ఉపాధి కూలీల పిల్లలకు రోజుకు రూ.307 స్టైఫండ్

గ్రామీణ ప్రాంతాల్లోని నిరుద్యోగ యువతకు ఉద్యోగ, ఉపాధి అవకాశాలు కల్పించేందుకు ప్రభుత్వాలు అనేక చర్యలు చేపడుతూ ఉంటాయి. నిరుద్యోగ యువతకు ఉద్యోగ అవకాశాలు కల్పించడం ద్వారా గ్రామీణ ప్రాంతాల్లో పేదరిక నిర్మూలన కోసం కృషి చేస్తుంటాయి. ఈ క్రమంలోనే అల్లూరు సీతారామరాజు జిల్లాలోని నిరుద్యోగ యువతకు ఉపాధి హామీ పథకం అధికారులు శుభవార్త వినిపించారు. అల్లూరి జిల్లా పెదబయలు మండలంలో నిరుద్యోగ యువత కోసం ఉద్యోగ మేళా నిర్వహిస్తున్నారు. జనవరి 6వ తేదీన వెలుగు కార్యాలయంలో ఈ ఉద్యోగమేళా జరగనుంది.

ఈ ఉద్యోగ మేళాలో ఎంపికైన వారికి కేంద్ర, రాష్ట్ర ప్రభుత్వాల సహకారంతో వివిధ రంగాల్లో శిక్షణ అందిస్తారు. డీడీయూ, సీడాప్, జీకేవై ద్వారా ఎలక్ట్రానిక్స్, కంప్యూటర్స్, లాజిస్టిక్, ఆటోమొబైల్ రంగాలలో నిరుద్యోగ యువతకు శిక్షణ అందించనున్నారు. అనంతరం ఉద్యోగావకాశాలు కల్పిస్తారు. ఈ విషయాన్ని ఉపాధి హామీ పథకం ఏపీవో సూరిబాబు వెల్లడించారు.

ఆసక్తి కలిగిన నిరుద్యోగ యువత విద్యార్హతలకు సంబంధించిన ధ్రువపత్రాలతో పాటుగా తమ ఆధార్ కార్డు, రేషన్ కార్డు, బ్యాంక్ అకౌంట్ పాస్ బుక్, కులధ్రువీకరణ పత్రం, ఉపాధి హామీ పథకానికి సంబంధించిన జాబ్ కార్డు జిరాక్సులను తీసుకుని రావాలని సూచించారు. ఎంపికైన వారికి ఉచిత శిక్షణ, వసతి, భోజన సదుపాయాలు కల్పిస్తున్నట్లు వివరించారు. అలాగే ఉపాధి హామీ పథకంలో భాగంగా ఇప్పటికే వంద రోజుల పని పూర్తి చేసుకున్న ఉపాధి హామీ కూలీల పిల్లలకు రోజుకు 307 రూపాయల చొప్పున స్టైఫండ్ కూడా ఇస్తున్నట్లు ఏపీవో సూరిబాబు వెల్లడించారు. ఇంకా ఏవైనా వివరాలు కావాలంటే 8500904876, 9492572737 నంబర్లను సంప్రదించాలని సూచించారు.

మరోవైపు గ్రామీణ ప్రాంత యువతకు స్వయం ఉపాధి అవకాశాలు కల్పించేందుకు నైపుణ్యాభివృద్ధి సంస్థతో పాటుగా వివిధ బ్యాంకులకు చెందిన సంస్థలు కూడా అనేక కార్యక్రమాలు అమలు చేస్తున్న సంగతి తెలిసిందే. యువకులకు డ్రైవింగ్, సెల్ ఫోన్ రిపేర్, మెకానిక్, వంటి స్వయం ఉపాధి కోర్సులలో ట్రైనింగ్ ఇస్తున్నారు.

యువతులకు టైలరింగ్, బ్యూటీషియన్, కుట్లు, అళ్లికలు వంటి అంశాలపై ఉచిత శిక్షణ అందిస్తూ వారి కాళ్ల మీద వాళ్లు నిలబడేలా, ఆర్థిక స్వాతంత్ర్యం సాధించేలా చర్యలు తీసుకుంటున్నారు. ఈ క్రమంలోనే ఉపాధి హామీ పథకం అధికారులు.. గ్రామీణ ప్రాంత యువతకు ఈ సదవకాశం కల్పిస్తున్నారు. ఆసక్తి, అర్హత ఉన్నవారు ఉపయోగించుకోవాలని సూచిస్తున్నారు.