యువ క్రికెటర్లకు కేఎల్ రాహుల్ స్ఫూర్తిదాయక సందేశం

టీమిండియా వికెట్ కీపర్ బ్యాటర్ కేఎల్ రాహుల్ యువ క్రికెటర్లకు గురువుగా మారి విలువైన జీవిత పాఠాలు చెప్పాడు. వడోదరాలో జరిగిన శిక్షణా శిబిరంలో యువ ఆటగాళ్లతో రాహుల్ ముచ్చటిస్తున్న వీడియోను బీసీసీఐ మంగళవారం షేర్ చేయగా, అది సోషల్ మీడియాలో వైరల్ అయింది.ప్రస్తుతం న్యూజిలాండ్‌తో జరుగుతున్న వన్డే సిరీస్‌లో భాగంగా ఈ శిక్షణ కార్యక్రమం జరిగింది. తొలి వన్డేలో భారత్ 4 వికెట్ల తేడాతో గెలవడంలో రాహుల్ కీలక పాత్ర పోషించిన సంగతి తెలిసిందే. ఆ మ్యాచ్‌లో చివరి ఓవర్లో 4, 4, 6 బాది 21 బంతుల్లో 29 పరుగులతో అజేయంగా నిలిచి జట్టును గెలిపించాడు.ఈ సందర్భంగా ఓ యువ క్రికెటర్అవకాశాలు రాకపోతే ఏం చేయాలి  అని రాహుల్‌ను ప్రశ్నించాడు. దీనికి రాహుల్ ఎంతో ఓపికగా సమాధానమిచ్చాడు.మీ ప్రతిభను ప్రదర్శించే అవకాశం కచ్చితంగా వస్తుంది. అది దేశవాళీ, అంతర్జాతీయ లేదా స్థానిక టోర్నమెంట్ ఏదైనా కావచ్చు. మీరు కష్టపడి పనిచేస్తూ, అవకాశం వచ్చినప్పుడు సిద్ధంగా ఉండాలి. దాన్ని రెండు చేతులతో అందిపుచ్చుకోవాలి. ఒక క్రికెటర్‌గా మన చేతుల్లో ఉండేది ఇదే అని వివరించాడు.అవకాశాలు రాని దశ అందరికీ కష్టంగానే ఉంటుంది. కోపం, నిరాశ రావడం సహజం. కానీ వాటి నుంచి త్వరగా బయటపడాలి. మీ చేతుల్లో ఉన్న పనిని మీరు చేయండి, మిగతాది దేవుడిపై వదిలేయండి దేవుడు ఎప్పుడు అవకాశం ఇస్తాడో, దాన్ని అందుకుని సద్వినియోగం చేసుకోండి అంటూ యువ ఆటగాళ్లలో స్ఫూర్తి నింపాడు. రాహుల్ మాటలు కేవలం క్రికెట్‌కే కాకుండా జీవితానికి కూడా వర్తిస్తాయని నెటిజన్లు ప్రశంసిస్తున్నారు. కాగా, భారత్-న్యూజిలాండ్ మధ్య రెండో వన్డే బుధవారం రాజ్‌కోట్‌లోని నిరంజన్ షా స్టేడియంలో జరగనుంది.