షాపింగ్ మాల్‌ బయటే కాల్చి,,,,కెనడాలో భారతీయ యువకుడి దారుణ హత్య

కెనడాలో దారుణం చోటు చేసుకుంది. టొరంటోలోని ఒక షాపింగ్ మాల్ పార్కింగ్ ఏరియాలో గుర్తుతెలియని దుండగులు జరిపిన కాల్పుల్లో ఓ భారతీయ యువకుడు మృతి చెందాడు. ఉద్యోగ నిమిత్తం అక్కడకు వెళ్లిన అతడు ప్రాణాలు కోల్పోగా.. కుటుంబం మొత్తం కన్నీరుమున్నీరు అవుతోంది. ఈ ఘటనతో అటు కెనడాలోని ప్రవాస భారతీయుల్లో, ఇటు బాధితుడి స్వగ్రామంలో విషాద ఛాయలు అలుముకున్నాయి.

కారులోనే మాటు వేసి అటాక్..

కర్ణాటకలోని బెంగళూరు రూరల్ జిల్లాకు చెందిన 37 ఏళ్ల చందన్ కుమార్‌... ఉద్యోగ నిమిత్తం కెనడాకు వచ్చారు. ఆరేళ్లుగా అక్కడే ఉంటూ.. ఒక ప్రైవేట్ సంస్థలో ఐటీ ప్రొఫెషనల్‌గా పని చేస్తున్నారు. అయితే శనివారం రోజు సాయంత్రం టొరంటోలోని ఒక షాపింగ్ మాల్‌కు వెళ్లారు. కారును పార్క్ చేసేందుకు పార్కింగ్ ఏరియాకు వెళ్లగా.. ఈ దారుణం చోటు చేసుకుంది. ముఖ్యంగా అప్పటికే మాటు వేసి ఉన్న ఆగంతకులు.. చందన్ వాహనాన్ని లక్ష్యంగా చేసుకుని విచక్షణారహితంగా కాల్పులు జరిపారు. దీంతో కారు విండ్‌షీల్డ్‌కు బుల్లెట్ రంధ్రాలు పడ్డాయి. అలాగే డ్రైవర్ వైపు ఉన్న విండో పూర్తిగా ధ్వంసం అయింది. ఈక్రమంలోనే చందన్‌కు కూడా బుల్లెట్లు తగిలి తీవ్రంగా గాయపడ్డాడు.

పేలుడు శబ్దాలు వినిపించడంతో స్థానికులు పోలీసులకు ఫోన్ చేశారు. హుటాహుటిన పోలీసులు రంగంలోకి దిగి.. రక్తపుమడుగులో పడి ఉన్న చందన్ కుమార్‌ను ఆస్పత్రికి తరలించారు. అక్కడే చికిత్స పొందుతూ చందన్ ప్రాణాలు కోల్పోయాడు. దీంతో పోలీసులు ఈ విషయాన్ని భారత్‌లో ఉంటున్న అతడి తండ్రి నంద కుమార్‌కు ఫోన్ చేసి తెలిపారు. దీంతో అతడు గుండెలవిసేలా రోదించాడు. అసలేం జరిగిందో చెప్పమంటూ పోలీసులను బతిమాలాడు. ఈక్రమంలోనే వారు జరిగిందంతా చెప్పగా విని.. నంద కుమార్ కుప్పకూలిపోయాడు.

చందన్ తండ్రి నందకుమార్ ఒక రిటైర్డ్ స్కూల్ హెడ్ మాస్టర్ కాగా.. కుమారుడి భవిష్యత్తుపై గురించి ఎన్నెన్నో కలలు కన్నాడు. కష్టపడి సంపాదించినంత డబ్బంతా పెట్టి మరీ కుమారుడిని కెనడా పంపించాడు. కానీ దురదృష్టవశాత్తు అతడు అక్కడే ప్రాణాలు కోల్పోవడంతో.. నందకుమార్ ఈ విషయాన్ని జీర్ణించుకోలేకపోతున్నారు.

మాటు వేసి మరీ దాడి.. పోలీసులు ఏమంటున్నారంటే?

టొరంటో పోలీస్ సర్వీస్ ఇన్‌స్పెక్టర్ ఎరోల్ వాట్సన్ మీడియాతో మాట్లాడుతూ.. ఇది ఒక లక్ష్యిత దాడి అని ప్రాథమికంగా భావిస్తున్నట్లు తెలిపారు. అయితే దీని వెనుక ఎంతమంది ఉన్నారనే దానిపై ఇంకా స్పష్టత రాలేదని చెప్పారు. అయితే ఇప్పటికే షాపింగ్ మాల్ వద్ద ఉన్న సీసీటీవీ ఫుటేజీలను, డ్యాష్‌క్యామ్ వీడియోలను సేకరించినట్లు తెలిపారు. వాటిని పూర్తిగా పరిశీలించి, నిందితులను త్వరలోనే పట్టుకుంటామని హామీ ఇచ్చారు.