విడాకులు తీసుకున్న టీమిండియా క్రికెటర్ రాహుల్ చాహర్.. ఎమోషనల్ ట్వీట్

టీమిండియా క్రికెటర్ రాహుల్ చాహర్ తన భార్యతో విడాకులు తీసుకుంటున్నట్లు సోషల్ మీడియా ద్వారా ప్రకటించారు. ఈ మేరకు అధికారిక ఎక్స్ ఖాతా నుంచి రాహుల్ చాహర్ భావోద్వేగపూరిత ట్వీట్ చేశారు. 2022లో రాహుల్ చాహర్.. ఇషానీ జోహర్ అనే యువతిని పెళ్లి చేసుకున్నారు. 2022 మార్చి నెలలో గోవాలో వీరి డెస్టినేషన్ వెడ్డింగ్ జరిగింది. రాహుల్ చాహర్ ఇషానీ జోహార్ పెళ్లికి.. రాహుల్ చాహర్ సోదరుడు దీపక్‌ చాహర్‌తో పాటు శివమ్‌ మావి సైతం హాజరయ్యాడు. ఈ ఫోటోలను రాహుల్ చాహర్ అప్పట్లో తన సోషల్ మీడియాలో పంచుకున్నారు. అయితే తాజాగా ఇషానీ జోహర్ నుంచి విడిపోతున్నట్లు రాహుల్ చాహర్ ట్వీట్ చేశాడు.

" చిన్న వయసులోనే వివాహం చేసుకున్నా.. నన్ను నేను పూర్తిగా అర్థం చేసుకోకుండానే, నా విలువను నేను తెలుసుకోకముందే, ఎలాంటి జీవితం నాకు కావాలనే దానిపై స్పష్టత లేకుండానే వివాహ బంధంలోకి అడుగుపెట్టా. ఆ తర్వాత ఎన్నడూ ఊహించని పాఠాలు నేర్చుకున్నా. గత పదిహేను నెలలుగా కోర్టు గదుల్లో తిరుగుతూ ఓపికతో పాటు నిజాల నుంచి కొంత ధైర్యాన్నీ తెచ్చుకున్నా. ఇవాళ్టితో నా జీవితంలో ఆ అధ్యాయం అధికారికంగా ముగిసిపోయింది. చట్టపరమైన ప్రక్రియ తర్వాత ఈ అంశం ఇక్కడితో ముగిసిపోయింది. నా జీవితంలో ఓ అధ్యాయం ఇక్కడితో ముగిసింది. నేను ఈ విషయాన్ని కోపంతోనో, లేదా విచారంతోనో కాదు.. స్పష్టతతో ముగిస్తున్నా"

 " మన జీవితంలో కొన్ని సంబంధాలు శాశ్వతంగా ఉండిపోవు. అవి మనల్ని మేల్కొలిపి, మనలో మార్పు తీసుకువస్తాయి. నేను బాగా ఆలోచించి, నాత సొంత అవగాహనతో, నేను నిర్మించుకోవలసిన జీవితం గురించి ముందుకు వెళ్తాను. ఇది ముగింపు కాదు.. విడుదల. నాకు కొత్త పాఠాలు నేర్పింది. ఇక నుంచి జీవితంలో ఆత్మగౌరవం, శాంతి కలిగించే మంచి నిర్ణయాలు తీసుకుంటానని భావిస్తున్నా. చేదు జ్ఞాపకాలను నేను ముందుకు తీసుకెళ్లను. నేర్చుకున్న పాఠాలు, గౌరవంతో పాటుగా జీవితాన్ని మళ్ళీ ప్రారంభించేందుకు ధైర్యంతో మాత్రమే ముందుకెళ్తా.." అంటూ రాహల్ చాహర్ పోస్ట్ చేశారు.

మరోవైపు టీమిండియా క్రికెటర్లు శిఖర్ ధావన్ , హార్ధిక్ పాండ్యా, యుజ్వేంద్ర చాహల్ కూడా ఇటీవలి కాలంలో విడాకులు తీసుకున్న సంగతి తెలిసిందే. తాజాగా రాహుల్ చాహర్ కూడా వైవాహిక బంధం నుంచి తప్పుకుంటున్నట్లు ప్రకటించారు.