రూ. 22 వేల కోట్ల విలువైన క్షిపణులను రష్యాకు పంపిన ఇరాన్

ఉక్రెయిన్‌పై రష్యా సాగిస్తున్న సుదీర్ఘ యుద్ధంలో ఇరాన్ ఒక కీలక ఆయుధ సరఫరాదారుగా అవతరించింది. పాశ్చాత్య నిఘా వర్గాల తాజా నివేదికల ప్రకారం.. ఉక్రెయిన్ యుద్ధం ప్రారంభానికి ముందు నుంచి (అక్టోబర్ 2021) ఇప్పటి వరకు ఇరాన్ సుమారు 2.7 బిలియన్ డాలర్ల (సుమారు రూ. 22,600 కోట్లు) విలువైన క్షిపణులను రష్యాకు విక్రయించింది. ఈ రహస్య ఒప్పందాలు అంతర్జాతీయ స్థాయిలో చర్చనీయాంశంగా మారాయి.

పాశ్చాత్య భద్రతా అధికారి ఒకరు వెల్లడించిన వివరాల ప్రకారం.. ఇరాన్ నుంచి రష్యాకు పెద్ద మొత్తంలో ఆయుధాల సరఫరా జరిగింది. ముఖ్యంగా వందలాది 'ఫతా-360' స్వల్ప శ్రేణి బాలిస్టిక్ క్షిపణులతో పాటు మరో 500 ఇతర రకాల షార్ట్ రేంజ్ క్షిపణులను ఇరాన్ సరఫరా చేసింది. అలాగే యాంటీ ఎయిర్‌క్రాఫ్ట్ డిఫెన్స్ సిస్టమ్స్‌కు సంబంధించి సుమారు 200 సర్ఫేస్-టు-ఎయిర్ క్షిపణులను రష్యా కొనుగోలు చేసింది. 2023 ప్రారంభంలో కుదిరిన 1.75 బిలియన్ డాలర్ల ఒప్పందంలో భాగంగా.. ఇరాన్ తన ప్రసిద్ధ 'షాహెద్-136' కామికేజ్ డ్రోన్లను అందించడమే కాకుండా వాటిని రష్యాలోనే 'గెరాన్-2' పేరుతో తయారు చేసుకునే సాంకేతికతను కూడా పంచుకుంది.

ఇదీ చూడండి: ట్రంప్ సంచలన నిర్ణయం.. భారత్‌పై 500 శాతం సుంకాలు విధించే బిల్లుకు గ్రీన్ సిగ్నల్

బిలియన్ డాలర్ల భాగస్వామ్యం

మొత్తంగా చూస్తే.. 2021 చివరి నుంచి ఇప్పటి వరకు రష్యా సుమారు 4 బిలియన్ డాలర్ల (రూ. 33,500 కోట్లు) పైగా నిధులను ఇరాన్ సైనిక పరికరాల కోసం ఖర్చు చేసింది. క్షిపణులు, డ్రోన్లతో పాటు మిలియన్ల కొద్దీ మందుగుండు సామాగ్రిని కూడా ఇరాన్ సరఫరా చేస్తోంది. ఉక్రెయిన్ యుద్ధం వల్ల పాశ్చాత్య దేశాల నుంచి ఎదురు అవుతున్న ఆంక్షల నుంచి గట్టెక్కేందుకు రష్యా, ఇరాన్ మరింత చేరువ అయ్యాయి.

ఇరాన్ తన అణు కార్యక్రమం కారణంగా ఎదుర్కొంటున్న ఒంటరితనాన్ని పోగొట్టుకోవడానికి 2010 నుంచి రష్యాతో సత్సంబంధాలను పెంచుకుంటోంది. జనవరి 2025లో ఇరు దేశాలు వ్యూహాత్మక భాగస్వామ్య ఒప్పందంపై సంతకాలు చేసినప్పటికీ.. ఇందులో 'పరస్పర రక్షణ' నిబంధనలు లేకపోవడం గమనార్హం. గత ఏడాది (2025) ఇరాన్‌పై ఇజ్రాయెల్, అమెరికా దాడులు చేసినప్పుడు రష్యా నుంచి ఎలాంటి ప్రత్యక్ష సహాయం అందలేదు. ప్రస్తుతం రష్యా, ఇరాన్‌లు తమ ఆర్థిక వ్యవస్థలను బలోపేతం చేసుకునేందుకు భారత్‌ను కలుపుతూ ఒక సరికొత్త వాణిజ్య మార్గాన్ని నిర్మిస్తున్నాయి. బ్యాంకింగ్, ఆర్థిక రంగాల్లో సహకారాన్ని పెంచుకోవడం ద్వారా పాశ్చాత్య ఆంక్షల ప్రభావాన్ని తగ్గించుకోవాలని ఇరు దేశాలు భావిస్తున్నాయి.