ఏ పే కమిషన్‌లో జీతం ఎంత,,,,ఉద్యోగులకు భారీగా పెరగనున్న జీతాలు

ప్రతి 10 సంవత్సరాలకు ఓసారి కొత్త పే కమిషన్ (వేతన సంఘం) అమల్లోకి రావాల్సి ఉంటుందన్న సంగతి తెలిసిందే. ఇప్పుడు 7వ వేతన సంఘం అమల్లో ఉండగా.. దీని గడువు 2025, డిసెంబర్ 31తోనే ముగిసింది. దీంతో కొత్తగా 8వ వేతన సంఘం అమల్లోకి రావాలి. కానీ ఆలస్యమైంది. గతేడాది జనవరిలోనే తొలుత ఈ కమిషన్‌కు కేంద్రం ఆమోదం తెలిపినప్పటికీ.. విధివిధానాల రూపకల్పనకు మరో 10 నెలల సమయం పట్టింది. నవంబరులో 8వ వేతన సంఘం విధివిధానాలకు కేంద్ర కేబినెట్ ఆమోదం తెలిపింది. ఇక కమిషన్.. కేంద్ర ప్రభుత్వ ఉద్యోగులు, పెన్షనర్ల.. జీతభత్యాలు, ఇతర అలవెన్సులు వంటి వాటిని లెక్కించేందుకు 18 నెలల సమయం ఉంది. అంటే దాదాపు ఏడాదిన్నర. దీనికి కేంద్రం మళ్లీ ఆమోదం తెలపాలి. దీంతో 2027 చివర్లో.. లేదా 2028లో 8వ వేతన సంఘం అమలయ్యే అవకాశాలు ఎక్కువగా ఉన్నాయని చెబుతున్నారు.

వేతన సంఘం అమలు ఆలస్యమైనా.. ఆ కాలానికి సంబంధించి బకాయిల్ని మాత్రం కేంద్రం చెల్లిస్తుందని చెప్పొచ్చు. ఇక్కడ కేంద్ర ప్రభుత్వ ఉద్యోగుల వేతనాలు, పింఛన్ దారుల పెన్షన్ పెరుగుతుందన్న సంగతి తెలిసిందే. ఇక్కడ జీతభత్యాల్ని నిర్ణయించడంలో ఫిట్‌మెంట్ ఫ్యాక్టర్ కీలక పాత్ర పోషిస్తుంది. దీని ఆధారంగానే ఉద్యోగుల జీతం, పెన్షన్ ఎన్ని రెట్లు పెరుగుతుందనేది లెక్కించొచ్చు. ఈ క్రమంలో అంతకుముందు 6వ వేతన సంఘం, 7వ వేతన సంఘాల్లో ఫిట్‌మెంట్ ఫ్యాక్టర్ ఎలా ఉంది.. జీతాలు ఎంత పెరిగాయో తెలుసుకుందాం.

 6వ వేతన సంఘంలో ఫిట్‌మెంట్ ఫ్యాక్టర్ 1.92 గా నిర్ణయించగా.. ఉద్యోగుల బేసిక్ పే 1.92 రెట్లు పెరిగిందన్నమాట. దీంతో 5వ వేతన సంఘంలో మినిమం బేసిక్ పే రూ. 3200 గా ఉండగా.. ఇది 6వ వేతన సంఘంలో రూ. 7,440 కి చేరింది. గరిష్ఠ వేతనం రూ. 30 వేల స్థాయి నుంచి రూ. 90 వేలకు పెరిగింది.

7 వ వేతన సంఘంలో చూస్తే ఫిట్‌మెంట్ ఫ్యాక్టర్‌ను 2.57 గా కేంద్రం నిర్ణయించింది. ఇక్కడ జీతం అన్ని రెట్లు పెరిగిందన్నమాట. ఇక్కడ మినిమం బేసిక్ పే రూ. 7,440 స్థాయి నుంచి రూ. 18 వేలకు పెరిగింది. ఇక గరిష్ఠ వేతనం రూ. 90 వేల నుంచి రూ. 2.50 లక్షలకు చేరింది.

ఇప్పుడు 8వ వేతన సంఘం కింద మాత్రం ఫిట్‌మెంట్ ఫ్యాక్టర్ 1.8-2.86 మధ్య ఉండొచ్చని అంచనా వేస్తున్నారు. ఫిట్‌మెంట్ ఫ్యాక్టర్ ఎక్కువగా ఉంటే.. బేసిక్ పే ఎక్కువగా పెరుగుతుందని చెప్పొచ్చు. ఉదాహరణకు 8వ వేతన సంఘం కింద ఫిట్‌మెంట్ ఫ్యాక్టర్ 2.15 గా అంచనా వేస్తే.. ఇక్కడ బేసిక్ పే రూ. 18 వేల నుంచి రూ. 38700 కు పెరుగుతుందని చెప్పొచ్చు. ఇదే మాదిరిగా ఇతర బేసిక్ పే పైనా లెక్కించొచ్చు.