ఈ బ్యాంకులకు కొత్త లోగో.. ఇక ఒకే గుర్తింపు, ఒకే బ్రాండ్

దేశవ్యాప్తంగా ఉన్న ప్రాంతీయ గ్రామీణ బ్యాంకులకు ఒకే విధమైన గుర్తింపును ఇచ్చే దిశగా కేంద్ర ప్రభుత్వం కీలక అడుగు వేసింది. దేశవ్యాప్తంగా ఉన్న అన్ని ఆర్ఆర్‌బీల కోసం ఒకే రకమైన ఉమ్మడి లోగోను కేంద్ర ఆర్థిక మంత్రిత్వ శాఖ గురువారం డిసెంబర్ 18, 2025 రోజున ఆవిష్కరించింది. ఈ చర్య ద్వారా గ్రామీణ బ్యాంకింగ్ వ్యవస్థలో పారదర్శకతను పెంచడంతో పాటు, ఒకే బ్రాండ్ గుర్తింపును తీసుకురావాలని ప్రభుత్వం లక్ష్యంగా పెట్టుకుంది.

ఒక రాష్ట్రం - ఒక గ్రామీణ బ్యాంకు

ఈ నూతన లోగో ఆవిష్కరణ కేంద్ర ప్రభుత్వం చేపట్టిన భారీ విలీన ప్రక్రియలో ఒక భాగం. 'వన్ స్టేట్ వన్ ఆర్ఆర్‌బీ' సూత్రం ఆధారంగా ఆర్థిక సేవల విభాగం ఇప్పటికే 11 రాష్ట్రాలు, కేంద్రపాలిత ప్రాంతాల్లోని 26 ప్రాంతీయ గ్రామీణ బ్యాంకులను విలీనం చేసింది. ఈ సంస్కరణలు మే 1, 2025 నుంచి అమలులోకి వచ్చాయి. ఈ విలీనం తర్వాత, ప్రస్తుతం దేశంలో 28 ప్రాంతీయ గ్రామీణ బ్యాంకులు పని చేస్తున్నాయి. ఇవి 700కు పైగా జిల్లాల్లోని సుమారు 22,000 శాఖల ద్వారా సేవలందిస్తున్నాయి.

 కొత్తగా ఆవిష్కరించిన లోగోలో మూడు ప్రధాన అంశాలు ఉన్నాయి, ఇవి గ్రామీణ అభివృద్ధి పట్ల బ్యాంకుల నిబద్ధతను తెలియజేస్తాయి. పైకి చూపిస్తున్న బాణం, ఇది ప్రగతికి చిహ్నం. గ్రామీణ ఆర్థిక వ్యవస్థల వృద్ధి, అభివృద్ధిని ఇది సూచిస్తుంది. చేతులు, ఇవి ఆప్యాయత, భద్రతకు చిహ్నం. గ్రామీణ వర్గాలకు మద్దతుగా నిలుస్తూ, వారికి అండగా ఉంటామని ఈ గుర్తు ప్రతిబింబిస్తుంది. జ్వాల, ఇది జ్ఞానం, సాధికారతకు చిహ్నం. గ్రామీణ ప్రజలకు ఆర్థిక అక్షరాస్యతను అందిస్తూ వారిని చైతన్యవంతులను చేయడమే దీని ఉద్దేశం.

లోగోలో ఉపయోగించిన రంగులు కూడా ప్రత్యేక అర్థాలను కలిగి ఉన్నాయి. ముదురు నీలం ఇది ఆర్థిక స్థిరత్వం, నమ్మకానికి చిహ్నం. ఆకుపచ్చ ఇది జీవం, గ్రామీణ వృద్ధికి సంకేతం. 'ఈ ఉమ్మడి బ్రాండింగ్ చొరవ ద్వారా ఆర్‌ఆర్‌బీలకు దేశవ్యాప్తంగా ఒక ఆధునిక, సులభంగా గుర్తించదగిన గుర్తింపు లభిస్తుంది' అని ఆర్థిక మంత్రిత్వ శాఖ ఒక ప్రకటనలో తెలిపింది. ఆర్థిక సమ్మిళితం, గ్రామీణాభివృద్ధి పట్ల ఈ బ్యాంకుల సామూహిక నిబద్ధతకు ఈ లోగో ఒక సంకేతంగా నిలుస్తుంది. ఈ మార్పు వల్ల గ్రామీణ ప్రాంతాల్లో బ్యాంకింగ్ సేవలపై ప్రజల్లో విశ్వసనీయత మరింత పెరుగుతుందని ప్రభుత్వం భావిస్తోంది.