నేడు తిరుమలలో ప్రారంభం కానున్న వైకుంఠ ఏకాదశి ఉత్సవాలు
Andhra Pradesh Telugu | Suryaa Desk | Published : Tue, Dec 30, 2025, 12:44 PM
కలియుగ దైవం శ్రీవేంకటేశ్వర స్వామి వారి సన్నిధిలో అత్యంత విశిష్టమైన వైకుంఠ ఏకాదశి పర్వదినానికి తిరుమల క్షేత్రం సర్వాంగ సుందరంగా సిద్ధమైంది. నేడు (డిసెంబర్ 30, మంగళవారం) నుంచి ప్రారంభం కానున్న ఈ ఉత్సవాల కోసం తిరుమల తిరుపతి దేవస్థానం (టీటీడీ) భారీ ఏర్పాట్లు పూర్తి చేసింది. భక్తుల రద్దీని దృష్టిలో ఉంచుకుని ఈసారి పది రోజుల పాటు వైకుంఠ ద్వార దర్శనాన్ని కల్పించనున్నారు.ఆలయాన్ని అత్యంత శోభాయమానంగా తీర్చిదిద్దేందుకు టీటీడీ ఉద్యానవన విభాగం ప్రత్యేక శ్రద్ధ తీసుకుంది. సుమారు 50 టన్నుల సంప్రదాయ పుష్పాలు, 10 టన్నుల పండ్లు, 4 లక్షల కట్ ఫ్లవర్స్తో ఆలయ ప్రాంగణాన్ని అద్భుతంగా అలంకరించారు. రంగురంగుల విద్యుత్ దీపాల వెలుగుల్లో తిరుమల కొండలు మెరిసిపోతున్నాయి.దర్శన ఏర్పాట్లపై టీటీడీ కీలక నిబంధనలను విధించింది. డిసెంబర్ 30 నుంచి జనవరి 1 వరకు కేవలం ముందుగా టోకెన్లు పొందిన భక్తులను మాత్రమే దర్శనానికి అనుమతిస్తారు. ఎలాంటి టికెట్లు లేని భక్తులు జనవరి 2 నుంచి 8 వరకు వైకుంఠ ద్వార దర్శనం చేసుకోవచ్చు. దర్శనానికి వచ్చే భక్తులు తప్పనిసరిగా తమ ఆధార్ కార్డును, ప్రింటెడ్ టోకెన్లను వెంట తీసుకురావాలని అధికారులు సూచించారు.
|
|