31 బంతుల్లో 66 రన్స్‌.. నెదర్లాండ్స్‌పై శివమ్ దూబే తాండవం

వరుస విజయాలతో ఐసీసీ టీ20 వరల్డ్ కప్ 2026లో ఇప్పటికే సూపర్-8 బెర్త్ ఖరారు చేసుకున్న భారత్.. చివరి లీగ్ మ్యాచ్‌లోనూ బ్యాటింగ్‌లో సత్తా చాటింది. అహ్మదాబాద్ వేదికగా నెదర్లాండ్స్‌తో జరుగుతూన్న మ్యాచ్‌లో.. టాస్ గెలిచి ముందుగా బ్యాటింగ్ ఎంచుకున్న టీమిండియా 20 ఓవర్లలో 6 వికెట్ల నష్టానికి 193 పరుగులు చేసింది. ఓపెనర్ అభిషేక్ శర్మ మరోసారి డకౌట్‌గా వెనుదిరిగి నిరాశపరిచాడు. కానీ శివమ్ దూబే (31 బంతుల్లో 66) మెరుపు బ్యాటింగ్‌కు మిగతా బ్యాటర్ల సహకారం తోడవటంతో భారత్ ప్రత్యర్థికి భారీ లక్ష్యాన్ని నిర్దేశించింది.

గత మూడు మ్యాచ్‌ల్లోనూ టాస్ ఓడిన కెప్టెన్ సూర్యకుమార్ యాదవ్.. నెదర్లాండ్స్‌తో మ్యాచ్‌లో టాస్ గెలిచాడు. గత మూడు మ్యాచ్‌ల్లో లక్ష్యాలన కాపాడుకోవడంతో.. ఈ మ్యాచ్‌లోనూ ముందు బ్యాటింగ్ చేయడానికే సూర్య మొగ్గు చూపాడు. అయితే తొలి ఓవర్లోనే భారత్‌కు ఎదురుదెబ్బ తగిలింది. గత రెండు మ్యాచ్‌ల్లో డకౌట్ అయిన ఓపెనర్ అభిషేక్ శర్మ.. ఈ మ్యాచ్‌లోనూ పరుగులేమీ చేయకుండానే వెనుదిరిగాడు. ఈ వరల్డ్ కప్‌ టోర్నీలో అభిషేక్ ఇప్పటి వరకూ ఖాతా తెరవకపోవడం గమనార్హం.

ఆర్యన్ దత్ వేసిన ఇన్నింగ్స్ తొలి ఓవర్‌లో రెండు బంతులను ఎదుర్కొన్న అభిషేక్.. మూడో బంతికి భారీ షాట్ ఆడబోయాడు. కానీ బంతి గమనాన్ని సరిగా అంచనా వేయలేకపోవడంతో బౌల్డ్ అయ్యాడు. మరో ఓపెనర్ ఇషాన్ కిషన్ క్రీజ్‌లో ఉన్నంత సేపు దూకుడుగా ఆడాడు. 7 బంతుల్లో 18 పరుగులు చేసిన ఇషాన్‌ కూడా ఆర్యన్ బౌలింగ్‌లోనే వెనుదిరిగాడు.

దీంతో తిలక్ వర్మ (27 బంతుల్లో 31), కెప్టెన్ సూర్యకుమార్ యాదవ్ (28 బంతుల్లో 34) మెల్లగా ఆడారు. నెదర్లాండ్స్ బౌలర్లకు ఏమాత్రం అవకాశం ఇవ్వకుండా ఆచితూచి బ్యాటింగ్ చేశారు. కానీ 9 ఓవర్ చివరి బంతికి తిలక్ ఔట్ కావడంతో.. క్రీజ్‌లోకి వచ్చిన శివమ్ దూబే మెల్లగా ఇన్నింగ్స్ మొదలుపెట్టాడు. దీంతో 11.5 ఓవర్లు ముగిసే సమయానికి భారత్ 3 వికెట్ల నష్టానికి 83 పరుగులే చేసింది.

