కెనడాలో 400 కిలోల స్వచ్ఛమైన బంగారం దోపిడీ: భారత సంతతి వ్యక్తి అరెస్ట్

కెనడా నేర చరిత్రలో ఎన్నడూ లేని విధంగా జరిగిన సుమారు 20 మిలియన్ డాలర్ల (వందల కోట్ల రూపాయల) విలువైన బంగారు దోపిడీ కేసులో కెనడా పోలీసులు మరో కీలక విజయాన్ని అందుకున్నారు. 'ప్రాజెక్ట్ 24K' పేరుతో జరుగుతున్న ఈ భారీ దర్యాప్తులో భాగంగా.. తాజాగా 43 ఏళ్ల వయసు కల్గిన అరెసలాన్ చౌదరి అనే వ్యక్తిని పీల్ రీజినల్ పోలీసులు అరెస్ట్ చేశారు. దుబాయ్ నుంచి వస్తున్న ఇతడు.. టొరంటో పియర్సన్ అంతర్జాతీయ విమానాశ్రయంలో అడుగు పెట్టగానే పోలీసులు అదుపులోకి తీసుకున్నారు.

అసలేంటీ భారీ దోపిడీ కేసు?

2023 ఏప్రిల్ 17వ తేదీన స్విట్జర్లాండ్‌లోని జూరిచ్ నుంచి ఒక కార్గో విమానం టొరంటో విమానాశ్రయానికి చేరుకుంది. అందులో సుమారు 400 కిలోల స్వచ్ఛమైన బంగారం (6,600 బిస్కెట్లు), 2.5 మిలియన్ డాలర్ల విదేశీ కరెన్సీ ఉన్నాయి. అయితే విమానాశ్రయ ప్రాంగణంలోని ఒక సురక్షిత ప్రాంతానికి ఈ రవాణాను తరలించిన కొద్ది సేపటికే అది అదృశ్యం అయింది. ఎయిర్ కెనడా వ్యవస్థలను మోసం చేసి, నకిలీ పత్రాల ద్వారా పలువురు దుండగులు ఈ దోపిడీకి పాల్పడినట్లు పోలీసులు గుర్తించారు.

ఈ కేసులో ప్రధాన నిందితుల్లో ఒకరైన సిమ్రాన్ ప్రీత్ పనేసర్ (33) ప్రస్తుతం భారత్‌లో తలదాచుకున్నట్లు పోలీసులు బలంగా నమ్ముతున్నారు. ఎయిర్ కెనడా మాజీ ఉద్యోగి అయిన పనేసర్.. ఎయిర్‌లైన్ సిస్టమ్స్‌ను మార్చడం ద్వారా ఈ కార్గో షిప్‌మెంట్‌ను పక్కదారి పట్టించాడని ఆరోపణలు ఉన్నాయి. గతేడాది ఇతడిని చండీగఢ్ శివార్లలోని ఒక అద్దె ఫ్లాట్‌లో గుర్తించినప్పటికీ.. అతడు తప్పించుకుని పారిపోయాడు. ప్రస్తుతం భారత్‌లో ఉన్న పనేసర్ కోసం కెనడా వ్యాప్తంగా అరెస్ట్ వారెంట్ జారీ చేయడంతో పాటు అంతర్జాతీయ దర్యాప్తు సంస్థల సహకారంతో గాలింపు ముమ్మరం చేశారు.

ఈ భారీ దోపిడీకి సంబంధించి ఇప్పటి వరకు పది మందిపై ఆరోపణలు వచ్చాయి. వారిలో ఎక్కువ మంది భారత సంతతి వ్యక్తులే కావడం గమనార్హం. ముఖ్యంగా తాజాగా అరెస్టయిన అరెసలాన్ చౌదరిపై దొంగతనం, నేరపూరిత కుట్ర వంటి కేసులు నమోదు చేశారు. 2024 మేలో భారత్ నుంచి కెనడాకు వస్తుండగా అర్చిత్ గ్రోవర్ అనే నిందితుడిని పోలీసులు పట్టుకున్నారు. ఎయిర్ కెనడా మాజీ ఉద్యోగి పరంపాల్ సిద్ధూ, అమిత్ జలోటా, ప్రసాత్ పరమలింగం, అలీ రజా తదితరులు ఇప్పటికే అరెస్టు అయ్యారు. మరో నిందితుడు దురాంటే కింగ్-మెక్లీన్ ప్రస్తుతం ఆయుధాల అక్రమ రవాణా కేసులో అమెరికా కస్టడీలో ఉన్నాడు.

"ఎక్కడ దాక్కున్నా వదలం"

ఈ ఆపరేషన్ విజయంపై పీల్ రీజినల్ పోలీస్ చీఫ్ నిషాన్ దురైయప్ప స్పందిస్తూ.. "ప్రాజెక్ట్ 24K అనేది అంతర్జాతీయ నేర ముఠాలను ఎలా అణిచివేయవచ్చో చెప్పడానికి ఒక ఉదాహరణ. మీరు ఎక్కడ దాక్కున్నా, ఎంత దూరంలో ఉన్నా సరే.. మిమ్మల్ని వెతికి పట్టుకుని చట్టం ముందు నిలబెడతాం" అని హెచ్చరించారు. భారత అధికారుల సహకారంతో త్వరలోనే పనేసర్‌ను కెనడాకు రప్పించే అవకాశాలు కనిపిస్తున్నాయి.