చార్జింగ్ కేబుల్స్‌పై ఆ బుడిపె ఎందుకు ఉంటుందో తెలుసా? దాని వెనుక ఉన్న అసలు రహస్యం ఇదే!

చాలామంది తమ ల్యాప్‌టాప్ లేదా మొబైల్ చార్జింగ్ కేబుల్స్‌పై చివరన ఒక చిన్న బుడిపె లాంటి నిర్మాణాన్ని గమనించే ఉంటారు. దీనిని చూసి చాలామంది అది ఒక ఫ్యూజ్ అని లేదా కేబుల్ డిజైన్ కోసం పెట్టిన అలంకారం అని పొరబడుతుంటారు. కానీ సాంకేతిక భాషలో దీనిని 'ఫెర్రైట్ బీడ్' (Ferrite Bead) అని పిలుస్తారు. ఇది కేవలం ప్లాస్టిక్ ముక్క కాదు, ఎలక్ట్రానిక్ పరికరాలు సరిగ్గా పనిచేయడంలో ఇది అత్యంత కీలకమైన పాత్రను పోషిస్తుంది.
సాధారణంగా ఏదైనా వైర్ గుండా విద్యుత్ ప్రవహిస్తున్నప్పుడు, ఆ కేబుల్ ఒక అన్-టెన్నాలా (Antenna) మారిపోతుంది. దీనివల్ల అది సమీపంలోని రేడియో తరంగాలను లేదా ఇతర ఎలక్ట్రానిక్ సిగ్నల్స్‌ను అనవసరంగా రిసీవ్ చేసుకుంటుంది. ఇలాంటి అవాంఛనీయ సిగ్నల్స్ వల్ల డివైజ్‌లో అంతరాయం కలగడమే కాకుండా, చార్జింగ్ ప్రక్రియలో కూడా ఇబ్బందులు ఎదురవుతాయి. ఈ ఫెర్రైట్ బీడ్ ఆ అనవసర రేడియో ఫ్రీక్వెన్సీ ఇంటర్‌ఫిరెన్స్‌ను (RFI) అడ్డుకుని, డివైజ్‌కు రక్షణగా నిలుస్తుంది.
ఈ బుడిపె లోపల మాంగనీస్, జింక్ ఆక్సైడ్‌లతో తయారైన ఒక అయస్కాంత పదార్థం ఉంటుంది. ఇది కేబుల్ ద్వారా ప్రవహించే విద్యుత్తులో వచ్చే హై-ఫ్రీక్వెన్సీ నాయిస్‌ను గ్రహించి, దానిని ఉష్ణ శక్తిగా మార్చి బయటకు పంపేస్తుంది. దీనివల్ల మీ ఫోన్ లేదా ల్యాప్‌టాప్ నుంచి వచ్చే సిగ్నల్స్ బయటకు వెళ్లి పక్కన ఉన్న టీవీలు, రేడియోలు లేదా ఇతర ఎలక్ట్రానిక్ పరికరాల్లో డిస్టర్బెన్స్ (Static) కలిగించకుండా ఉంటాయి. ఒక రకంగా ఇది విద్యుత్ ప్రవాహాన్ని శుద్ధి చేసే 'ఫిల్టర్' లాగా పనిచేస్తుంది.
చివరగా, డేటా ట్రాన్స్‌ఫర్ చేసే సమయంలో కూడా ఈ ఫెర్రైట్ బీడ్ చాలా ఉపయోగపడుతుంది. కేబుల్ ద్వారా సమాచారం ఒక చోటు నుండి మరొక చోటుకు వెళ్తున్నప్పుడు, బయటి సిగ్నల్స్ వల్ల డేటా ప్యాకెట్లు మిస్ కాకుండా ఇది చూస్తుంది. దీనివల్ల డేటా వేగంగా, ఎలాంటి లోపాలు లేకుండా అవతలి డివైజ్‌కు చేరుతుంది. అందుకే నాణ్యమైన చార్జింగ్ కేబుల్స్‌లో ఈ బుడిపె తప్పనిసరిగా ఉంటుంది, ఇది మీ గ్యాడ్జెట్స్ యొక్క పనితీరును మెరుగుపరుస్తుంది.