తొలి టీ20లో టీమిండియా విజయం,,,,78 పరుగులతో ఫిలిప్స్ ఒంటరి పోరాటం

నాగ్‌పూర్ టీ20లో టీమిండియా విజయం సాధించింది. భారీ టార్గెట్ లక్ష్యంతో బరిలోకి న్యూజిలాండ్ జట్టుకు ఆరంభంలోనే భారత బౌలర్లు షాకిచ్చారు. మొదటి రెండు ఓవర్లలోనే రెండు వికెట్లు కోల్పోయిన న్యూజిలాండ్ జట్టులో గ్లెన్ ఫిలిప్స్ గెలుపు ఆశలు రేకెత్తించాడు. అసాధ్యం అనుకున్న టార్గెట్‌ను ఒకానొక దశలో ఛేదిస్తారా? అన్న అనుమానం వచ్చింది. భారత బౌలర్లు చాకచక్యంగా బంతులు వేయడంతో న్యూజిలాండ్‌కు ఓటమి తప్పలేదు.

భారత్ - న్యూజిలాండ్ మధ్య జరిగిన తొలి టీ20లో టీమిండియా విజయం సాధించింది. అభిషేక్ శర్మ 84, రింకూ సింగ్ 44 నాటౌట్‌తో భారత్ 20 ఓవర్లలో 238/7 భారీ స్కోర్ నమోదు చేసింది. 2016లో ఇదే గ్రౌండ్‌లో 79 పరుగులకే ఆలౌట్ అయిన భారత్.. అదే న్యూజిలాండ్‌ను చిత్తు చేసి రివేంజ్ తీర్చుకుంది.

భారత్ ఇచ్చిన 239 పరుగుల లక్ష్యంతో బరిలోకి దిగిన న్యూజిలాండ్ కేవలం ఒక్క పరుగుకే రెండు వికెట్లు కోల్పోయింది. ఓపెనర్ డెవాన్ కాన్వే డకౌట్ అవ్వగా, రచిన్ రవీంద్ర ఒక్క పరుగు చేసి వికెట్ కోల్పోయాడు. ఆ సమయంలో క్రీజులోకి వచ్చిన గ్లెన్ ఫిలిప్స్ మరో వికెట్ పడకుండా జాగ్రత్త పడి పవర్ ప్లే ముగిసే సమయానికి ఆరు ఓవర్లలో 50 పరుగులు వచ్చేలా చేశాడు.

హాఫ్ సెంచరీ తర్వాత స్పీడు పెంచిన గ్లెన్ ఫిలిప్స్ టీమిండియా బౌలర్ల భరతం పట్టాడు. 40 బంతులు ఆడిన ఫిలిప్స్ నాలుగు ఫోర్లు, 6 సిక్సర్లతో 78 పరుగులు చేసి భారీ సిక్సర్‌కి ప్రయత్నించి బౌండరీ వద్ద దొరికిపోయాడు. ఫిలిప్స్ అవుటైన వెంటనే 24 బంతుల్లో 39 పరుగులు చేసిన మార్క్ ఛాప్‌మన్ కూడా వికెట్ కోల్పోయాడు. దాంతో న్యూజిలాండ్‌ గెలుపు ఆశలు సన్నగిల్లాయి. ఈ ఇద్దరూ 42 బంతుల్లో 79 పరుగుల భారీ భాగస్వామ్యం నెలకొల్పారు.

ఫిలిప్స్, ఛాప్‌మన్ అవుటైన తర్వాత మిగతా బ్యాటర్లు పెద్దగా రాణించలేకపోయారు. డారిల్ మిచెల్ 18 బంతుల్లో 28 పరుగులు చేయగా, కెప్టెన్ శాన్‌ట్నర్ 13 బంతుల్లో 20 రన్స్ చేశాడు. ఆఖరి ఓవర్‌లో శివమ్ దుబే డారిల్ మిచెల్, క్రిస్టియన్ క్లార్క్‌ను వరుస బంతుల్లో అవుట్ చేశాడు. దాంతో నిర్ణీత 20 ఓవర్లలో న్యూజిలాండ్ జట్టు 7 వికెట్ల నష్టానికి 190 పరుగులు చేసింది. దాంతో భారత్ 48 పరుగుల తేడాతో విజయం సాధించి ఐదు మ్యాచ్‌ల టీ20 సిరీస్‌లో 1-0తో ఆధిక్యంలో నిలిచింది. భారత్ తరఫున వరుణ్ చక్రవర్తి, శివమ్ దుబే చెరో రెండు వికెట్లు పడగొట్టారు.