కొలిన్ అకెర్‌మన్ వేసిన ఇన్నింగ్స్ 13వ ఓవర్లో శివమ్ దూబే చెలరేగిపోయాడు. 2 సిక్సులు, ఒక ఫోర్ బాదడంతో ఆ ఓవర్లో 19 రన్స్ వచ్చాయి. కైయిల్ క్లెయిన్ వేసిన తర్వాతి ఓవర్లో లాంగ్ లెగ్ దిశగా భారీ షాట్ ఆడబోయిన సూర్య.. సబ్‌స్టిట్యూట్ ఫీల్డర్ టిమ్ వాన్ డెర్ గుగ్టెన్‌‌కు క్యాచ్ ఇచ్చి పెవిలియన్ చేరాడు. దీంతో హార్దిక్ పాండ్య క్రీజ్‌లోకి వచ్చాడు.

15 ఓవర్ల వరకు మెల్లగా ఆడిన శివమ్ దూబే.. ఆ తర్వాత ఒక్కసారిగా గేర్ మార్చాడు. 16వ ఓవర్లో దూబే, హార్దిక్ చెరో సిక్స్ బాదడంతో 15 పరుగులొచ్చాయి. లాగాన్ వాన్ బీక్ వేసిన ఇన్నింగ్స్ 17వ ఓవర్లో దూబే రెండు సిక్సులు, ఓ ఫోర్ బాదాడు. దీంతో ఆ ఓవర్లో 20 రన్స్ వచ్చాయి. అదే సమయంలో దూబే 25 బంతుల్లో హాఫ్ సెంచరీ పూర్తి చేసుకున్నాడు.

18వ ఓవర్లో 6 పరుగులే రాగా.. 19వ ఓవర్లో దూబే ఒక ఫోర్, హార్దిక్ రెండు సిక్సులు కొట్టడంతో 21 పరుగులు వచ్చాయి. చివరి ఓవర్ తొలి బంతికి సిక్స్ కొట్టి.. అంతర్జాతీయ టీ20ల్లో అత్యధిక వ్యక్తిగత స్కోరు నమోదు చేసిన దూబే.. మరుసటి బంతికి బౌండరీ లైన్ దగ్గర సబ్‌స్టిట్యూట్ ఫీల్డర్ టిమ్ వాన్ డేర్ పట్టిన అద్భుతమైన క్యాచ్‌తో పెవిలియన్ చేరాల్సి వచ్చింది. తర్వాత రింకూ సింగ్ ఓ సిక్స్ బాదగా.. చివరి బంతికి హార్దిక్ పాండ్య (21 బంతుల్లో 30) ఔటయ్యాడు.

ఈ మ్యాచ్‌లో తొలి 10 బంతుల్లో 5 రన్స్ మాత్రమే చేసిన దూబే.. తర్వాతి పది బంతుల్లో 27 పరుగులు చేశాడు. ఆ తర్వాతి పది బంతుల్లో 34 రన్స్ చేసిన దూబే.. 31వ బంతికి ఔటయ్యాడు. తొలి 16 బంతుల్లో 23 రన్స్ మాత్రమే చేసిన శివమ్ తర్వాతి 14 బంతుల్లోనే 43 పరుగులు చేయడం విశేషం. దీంతో 15 ఓవర్లలో 4 వికెట్ల నష్టానికి 118 పరుగులే చేసిన భారత్.. 20 ఓవర్లు ముగిసే సమయానికి 6 వికెట్లు నష్టపోయి 193 రన్స్ చేసింది. ఆరంభంలోనే వికెట్లు పడటంతో ప్రత్యర్థి బౌలర్లను గౌరవిస్తూ మెల్లగా ఆట మొదలుపెట్టిన దూబే.. తన టైం వచ్చాక మాత్రం శివ తాండవం ఆడేశాడు.