బరువు తగ్గించే క్రిస్పీ ఓట్స్ బీట్‌రూట్ దోశ నిమిషాల్లో రెడీ

ఈ రోజుల్లో చెడు జీవనశైలి, తిండి అలవాట్లు కారణంగా చాలా సమస్యలు ఎదుర్కొంటున్నారు. ముఖ్యంగా చాలా మంది అధిక బరువు, ఊబకాయం సమస్యలతో బాధపడుతున్నారు. ఇక, ఒకసారి బరువు పెరిగితే తగ్గడం చాలా కష్టం. బరువు తగ్గడానికి చాలా మంది అనేక ప్రయత్నాలు చేస్తున్నారు. కొందరు జిమ్‌లు చుట్టూ తిరిగితే.. మరికొందరు తిండిలో మార్పులు చేసుకుంటున్నారు.

బరువు తగ్గడానికి జిమ్‌లో వ్యాయామం ఎంత ముఖ్యమో తినే ఆహారం కూడా అంతే ముఖ్యం. ఆహారంలో తక్కువ కేలరీలు ఉండేలా చూసుకోవాలి. ఇక, రోజంతా ఉత్సాహంగా ఉండటానికి ఉదయం పూట బ్రేక్‌ఫాస్ట్ చాలా ముఖ్యం. అయితే, బరువు తగ్గాలనుకునేవారు చాలా భయపడుతుంటారు. ఏది తింటే బరువు పెరుగుతామో అన్న ఆందోళన వారిలో ఉంటుంది.

అయితే ఇంట్లోనే రుచికి రుచికి, ఆరోగ్యానికి ఆరోగ్యం అందించే రెసిపీలు చేసుకోవచ్చు. అలాంటి రెసిపీ గురించి ఇప్పుడు మనం చెప్పుకోబోతున్నాం. అదే క్రిస్పీ ఓట్స్ బీట్‌రూట్ దోశ. ఇందులో చాలా కేలరీలు తక్కువగా ఉంటాయి. ఇందులో వాడే ఓట్స్, బీట్‌రూట్ ఆరోగ్యానికి ఎంతో మేలు చేస్తాయి. మరి, క్రిస్పీ ఓట్స్ బీట్‌రూట్ దోశ ఎలా చేసుకోవాలో ఓ లుక్కేద్దాం. 

కావాల్సిన పదార్థాలు

1/2 కప్పు ఓట్స్

1/2 కప్పు కడిగిన కంది పప్పు

1/2 బీట్‌రూట్ (పచ్చిది లేదా ఉడకబెట్టింది అయినా తీసుకోవచ్చు)

2 పచ్చిమిర్చి

1/2 అంగుళాల అల్లం

1 టీస్పూన్ జీలకర్ర

రుచికి సరిపడా ఉప్పు

అవసరమైనంత నీరు

నెయ్యి లేదా నూనె

క్రిస్పీ ఓట్స్‌ బీట్‌రూట్ దోశ రెసిపీ

తయారీ విధానం

దీని కోసం ముందుగా ఎర్ర కందిపప్పు నీటితో కడగండి. ఆ తర్వాత మిక్సీ జార్ తీసుకోండి. మిక్సీ జార్‌లో ఓట్స్, కందిపప్పు, బీట్‌రూట్, పచ్చిమిర్చి, అల్లం, జీలకర్ర, ఉప్పు, అవసరమైనంత నీరు వేయండి. ఇప్పుడు మెత్తటి పిండి అయ్యేలా బ్లైండ్ చేసుకోండి. ఈ పిండి మెత్తగా నీళ్లలా ఉండకూడదని గుర్తించుకోండి. కాస్త బరక బరకగా ఉంటే దోశలు క్రిస్పీగా వస్తాయి. ఈ పిండిని కాసేపు పక్కన పెట్టుకోండి. ఇప్పుడు పొయ్యి మీద పెనం పెట్టుకుని దోసెలు వేసుకోండి. ఇందుకోసం నూనె లేదా నెయ్యి వాడుకోవచ్చు. ఏదైనా కాస్తా వాడితేనే మంచిది.

క్రిస్పీ ఓట్స్ బీట్‌రూట్ దోశతో ప్రయోజనాలు

ఈ దోశలో కేలరీలు చాలా తక్కువగా ఉంటాయి. ఇందులో ఫైబర్ చాలా ఎక్కువగా ఉంటుంది. ప్రోటీన్ మితంగా ఉంటుంది. కొవ్వు తక్కువగా ఉంటుంది. దీన్ని తినడం వల్ల కడుపు ఎక్కువసేపు నిండుగా ఉంటుంది. దీనివల్ల పదే పదే ఏదైనా తినాలని అనిపించదు.

ఈ ఓట్స్ బీట్‌రూట్ దోశ బరువు తగ్గడానికి సాయపడటమే కాకుండా కండరాల నిర్వహణ,పెరుగుదలకు కూడా సాయపడుతుంది. నడక, యోగా లేదా తేలికపాటి వ్యాయామం చేసే వారికి ఇది బెస్ట్ బ్రేక్‌ఫాస్ట్ ఆప్షన్. దీని అర్థం మీరు ఆరోగ్యం, ఫిట్‌నెస్ రెండింటి ప్రయోజనం పొందుతారు.

అంతేకాకుండా ఈ దోశ రుచి కూడా చాలా భిన్నంగా ఉంటుంది. బీట్‌రూట్ లైట్ తీపి, ఓట్స్ టేస్ట్ కలిసి మీ నోటికి సరికొత్త అనుభూతి లభిస్తుంది. బరువు తగ్గాలనుకునే వారికి ఈ దోశ ఒక తెలివైన ఎంపిక. ఇది కడుపును నిండుగా ఉంచుతుంది. ఆకలిని నియంత్రిస్తుంది. మనసును సంతృప్తికరంగా ఉంచుతుంది.

ఈ దోసెను కొబ్బరి చట్నీ లేదా సాంబార్‌తో కలిపి తింటే ప్రయోజనకరంగా ఉంటుంది. ఈ దోశలో కావాలనుకుంటే ఇంట్లో మసాలా చేసి పెట్టుకోవచ్చు. దీన్ని పిల్లలు కూడా ఇష్టంగా తింటారు. సాధారణంగా పిల్లలు బీట్‌రూట్ తినడానికి ఇష్టపడరు. బీట్‌రూట్‌ను దోశ రూపంలో ఇస్తే వారికి కావాల్సిన పోషకాలు అందుతాయి.