ఓ చిన్న పిప్పలి ముక్క చాలు,,,,మీ కడుపంతా క్లియర్

శీతాకాలం పీక్ స్టేజీకి చేరుకుంది. రోజు రోజుకి ఉష్ణోగ్రతలు పడిపోతున్నాయి. చలికాలంలో ఎన్నో వ్యాధులు చుట్టుముడతాయి. ముఖ్యంగా జలుబు, దగ్గు, గొంతులో కఫం, ఛాతీలో కఫం, మలబద్ధకం సమస్యలు తీవ్రంగా ఉంటాయి. వీటిని వదిలించుకోవడం చాలా కష్టం. వీటిని తగ్గించడానికి చాలా మంది అనేక ప్రయత్నాలు చేస్తుంటారు. కొందరు మెడిసిన్ వాడితే.. మరికొందరు నాటు వైద్యాన్ని నమ్ముకుంటారు.

అయితే, వీటికి చక్కటి పరిష్కారం ఒకటి ఉంది. అదే పిప్పలి. ఒకప్పుడు పిప్పలికి ఉన్న ప్రాధాన్యత అంతా ఇంతా కాదు. పిప్పలికి ఆయుర్వేదంలో ఎంతో ప్రాముఖ్యత ఉంది. దీనిని పొడుగ్గా ఉన్న నల్ల మిరియాలతో పోలుస్తారు. ఆయుర్వేదంలో పిప్పలిని ఔషధ గుణాల నిధిగా పరిగణిస్తారు. ఇది రుచి, ప్రభావంలో చాలా శక్తివంతమైన మసాలాగా పరిగణిస్తారు.

పురాతన వైద్య గ్రంథాలు పిప్పలిని జీర్ణక్రియ, శ్వాసక్రియ, రోగనిరోధక వ్యవస్థ బలపేతం చేసే శక్తిగా అభివర్ణిస్తారు. శీతాకాలంలో పిప్పలిని తీసుకోవడం ఎంతో ప్రయోజకరంగా ఉంటుంది. ఈ విషయాన్ని ప్రముఖ ఆయుర్వేద డాక్టర్ మనీషా మిశ్రా ఎమ్‌డి తన ఇన్‌స్టాగ్రామ్ ఖాతాలో షేర్ చేశారు. డాక్టర్ మనీషా పిప్పలి ఆయుర్వేద ప్రయోజనాలు, ఎలా తీసుకోవాలో చెప్పారు. ఆ పూర్తి వివరాలపై ఓ లుక్కేద్దాం.

మలబద్ధకాన్ని ఎలా తగ్గిస్తుంది?

ఈ రోజుల్లో చాలా మంది మలబద్దకంతో బాధపడుతున్నారు. ఇక చలికాలంలో మలబద్ధక సమస్య తీవ్రంగా ఉంటుంది. మలవిసర్జన సాఫీగా జరగదు. కడుపులో గందరగోళంగా ఉంటుంది. అయితే పిప్పలిలో ఉండే లక్షణాలు మలబద్దకాన్ని తగ్గించడంలో సాయపడతాయని డాక్టర్ అంటున్నారు.

వాస్తవానికి, ఈ మూలిక జీర్ణ కారకంగా పనిచేస్తుంది. ఆహారాన్ని సరిగ్గా జీర్ణం చేయడానికి సాయపడుతుంది. ఇది పేగు కదలికల్ని సులభతరం చేస్తుంది. దీంతో మలబద్ధకం నుంచి ఉపశమనం లభిస్తుంది. మలవిసర్జన సాఫీగా జరిగేలా ప్రోత్సహిస్తుంది.

జీర్ణక్రియను మెరుగుపరుస్తుంది

పిప్పలి మలబద్ధకంతో పాటు గ్యాస్, అజీర్ణం వంటి సమస్యలకు చెక్ పెడుతుంది. ఇది జీర్ణక్రియను మెరుగుపర్చడంలో చాలా ప్రభావవంతంగా పనిచేస్తుంది. ఇది జీర్ణ ఎంజైమ్‌లను సక్రియం చేస్తుంది. మెరుగైన జీర్ణక్రియను ప్రోత్సహిస్తుంది.

