మహిళా ఆరోగ్యానికి కొత్త భరోసా.. మహారాష్ట్రలో 510 ప్రత్యేక మెనోపాజ్ క్లినిక్‌లు ప్రారంభం

స్త్రీల జీవితంలో మెనోపాజ్ (రజోనివృత్తి) అనేది శారీరకంగా, మానసికగా ఎంతో కీలకమైన మార్పులను తీసుకొచ్చే దశ. సాధారణంగా 45 నుండి 55 ఏళ్ల మధ్యలో వచ్చే ఈ సమయంలో హార్మోన్ల మార్పుల వల్ల అనేక ఆరోగ్య సమస్యలు తలెత్తుతాయి. అయితే, మన సమాజంలో చాలామంది మహిళలు వీటిని వయసుతో పాటు వచ్చే సహజ మార్పులుగా భావించి నిర్లక్ష్యం చేస్తుంటారు. ఈ నేపథ్యంలో మహిళల ఆరోగ్యంపై ప్రత్యేక దృష్టి సారించిన మహారాష్ట్ర ప్రభుత్వం, దేశంలోనే తొలిసారిగా భారీ ఎత్తున మెనోపాజ్ క్లినిక్‌లను అందుబాటులోకి తీసుకువచ్చింది.
రాష్ట్రవ్యాప్తంగా ఒకేసారి 510 మెనోపాజ్ క్లినిక్‌లను ఏర్పాటు చేయడం ఒక చారిత్రాత్మక నిర్ణయంగా నిలుస్తోంది. ఈ కేంద్రాల ద్వారా మహిళలకు కేవలం ప్రాథమిక చికిత్స మాత్రమే కాకుండా, సమగ్రమైన ఆరోగ్య సంరక్షణను అందించాలని అధికారులు లక్ష్యంగా పెట్టుకున్నారు. ముఖ్యంగా మెనోపాజ్ సమయంలో వచ్చే ఎముకల బలహీనత (Bone Health), గుండె సంబంధిత సమస్యలు (Heart Health), మరియు హార్మోన్ల అసమతుల్యత వంటి కీలక అంశాలపై ఇక్కడ నిపుణులైన వైద్యులు ప్రత్యేక పరీక్షలు నిర్వహించి తగిన సలహాలు సూచనలు అందిస్తారు.
శారీరక సమస్యలతో పాటు మెనోపాజ్ సమయంలో మహిళలు తీవ్రమైన మానసిక ఆందోళన, ఒత్తిడి, మరియు నిద్రలేమి వంటి సమస్యలను ఎదుర్కొంటారు. వీటిని పరిష్కరించేందుకు ఈ క్లినిక్‌లలో మెంటల్ హెల్త్ (మానసిక ఆరోగ్యం) కౌన్సెలింగ్‌కు కూడా ప్రాధాన్యతనిస్తున్నారు. మానసిక దృఢత్వం ఉంటేనే శారీరక మార్పులను తట్టుకోవడం సులభతరం అవుతుందని, అందుకే ప్రతి మహిళా ఈ అవకాశాన్ని వినియోగించుకోవాలని వైద్యారోగ్య శాఖ అధికారులు వెల్లడించారు. ఈ క్లినిక్‌లు మహిళల్లో కొత్త ధైర్యాన్ని నింపుతాయని వారు ఆశాభావం వ్యక్తం చేస్తున్నారు.
ఈ వినూత్న కార్యక్రమం ద్వారా మెనోపాజ్ పట్ల సమాజంలో ఉన్న అపోహలను తొలగించి, మహిళల్లో అవగాహన పెంచడం ప్రధాన ఉద్దేశ్యం. తమ ఆరోగ్యం పట్ల అశ్రద్ధ వహించకుండా, సమస్యలు తలెత్తిన వెంటనే నిపుణులను సంప్రదించేలా మహిళలను ప్రోత్సహించడం ఈ కేంద్రాల ప్రత్యేకత. మహారాష్ట్ర ప్రభుత్వం చేపట్టిన ఈ అడుగు ఇతర రాష్ట్రాలకు కూడా ఆదర్శంగా నిలవనుంది. మహిళలు తమ జీవితంలోని ఈ రెండో ఇన్నింగ్స్‌ను ఆరోగ్యంగా, ఆనందంగా గడపాలనే సంకల్పంతో ఈ వ్యవస్థను రూపొందించారు.