అస్సాంలో బంగ్లాదేశ్ మూలాలున్న ముస్లింల సంఖ్య విపరీతంగా పెరుగుతోంది

 అస్సాం ముఖ్యమంత్రి హిమంత బిశ్వ శర్మ రాష్ట్రంలోని జనాభా మార్పులపై మరోసారి సంచలన వ్యాఖ్యలు చేశారు. బంగ్లాదేశ్ మూలాలు ఉన్న ముస్లింల జనాభా అస్సాంలో అసాధారణ రీతిలో పెరుగుతోందని.. ఇది రాష్ట్ర అస్తిత్వానికే ముప్పుగా పరిణమించబోతోందని ఆయన ఆందోళన వ్యక్తం చేశారు. గౌహతిలో శనివారం ప్రారంభమైన రెండు రోజుల బీజేపీ రాష్ట్ర కార్యవర్గ సమావేశంలో ప్రసంగిస్తూ ఆయన ఈ గణాంకాలను వెల్లడించారు.

హిమంత బిశ్వ శర్మ తన ప్రసంగంలో గత సెన్సస్ వివరాలను ప్రస్తావిస్తూ భవిష్యత్తు పరిణామాలను వివరించారు. 2011 జనాభా లెక్కల ప్రకారం అస్సాంలో ముస్లిం జనాభా 34 శాతం ఉంది. ఇందులో అస్సాం మూలాలున్న ముస్లింలను (3 శాతం) మినహాయిస్తే.. బంగ్లాదేశ్ మూలాలున్న ముస్లింల వాటా 31 శాతంగా ఉంది. 2021లో జరగాల్సిన జనాభా గణన వాయిదా పడింది. అయితే 2027లో కొత్త సెన్సస్ నివేదిక వచ్చే సమయానికి బంగ్లాదేశ్ మూలాలు ఉన్న ముస్లింల జనాభా ఏకంగా 40 శాతానికి చేరుకుంటుందని సీఎం అంచనా వేశారు.

గతంలో కూడా ఆయన ఈ అంశంపై మాట్లాడుతూ.. ముస్లిం వలసదారుల సంఖ్య మరో 10 శాతం పెరిగితే అస్సాం భవిష్యత్తులో బంగ్లాదేశ్‌లో భాగమైనా ఆశ్చర్యపోనక్కర్లేదని తీవ్రంగా వ్యాఖ్యానించారు. అస్సాంలో గత ప్రభుత్వాలు కొన్ని వర్గాల ఓటు బ్యాంకు రాజకీయాల కోసం చరిత్రను వక్రీకరించాయని హిమంత ఆరోపించారు. "శంకర్-అజాన్ దేశం" అనే నినాదం ఒక కృత్రిమంగా సృష్టించిన కథనమని ఆయన మండిపడ్డారు. "మేము చిన్నప్పటి నుంచి శంకర్-మాధవ్ (శంకర్‌దేవ, మాధవదేవ) గురించి విన్నాము. కానీ ఈ శంకర్-అజాన్ అనే మాట గత ప్రభుత్వాలు బలవంతంగా మన మెదడుల్లోకి ఎక్కించాయి" అని ఆయన పేర్కొన్నారు.

అజాన్ ఫకీర్ అనే వ్యక్తి ఉన్నప్పటికీ.. ఆయనకు మహాపురుష శంకర్‌దేవతో ఎలాంటి సంబంధం లేదని స్పష్టం చేశారు. అలాగే అస్సాం వీరుడు లాచిత్ బోర్ఫుకాన్ పేరును బాగ్ హజారికాతో ముడి పెట్టడాన్ని కూడా ఆయన తప్పుబట్టారు. అస్సాం చరిత్రలో అసలు బాగ్ హజారికా అనే ప్రస్తావనే లేదని.. తుష్టికరణ రాజకీయాల కోసమే ఇలాంటి అబద్ధపు కథనాలను ప్రచారం చేశారని ఆయన ధ్వజమెత్తారు. అస్సాం అస్తిత్వం, సంస్కృతి, భౌగోళిక సమతుల్యతను కాపాడుకోవడానికి జనాభా నియంత్రణ, చొరబాటుదారుల గుర్తింపు అత్యవసరమని హిమంత బిశ్వ శర్మ ఈ సమావేశంలో నొక్కి చెప్పారు. 2027 సెన్సస్ నివేదిక అస్సాం రాజకీయ భవిష్యత్తును నిర్ణయించడంలో కీలక పాత్ర పోషిస్తుందని ఆయన విశ్లేషించారు.