ట్రంప్ ఎలా బతికున్నారో అర్థం కావట్లేదు.. అమెరికా ఆరోగ్య శాఖ మంత్రి కీలక వ్యాఖ్యలు

అమెరికా అధ్యక్షుడు డొనాల్డ్ ట్రంప్ ఆహారపు అలవాట్లపై.. ఆ దేశ ఆరోగ్య శాఖ మంత్రి (యూఎస్ హెల్త్ సెక్రటరీ) రాబర్ట్ ఎఫ్ కెన్నెడీ జూనియర్ ఆసక్తికర వ్యాఖ్యలు చేశారు. ట్రంప్ విపరీతమైన జంక్ ఫుడ్ తింటారని.. రోజు మొత్తం విషపూరితమైన ఆహారాన్ని శరీరంలోకి పంపిస్తారని పేర్కొన్నారు. ఈ సందర్భంగా ట్రంప్ ఆహారపు అలవాట్లను కెన్నెడీ జూనియర్ అదుపులేనివి అని అభివర్ణించారు.

మెక్‌డొనాల్డ్స్ బర్గర్లు, స్వీట్లను ట్రంప్ ఎక్కువగా తింటారని కెన్నెడీ వెల్లడించారు. ఆయన ఎప్పుడూ చేతిలో డైట్ కోక్ పట్టుకుని కనిపిస్తారని.. రోజంతా దానిని తాగుతూనే ఉంటారని తెలిపారు. రోజంతా ట్రంప్.. తన శరీరంలోకి విషాన్ని పంపిస్తున్నట్లు అనిపిస్తుందని.. ఆయన అసలు ఎలా బతికున్నారో తనకు అర్థం కావడం లేదని చమత్కరించారు. ఇటీవల ఓ పాడ్‌కాస్ట్‌లో పాల్గొన్న రాబర్ట్ ఎఫ్ కెన్నెడీ.. పలు ఆసక్తికరమైన విషయాలు వెల్లడించారు.

తన ఆహారపు అలవాట్లపై ట్రంప్ ఇచ్చిన వివరణను కూడా కెన్నెడీ వెల్లడించారు. ఎక్కడికైనా ప్రయాణించే సమయంలో కేవలం మెక్‌డొనాల్డ్స్ వంటి పెద్ద కార్పొరేట్ సంస్థలకు సంబంధించిన ఆహారాన్ని మాత్రమే తింటానని ట్రంప్ చెప్పినట్లు కెన్నెడీ తెలిపారు. ఎందుకంటే ఆ ఫుడ్ సురక్షితమని.. దానివల్ల అనారోగ్యం పాలయ్యే అవకాశం ఉండదని ట్రంప్ నమ్ముతారని పేర్కొన్నారు.

ప్రస్తుతం 79 ఏళ్ల వయసు ఉన్న ట్రంప్ ఎంతో ఉత్సాహంగా ఉండటంపైనా కెన్నెడీ ప్రశంసలు కురిపించారు. ప్రఖ్యాత డాక్టర్ మెహ్మెట్ ఓజ్ పరిశీలన ప్రకారం.. 70 ఏళ్లు పైబడిన వ్యక్తుల్లో ట్రంప్ కలిగినంత అధిక టెస్టోస్టెరాన్ స్థాయిలను తాను ఎప్పుడూ చూడలేదని పేర్కొన్నట్లు కెన్నెడీ గుర్తు చేసుకున్నారు. ఇటీవలే వైట్ హౌస్ విడుదల చేసిన ఎంఆర్ఐ (MRI) స్కాన్ నివేదిక ప్రకారం.. ట్రంప్ గుండె, ఊపిరితిత్తులు, ఇతర ప్రధాన అవయవాలు ఎంతో ఆరోగ్యంగా ఉన్నాయని డాక్టర్ సీన్ బార్బబెల్లా ధృవీకరించారు. ట్రంప్ కుడి చేతిపై కొన్ని రోజుల క్రితం కనిపించిన కమిలిన గుర్తులు.. గుండె ఆరోగ్యంగా ఉండేందుకు ఆయన వాడుతున్న ఆస్పిరిన్ మందుల వల్ల వచ్చినవని డాక్టర్లు స్పష్టం చేశారు.