పిప్పలి యొక్క అతిపెద్ద ప్రత్యేకత ఏంటంటే.. ఇది గ్యాస్ట్రిక్ అగ్నిని పెంచుతుంది. దీంతో జీర్ణక్రియ మెరుగుపడి.. ఆకలి పెరుగుతుంది. భోజనానికి ముందు నెయ్యితో చిటికెడు పిప్పలి పొడిని తీసుకోవడం వల్ల అజీర్ణం, గ్యాస్ వంటి సమస్యల నుంచి రిలీఫ్ లభిస్తుంది.

దగ్గు, జలుబు, కఫానికి చెక్ పెడుతుంది

చలికాలంలో వచ్చిందంటే చాలు చాలా మంది జలుబు, దగ్గు, గొంతులో కఫం వంటి సమస్యలతో బాధపడతారు. ఈ సమస్యలకు పిప్పలి చక్కటి పరిష్కారం. పిప్పలికి వేడినిచ్చే ప్రభావం ఉంటుంది. దీంతో ఇది కఫాన్ని కరిగించడంలో సాయపడుతుంది.

దీర్ఘకాలిక దగ్గు, శ్లేష్మం పేరుకుపోవడం. తరచుగా జలుబు వంటి సమస్యలకు చికిత్స అందించడంలో పిప్పలి ప్రభావవంతంగా ఉంటుంది. ఆయుర్వేదంలో ఇది శ్వాసకోసం వ్యవస్థను బలోపేతం చేసే మూలికగా పరిగణిస్తారు. మారుతున్న సీజన్లకు దగ్గుతో బాధపడేవారికి ఇది ప్రత్యేకంగా సాయపడతుందని డాక్టర్ అంటున్నారు.

ఇంకా ఎన్నో ప్రయోజనాలు ఉన్నాయి

​రోగనిరోధక శక్తిని పెంచుతుంది: పిప్పలిలో యాంటీ బాక్టీరియల్, యాంటీఆక్సిడెంట్ లక్షణాలు పుష్కలంగా ఉన్నాయి. ఇవి శరీరాన్ని ఇన్ఫెక్షన్ల నుంచి రక్షిస్తాయి. అంతేకాకుండా రోగనిరోధక శక్తిని బలపేతం చేస్తాయి.

బరువు తగ్గడం: పిప్పలి శరీర జీవక్రియను వేగవంతం చేస్తుంది. ఇది కేలరీల బర్నింగ్ ప్రక్రియను మెరుగుపరుస్తుంది. బరువు తగ్గడంలో సాయపడుతుంది.

కీళ్లు, కండరాల నొప్పి నుంచి రిలీఫ్: పిప్పలిలో యాంటీ ఇన్ఫ్లమేటరీ లక్షణాలు ఉంటాయి. దీని శోథ నిరోధక లక్షణాలు శరీరంలో మంటను తగ్గిస్తాయి. దీంతో, కీళ్ళ నొప్పి నుంచి రిలీఫ్ లభిస్తుంది.

కాలేయ పనితీరును పెంచుతుంది: పిప్పలి కాలేయాన్ని నిర్విషీకరణ చేస్తుంది. టాక్సిన్లు తొలగించడంలో సాయపడుతుంది. కాలేయ పనితీరును మెరుగుపరుస్తుంది.

ఎలా తీసుకోవాలి?

పిప్పలిని చూర్ణం చేసి తీసుకోవచ్చు. పిప్పలిని పొడి రూపంలో తీసుకోవచ్చు. పిప్పలి పొడి మార్కెట్లలో లభిస్తుంది. ఒక అర చెంచా పిప్పలి పొడిని పాలు లేదా గోరువెచ్చని నీటిలో తీసుకోవచ్చు. పిప్పలి పొడిని లేదా పిప్పలిని తేనెతో కలిపి తీసుకోవచ్చు. బెల్లంతో కూడా కలిపి తీసుకోవచ్చని డాక్టర్ అంటున్నారు.

భోజనానికి ముందు నెయ్యితో చిటికెడు పిప్పలి పొడిని తీసుకోవడం వల్ల అజీర్ణం, గ్యాస్ వంటి సమస్యల నుంచి రిలీఫ్ లభిస్తుంది. అయితే, ఒక విషయం గుర్తించుకోవాలి. అధికంగా తీసుకుంటే సైడ్ ఎఫెక్ట్స్ రావచ్చు. తక్కువ మోతాదులో తీసుకుంటే మంచిది. ఏదైనా దీర్ఘకాలిక వ్యాధులతో బాధపడేవారు వైద్యుణ్ని సంప్రదించి తీసుకోవడం మేలు.