రాజ్‌కోట్‌లో న్యూజిలాండ్ వన్‌సైడ్ విక్టరీ,,,,టీమిండియా ఓటమి

భారత్ - న్యూజిలాండ్ మధ్య జరిగిన రెండో వన్డేలో కివీస్ విజయం సాధించింది. టీమిండియా అంటేనే చెలరేగి ఆడే డారెల్ మిచెల్ మరోసారి రెచ్చిపోయి ఆడాడు. రాజ్‌కోట్ వన్డేలో సెంచరీ చేసి భారత్‌కు ఓటమిని మిగిల్చాడు. ఆరంభం నుంచి పట్టు సాధించిన న్యూజిలాండ్‌కు టాప్ ఆర్డర్ బ్యాటర్లు విల్ యంగ్, డారెల్ మిచెల్‌ అద్భుత భాగస్వామ్యం అందించి విజయంలో కీలక పాత్ర పోషించారు. ఈ విజయంతో మూడు వన్డేల సిరీస్ 1 - 1తో సమం అయింది.

రాజ్‌కోట్ వేదికగా జరిగిన వన్డేలో టాస్ గెలిచిన న్యూజిలాండ్ జట్టు బౌలింగ్ ఎంచుకుంది. తొలుత బ్యాటింగ్ చేసిన భారత జట్టు నిర్ణీత 50 ఓవర్లలో 7 వికెట్ల నష్టానికి 284 పరుగులు చేసింది. కేఎల్ రాహుల్ ఒక్కడే సెంచరీతో రాణించడం.. రోహిత్, విరాట్ కోహ్లి తక్కువ పరుగులకే అవుటవ్వడంతో భారత్ భారీ స్కోర్ చేయలేకపోయింది.

భారత్ నిర్దేశించిన 285 పరుగుల లక్ష్యంతో బరిలోకి దిగిన న్యూజిలాండ్ జట్టు ఆరంభంలోనే వికెట్లు కోల్పోయినా.. టాప్ ఆర్డర్ బ్యాటర్లు విల్ యంగ్, డారెల్ మిచెల్ ఇన్నింగ్స్‌ను నిలబెట్టారు. డెవాన్ కాన్వే 21 బంతుల్లో 16 పరుగులు చేయగా, హెన్రీ నికోలస్ 10 పరుగులు చేసి అవుటయ్యారు. 46 పరుగులకే రెండు వికెట్లు కోల్పోయినప్పటికీ విల్ యంగ్ - డారెల్ మిచెల్ 162 పరుగుల భాగస్వామ్యం నెలకొల్పారు.

విల్ యంగ్ 98 బంతులు ఆడి 7 ఫోర్లతో 87 పరుగులు చేశాడు. సెంచరీకి అతి చేరువగా ఉన్న సమయంలో అనవసర షాట్లకు ప్రయత్నించి చేజేతులారా వికెట్ కోల్పోయాడు. యంగ్ తర్వాత క్రీజులోకి వచ్చిన గ్లెన్ ఫిలిప్స్ దూకుడుగా ఆడి స్కోర్ బోర్డును పరుగులు పెట్టించాడు. అదే సమయంలో డారెల్ మిచెల్ కూడా స్పీడు పెంచి పరుగులు రాబట్టాడు. ఈ క్రమంలోనే మిచెల్ సెంచరీ పూర్తి చేసుకున్నాడు.

యంగ్ అవుటైన తర్వాత గ్లెన్ ఫిలిప్స్ - మిచెల్ కలిసి వికెట్ పడకుండా 78 పరుగుల భాగస్వామ్యం నెలకొల్పి మ్యాచ్‌ని ముగించారు. డారెల్ మిచెల్ 117 బంతుల్లో 11 ఫోర్లు, 2 సిక్సర్లతో 131 పరుగులు చేయగా, గ్లెన్ ఫిలిప్స్ 25 బంతుల్లో రెండు ఫోర్లు, 1 సిక్సర్‌‌తో 32 పరుగులు చేశాడు. దాంతో న్యూజిలాండ్ 47.3 ఓవర్లలోనే లక్ష్యాన్ని ఛేదించి విజయం సాధించింది. మూడు వన్డేల సిరీస్‌లో తొలి మ్యాచ్‌లో భారత్ గెలవగా, రెండో వన్డేలో న్యూజిలాండ్ విజయం సాధించింది. ఇండోర్ వేదికగా జనవరి 18న జరిగే మూడో వన్డే కీలకం కానుంది.