పాకిస్తాన్ మూలాలున్న ప్లేయర్లకు వీసా ఆలస్యం,,,,,రంగంలోకి దిగి ప్రక్రియ వేగవంతం చేస్తోన్న ఐసీసీ

టీ20 వరల్డ్‌కప్ ‌కు ముందు కీలక పరిణామం చోటుచేసుకుంది. పాకిస్తాన్ మూలాలున్న ఆటగాళ్లకు వీసాల విషయంలో తలెత్తిన సమస్యలను పరిష్కరించేందుకు ఐసీసీ స్వయంగా రంగంలోకి దిగింది. భారత్‌లో జరగనున్న టీ20 వరల్డ్‌కప్ కోసం ప్రయాణించాల్సిన పాకిస్తాన్ మూలాలున్న 42 మంది ఆటగాళ్లు, అధికారులు, సపోర్ట్ స్టాఫ్‌కు సంబంధించిన వీసా ప్రక్రియను వేగవంతం చేసింది.

ఇంగ్లండ్ జట్టులో పాకిస్తాన్ మూలాలున్న ఆదిల్ రషీద్, రెహాన్ అహ్మద్, సకీబ్ మహ్మూద్‌లకు ఇప్పటికే భారత వీసాలు మంజూరయ్యాయి. నెదర్లాండ్స్ జట్టు సభ్యులు, కెనడా స్టాఫ్ మెంబర్ షా సలీమ్ జాఫర్‌కూ వీసాలు లభించినట్లు నేషనల్ మీడియా వెల్లడించింది. అయితే యునైటెడ్ అరబ్ ఎమిరేట్స్, అమెరికా, ఇటలీ, బంగ్లాదేశ్, కెనడా జట్లలో ఉన్న పాకిస్తాన్ జాతీయత లేదా మూలాలున్న కొందరు ఆటగాళ్లు, అధికారులు ఇంకా వీసాల కోసం ఎదురు చూస్తున్నారు. వీరంతా వచ్చే వారం ప్రారంభంలో వీసా అపాయింట్‌మెంట్‌లకు హాజరుకావాల్సి ఉంది. వరల్డ్‌కప్‌లో పాల్గొనేవారికి వీసాలు మంజూరు చేసే చివరి గడువు జనవరి 31గా నిర్ణయించారు.

పాకిస్తాన్ మూలాలున్న ఆటగాళ్ల విషయంలో వీసా ప్రక్రియ సాధారణంగా అదనపు భద్రతా, పరిపాలనా దశలను దాటాల్సి వస్తుంది. అయితే అమెరికా క్రికెటర్ అలీ ఖాన్ తన ఇన్‌స్టాగ్రామ్ స్టోరీలో వీసా డినైడ్ అని పోస్ట్ చేయడంతో ఈ అంశం పెద్ద చర్చగా మారింది. ఈ నేపథ్యంలో ఐసీసీ జోక్యం కేవలం ఆటగాళ్ల వరకే కాకుండా అధికారులు, స్టాండ్బై సిబ్బందికీ వర్తించింది. వివిధ దేశాల్లోని భారత హైకమిషన్లతో నిరంతరం సంప్రదింపులు జరుపుతూ, మిగిలిన వీసాలు కూడా సమయానికి క్లియర్ అవుతాయని ఐసీసీకి హామీ లభించింది.

ఫిబ్రవరి 7 నుంచి భారత్, శ్రీలంక సంయుక్తంగా ఆతిథ్యం ఇవ్వనున్న టీ20 వరల్డ్‌కప్‌కు ముందు అన్ని జట్లు లాజిస్టిక్‌గా సిద్ధంగా ఉంటాయని ఐసీసీ విశ్వాసం వ్యక్తం చేసింది. పాకిస్తాన్ మ్యాచ్‌లన్నీ శ్రీలంక వేదికగానే జరుగుతుండటం విశేషం. తాజాగా బంగ్లాదేశ్ కూడా తమ మ్యాచ్‌లను కూడా శ్రీలంకకు మార్చాలనే డిమాండ్‌ను ఐసీసీ ముందు ఉంచిన విషయం తెలిసిందే.