'బంగ్లాదేశ్‌కు అస్సాం విద్యుత్ సరఫరా?': త్రిపుర సీఎం మాణిక్ సాహా సంచలన కామెంట్లు

పొరుగు దేశం బంగ్లాదేశ్‌లో మారుతున్న రాజకీయ పరిణామాలు, హిందువులపై దాడుల నేపథ్యంలో భారత్‌లో ఆ దేశం పట్ల కొంత వ్యతిరేకత వ్యక్తం అవుతున్నప్పటికీ.. విద్యుత్ సరఫరా విషయంలో ఈశాన్య రాష్ట్రాలు కీలక నిర్ణయం దిశగా అడుగులు వేస్తున్నాయి. అస్సాం వద్ద ఉన్న మిగులు విద్యుత్తును త్రిపుర మీదుగా బంగ్లాదేశ్‌కు సరఫరా చేసేందుకు అస్సాం ప్రభుత్వం సిద్ధంగా ఉందని త్రిపుర ముఖ్యమంత్రి మాణిక్ సాహా శుక్రవారం ప్రకటించారు.

ముఖ్యమంత్రుల మధ్య కీలక భేటీ

అస్సాం ముఖ్యమంత్రి హిమంత బిస్వ శర్మ రెండు రోజుల పర్యటన నిమిత్తం గురువారం త్రిపుర చేరుకున్నారు. ఈ సందర్భంగా మాణిక్ సాహా అధికారిక నివాసంలో ఇద్దరు ముఖ్యమంత్రులు సుదీర్ఘంగా చర్చలు జరిపారు. ఈ భేటీలో తమ రాష్ట్రాల వద్ద ఉన్న అదనపు విద్యుత్తును బంగ్లాదేశ్‌కు పంపే అంశంపై హిమంత బిస్వ శర్మ సానుకూలత వ్యక్తం చేసినట్లు మాణిక్ సాహా మీడియాకు వివరించారు.

ముగియనున్న పాత ఒప్పందం.. పొడిగింపునకు మొగ్గు?

త్రిపుర రాష్ట్రం 2016 నుంచే బంగ్లాదేశ్‌కు విద్యుత్ సరఫరా చేస్తోంది. గోమతి జిల్లాలోని పలాతానాలో ఉన్న ఓఎన్‌జీసీ త్రిపుర పవర్ కంపెనీ ప్లాంట్ నుంచి తొలుత 100 మెగావాట్ల సరఫరా ప్రారంభం కాగా.. ప్రస్తుతం అది 160 మెగావాట్ల వరకు చేరుకుంది. ప్రస్తుత అవగాహన ఒప్పందం ఈ ఏడాది మార్చితో ముగియనుంది. అయితే ఈ ఒప్పందాన్ని మరింత కాలం పొడిగించే అవకాశం ఉందని, దాంతో పాటు అస్సాం విద్యుత్తును కూడా బంగ్లాకు చేరవేసే మార్గాలపై చర్చిస్తున్నామని సీఎం తెలిపారు.

విద్యుత్తుతో పాటు అస్సాం-త్రిపుర రాష్ట్రాలను కలిపే జాతీయ రహదారి విస్తరణపై కూడా ఇద్దరు ముఖ్యమంత్రులు చర్చించారు. ఈ రహదారి అభివృద్ధి చెందితే ఈశాన్య రాష్ట్రాల మధ్య వాణిజ్యం, రాకపోకలు మరింత సులభతరం అవుతాయని వారు అభిప్రాయపడ్డారు.