ఎస్బీఐ స్కీమ్ అదుర్స్.. లక్ష పెడితే రూ. 2.36 లక్షలొచ్చాయ్

స్టాక్ మార్కెట్లకు ప్రత్యామ్నాయంగా చాలా మంది మ్యూచువల్ ఫండ్లలో పెట్టుబడులు పెట్టేందుకు ఆసక్తి చూపిస్తుంటారని చెప్పొచ్చు. ఇక్కడ దీర్ఘకాలంలో మెరుగైన రిటర్న్స్ అందుకోవచ్చు. నిపుణులు కూడా ఇదే చెబుతుంటారు. కాంపౌండింగ్ ఇంట్రెస్ట్ బెనిఫిట్ కారణంగా.. సంపద కాలం గడుస్తున్న కొద్దీ విపరీతంగా పెరుగుతుంటుంది. సగటున చాలా వరకు ఈక్విటీ మ్యూచువల్ ఫండ్స్ వార్షిక ప్రాతిపదికన 12 శాతానికి మించి రాబడి అందిస్తుంటాయి. ఇంకా ఎక్కువ రిటర్న్స్ ఇచ్చేవి కూడా ఉంటాయి కానీ సగటున 12 శాతం ప్రాతిపదికన చూస్తుంటారు. మ్యూచువల్ ఫండ్లలో సిప్ పెట్టుబడులు అంటే నెలవారీగా కొంత మొత్తం చొప్పున పెట్టుబడులు పెట్టొచ్చు.. ఇంకా ఒకేసారి పెద్ద మొత్తంలో లంప్ సమ్ ఇన్వెస్ట్‌మెంట్లు కూడా చేయొచ్చు.

ఇప్పుడు మూడేళ్ల కాల వ్యవధిలో లంప్ సమ్ పెట్టుబడులపై సగటున వార్షిక ప్రాతిపదికన 30 శాతానికి మించి రాబడి అందించిన టాప్-5 స్కీమ్స్ గురించి చూద్దాం. వాల్యూ రీసెర్చ్ ఈ డేటా వెలువరించింది. ఇందులో ఎస్బీఐ గోల్డ్ ఫండ్ రిటర్న్స్‌లో టాప్ ప్లేస్‌లో నిలిచింది. ఇది వార్షిక ప్రాతిపదికన గత మూడేళ్లలో సగటున 33.22 శాతం మేర రిటర్న్స్ ఇచ్చింది. అంటే ఈ క్రమంలో రూ. 1 లక్ష పెట్టుబడి పెట్టిన వారికి మూడు సంవత్సరాల్లో రూ. 2.36 లక్షలు వచ్చాయని చెప్పొచ్చు.

యూటీఐ గోల్డ్ ఈటీఎఫ్ ఫండ్ ఆఫ్ ఫండ్స్ (FoF) స్కీమ్ CAGR రాబడి సగటున 33.18 శాతంగా ఉంది. ఇక్కడ మూడేళ్ల వ్యవధిలో రూ. 1 లక్ష పెట్టుబడి పెట్టిన వారికి రూ. 2.36 లక్షలే అందించింది. క్వాంటమ్ గోల్డ్ సేవింగ్స్ ఫండ్ 32.95 శాతం సీఏజీఆర్ రిటర్న్స్ ఇచ్చింది. ఇక్కడ రూ. 1 లక్ష పెట్టుబడి పెట్టిన వారికి మూడేళ్లలో రూ. 2.34 లక్షలు అందాయి.

యాక్సిస్ గోల్డ్ ఫండ్ 32.92 శాతం CAGR రిటర్న్స్ ఇచ్చింది. ఇక్కడ లంప్ సమ్ పెట్టుబడుల్లో రూ. 1 లక్ష ఇన్వెస్ట్ చేసిన వారికి 3 సంవత్సరాల కాలంలో రూ. 2.34 లక్షలు అందాయి. మోతీలాల్ ఓస్వాల్ బీఎస్ఈ ఎన్‌హ్యాన్స్‌డ్ వాల్యూ ఇండెక్స్ ఫండ్ లంప్ సమ్ పెట్టుబడులపై సగటున వార్షిక ప్రాతిపదికన 31.71 శాతం రిటర్న్స్ ఇచ్చింది. ఇక్కడ రూ. 1 లక్ష ఇన్వెస్ట్ చేసిన వారికి మూడేళ్లలో రూ. 2.28 లక్షలు వచ్చాయి. ఇతర మ్యూచువల్ ఫండ్స్ విషయానికి వస్తే వీటి రాబడి కనీసం 6.17 శాతం నుంచి గరిష్ఠంగా 29.99 శాతం వరకు రాబడి అందించాయి. ఇక్కడ రూ. 1 లక్ష ఇన్వెస్ట్ చేసిన వారికి మూడేళ్లలో రూ. 1.19 లక్షల నుంచి రూ. 2.19 లక్షలు వచ్చాయి.