జనసేన ఎమ్మెల్యే అరవ శ్రీధర్ ..పెళ్లి చేసుకుంటానంటూ నమ్మించి మోసం చేశారంటూ మహిళ సంచలన ఆరోపణలు..

ఏపీ రాజకీయాల్లో మంగళవారం రోజు తీవ్ర కలకలం రేగింది. రైల్వేకోడూరు జనసేన ఎమ్మెల్యే అరవ శ్రీధర్‌దిగా చెప్తున్న ఓ వీడియో వెలుగులోకి వచ్చింది. వైఎస్సార్ కాంగ్రెస్ పార్టీ తన అధికారిక సోషల్ మీడియా వేదికగా ఈ వీడియో రిలీజ్ చేసింది. ప్రస్తుతం ఈ వీడియో సోషల్ మీడియాలో వైరల్ అవుతోంది. దీనిపై నెట్టింట పెద్ద చర్చ జరుగుతోంది. మరోవైపు ఈ వీడియోలో ఉన్న బాధితురాలని తానేనంటూ ఓ మహిళ వీడియో విడుదల చేసింది. ప్రస్తుతం ఈ రెండు వీడియోలు ఏపీ రాజకీయాల్లో తీవ్ర చర్చనీయాంశమయ్యాయి. ఇక ఈ వీడియోలో అరవ శ్రీధర్ తనను పెళ్లి చేసుకుంటానంటూ నమ్మించి మోసం చేశారంటూ మహిళ ఆరోపించింది.

బాధితురాలు వెల్లడించిన వివరాల ప్రకారం " నేను రైల్వే కోడూరులో గవర్నమెంట్ ఉద్యోగం చేస్తున్నా. ఏడాదిన్నర ముందు జూన్ 14, 2024లో రైల్వేకోడూరు ఎమ్మెల్యే అయిన అరవ శ్రీధర్‌కు నేను అభినందనలు తెలిపేందుకు ఫేస్‌బుక్‌ ద్వారా మెసేజ్ చేశా. మొదటి రోజే నాతో రెండు మూడు గంటలు మాట్లాడారు. ఆఖరిలో నా నంబర్ తీసుకున్నారు. తన నంబర్ నాకు ఇచ్చారు. ఆ తర్వాత టెలిగ్రామ్ ద్వారా నాకు మెసేజ్ చేశారు. నా గురించి పూర్తిగా తెలుసుకుంటూ వచ్చారు. పెళ్లి, పిల్లలు, భర్త గురించి తెలుసుకున్నారు. నా భర్త నాకు దూరంగా ఉన్న సంగతి తెలుసుకున్నారు. నేను నా బాబుతో ఉంటానని చెప్పా. నువ్వు ఒంటరి కాదు, నీకు నేనున్నా అంటూ భరోసా ఇచ్చారు." అంటూ మహిళ ఆరోపించారు.

 "కొన్ని రోజుల తర్వాత నా న్యూడ్ వీడియో కాల్స్ అడుగుతూ బలవంతపెట్టడం మొదలుపెట్టారు. నేను ఒప్పుకోకపోయేసరికి బెదిరించడం ప్రారంభించారు. ఇది నా నియోజకవర్గం, నువ్వో చిన్న ఉద్యోగివి, నీ మీద ఎంక్వైరీ వేయిస్తా.. కొడుకు, నువ్వూ ఒక్కరే ఉంటారంటూ బెదిరించారు. అయినా నేను ఒప్పుకోలేదు. ఆ తర్వాత కలవాలంటూ బెదిరించడం మొదలుపెట్టారు. నేను కలవను అని చెప్పేసరికి.. నువ్వూ, నీ కొడుకు ఒంటరిగా ఉంటారు జాగ్రత్త ఆంటూ బెదిరించి, భయపెట్టారు. దీంతో జూలై 9,2024లో తొలిసారిగా కలిశా. ఆయనే మా ఇంటికి కారులో వచ్చి నన్ను తీసుకెళ్లారు. రాజంపేట సమీపంలోని ఓ పల్లె వద్ద కారు ఆపారు. ఆ తర్వాత తన కోరిక తీర్చాలన్నారు. నేను ఒప్పుకోలేదు. కారు డోర్ ఓపెన్ చేసేందుకు ప్రయత్నిస్తే.. కొట్టి నన్ను రేప్ చేశారు. ఆ తర్వాత నన్ను ఇంటి దగ్గర వదిలి.. ఈ విషయం ఎవరికైనా చెప్తే నీ కుటుంబాన్ని నాశనం చేస్తానంటూ బెదిరించారు. " అంటూ మహిళ ఆరోపించారు.

"అతని వల్ల ఆగస్ట్ నెలాఖర్లో నాకు గర్భం వచ్చింది. ఈ విషయాన్ని చెప్తే అబార్షన్ చేయించుకోవాలన్నారు. నేను ఒప్పుకోలేదు. అబార్షన్ చేయించుకుంటే బతుకుతావ్ లేదంటా నా సంగతి నీకు తెలుసంటూ బెదిరించారు. ఆ తర్వాత నీ భర్త నుంచి విడాకులు తీసుకో.. నేను పెళ్లి చేసుకుంటానని చెప్పారు. కానీ నేను ఒప్పుకోలేదు. రెండు నెలలు అలాగే ఉన్నా. కానీ చివరకు పెళ్లి చేసుకుంటానంటే నమ్మి అబార్షన్ చేయించుకున్నా. ఏడాదిన్నర కాలంలో ఐదుసార్లు ఇలా అబార్షన్ చేయించుకున్నా." అంటూ అరవ శ్రీధర్ మీద మహిళ ఆరోపణలు చేశారు.

"ఈ ఏడాదిన్నర కాలంలో చాలాసార్లు ఇంటికి వచ్చి, బయటకు తీసుకెళ్లి నా మీద అలా ప్రవర్తించారు. నాకు తెలియకుండా మా వాళ్ల నంబర్లు, అడ్రస్‌లు కనుకున్నారు. నా భర్తకు ఫోన్ చేసి నువ్వు ఆమెకు విడాకులు ఇవ్వాలి.. లేకుంటే నిన్ను, నీ ఫ్యామిలీని, నీ కొడుకును చంపేస్తానని బెదరించాడు. ఆ తర్వాత నా భర్త నాకు ఫోన్ చేసి అడిగితే.. జరిగిందంతా చెప్పా. దీంతో వాళ్లు నాకు దూరమయ్యారు. మా ఆయన నా కొడుకును కూడా తీసుకెళ్లాడు. ఆరు నెలలుగా నేను ఒంటరిగా ఉంటున్నా. నాకు అమ్మానాన్న లేరు. నన్ను పెళ్లి చేసుకుంటానని చెప్పి నమ్మించి.. నన్ను వాడుకుని మోసం చేశారు. జనవరి 7, 2026 రోజున నిన్ను పెళ్లి చేసుకోను, ఏం చేస్తావో చేసుకో, దిక్కున్న చోట చెప్పుకోఅంటూ వదిలేశారు. ఈ ఏడాదిన్నర కాలంలో ఆయన వల్ల నరకం చూశా. నాకు న్యాయం కావాలి. " అంటూ జనసేన ఎమ్మెల్యే అరవ శ్రీధర్ మీద మహిళ ఆరోపణలు చేశారు.