరుడి ఇంటికి లీగల్ నోటీసులు పంపి.. పెళ్లికి పెట్టిన కట్నం, ఖర్చులు, బహుమతులు అన్నీ తిరిగి ఇచ్చేయాలని డిమాండ్ చేశారు. కానీ వరుడి కుటుంబం వాళ్లు ఇందుకు ఒప్పుకోలేదు. దీంతో వధువు కుటుంబ సభ్యులు పోలీసులను ఆశ్రయించారు.

రెండు కుటుంబాలను పిలిపించి మాట్లాడిన పోలీసులు.. వారి మధ్య ఒప్పందం కుదిర్చారు. ముఖ్యంగా పెళ్లికి అయిన ఏడు లక్షల రూపాయల ఖర్చుతో పాటు ఇచ్చిన గిఫ్ట్‌లు అన్నీ నెల రోజుల్లోగా తిరిగి ఇచ్చేయాలని చెప్పారు. ఇందుకు ఇరు కుటుంబాలు అంగీకరించాయి. బంధువుల సమక్షంలోనే ఇందుకు సంబంధించిన ఒప్పందం కూడా చేసుకున్నారు. అయితే పెళ్లైన 72 గంటల్లోనే విడాకులు కావడం స్థానికంగా సంచలనం సృష్టించింది.